លោក ហ៊ុន ម៉ាណែត អំពាវនាវឱ្យពុទ្ធបរិស័ទនិងប្រជាពលរដ្ឋទាំងអស់ចូលរួមថែរក្សាការពារសមិទ្ធិផលទាំងឡាយដែលកើតចេញពីសុខសន្តិភាព

លោក ហ៊ុន ម៉ាណែត នាយរងសេនាធិការចំរុះកងយោធពលខេមរភូមិន្ទ មេបញ្ជាការរងកងទ័ពជើងគោក និងជាមេបញ្ជាការនៃបញ្ជាការដ្ឋានជាតិកម្លាំងពិសេសប្រឆាំងភេរវកម្ម តំណាងដ៏ខ្ពង់ខ្ពស់លោកនាយករដ្ឋមន្រ្តី ហ៊ុន សែន និងភរិយា បានអញ្ជើញជាអធិបតីក្នុងពិធីកាត់ឬស​សីមាសម្ពោធសមិទ្ធផលនានាក្នុងវត្តខ្នារក្រៅ រួមទាំងមហាស្រះទឹក ព្រះវិហារ និងសមិទ្ធផលនានាក្នុងវត្ត វង្សភ័ក្ត្របុរីសិរីរ័ត្ន ហៅវត្តខ្នារក្រៅ រួមនឹងមហាស្រះទឹក ស្ថិតនៅភូមិខ្នារក្រៅ ឃុំកន្ទួត ស្រុកស្វាយលើ ខេត្តសៀមរាប កាលពីថ្ងៃទី០៨ ខែមករា ឆ្នាំ២០១៨។

ក្នុងកិច្ចស្វាគមន៍របស់លោក ឃឹម ប៊ុនសុង អភិបាលខេត្តសៀមរាប បានគូសបញ្ជាក់ថា វិស័យ​ព្រះ​ពុទ្ធសាសនា ទូទាំងខេត្តសៀមរាបមានវត្តចំនួន ២៤២ និងអាស្រមចំនួន ២៣ មានព្រះសង្ឃ​ចំនួន ៤ពាន់៧៨៨ អង្គ ក្នុងនោះគណមហានិកាយចំនួន ២៣៥ វត្ត និងអាស្រម ២២ ព្រះសង្ឃមានចំនួន ៤ពាន់៧០២ អង្គ វត្តគណៈធម្ម​យុត្តិកនិកាយ មានចំនួន ៧ វត្ត និង អាស្រម ១ ព្រះសង្ឃមានចំនួន ៨៦ អង្គ និង មានអាចារ្យសរុប ៦៥៨ នាក់ គណៈកម្មការវត្ត ១ពាន់៧០៥ នាក់។

លោក ខេង សុមេធ បានបញ្ជាក់ថា វត្តខ្នារក្រៅនេះ បានកសាងឡើងក្នុង ឆ្នាំ១៩២០ ដោយបានឆ្លងកាត់ជាច្រើនជំនាន់  ទីវត្តនេះក៏គ្មានការអភិវឌ្ឍន៍  សំខាន់ក្នុងរបបប្រល័យពូជសាសន៍   ប៉ុល ពត ត្រូវបានបំផ្លាញទីវត្តនេះទាំងស្រុង។ ដើមី្បរំលឹកដល់គុណថ្ងៃជ័យជំនះ៧មករា ១៩៧​៩ ក៏ ដូចជាការឧទិ្ទសដល់ដូងវិញ្ញាណក្ខ័ន្ធរបស់លោកឪពុក និងសាច់ញាតិដែលបានស្លាប់នៅក្នុងរបបប្រល័យពូជសាសន៍ ប៉ុល ពត លោក និង ក្រុមគ្រួ​សារបានកសាងកុដ្ឋ និងព្រះវិ​ហា​រនៅក្នុងទីវត្តនេះឡើងវិញ ក្រោយពីប្រទេសជាតិមានសុខសន្តិភាពពេញលេញ។ ម៉្យាងទៀតព្រះ​វិហារនេះ បានកសាងឡើង នៅឆ្នាំ២០១៦ និង រួចរាល់នៅឆ្នាំ២០១៧។

លោក ហ៊ុន ម៉ាណែត ក៏បានធ្វើការអបអរសាទរនូវសមិទ្ធផលទាំងនេះដែលកើតចេញឡើងពីទឹកចិត្តដ៏សប្បុរសធម៌របស់ក្រុមគ្រួសារលោក ខេង សុមេធ រួមទាំងបងប្អូនពុទ្ធបរិស័ទជិតឆ្ងាយក្នុងការកសាងនូវសមិទ្ធផលក្នុងទីវត្តខ្នារក្រៅនេះក្នុងការបម្រើដល់វិស័យព្រះពុទ្ធសាស​នា។ លោកបានគូសបញ្ជាក់ថា ផ្តើមចេញពីការអនុវត្តគោលនយោបាយឈ្នះៗក្រោមការដឹក​នាំដ៏ត្រឹមត្រូវរបស់រាជរដ្ឋាភិបាលកម្ពុជាដែលមានលោកនាយករដ្ឋមន្រ្តី ហ៊ុន សែន ជាប្រមុខដឹកនាំប្រកបដោយគតិបណ្ឌិត បាននាំមកនូវសន្តិភាព ស្ថិរភាព និងការអភិវឌ្ឍលើគ្រប់វិស័យទូទាំងប្រទេស ទាំងពុទ្ធចក្រ និងអាណាចក្រ។  ក្រោយពីរបបកម្ពុជាប្រជាធិបតេយ្យបានផុតរលត់ទៅ វិស័យព្រះពុទ្ធសាសនាត្រូវបានរស់រានមានជីវិត និងត្រូវបានរដ្ឋយកចិត្តទុកដាក់ធ្វើឱ្យមានការអភិវឌ្ឍនរីកចម្រើនឡើងវិញ ទាំងវិស័យធនធានមនុស្ស សម្ភារៈរូបវ័ន្តក្នុងក្របខ័ណ្ឌទូទាំងប្រទេសដូចវិស័យនានាផងដែរ។

លោក ហ៊ុន ម៉ាណែត ក៏បានលើកផងដែរថា តាមសេចក្តីរាយការណ៍ ទីតាំងឃុំកន្ទួតនេះ គឺជា​សមរភូមិក្តៅ រវាងកម្លាំងឧទាមខ្មែរក្រហម និងទាហានរដ្ឋាភិបាលកម្ពុជា តែក្រោយប្រទេសជាតិមានសុខសន្តិភាព បានធ្វើឱ្យតំបន់សមរភូមិបានប្រែក្លាយជាតំបន់អភិវឌ្ឍន៍ និងធ្វើឱ្យប្រ​ជាពលរដ្ឋ កាន់តែមានការប្រែមុខមាត់ថ្មីលើវិស័យសេដ្ឋកិច្ចក្នុងក្រុមគ្រួសារ។ លោកបានបន្តទៀតថា ការរៀបចំប្រារព្ធពិធីបុណ្យកាត់ឫសសីមា និងឆ្លងសមិទ្ទផលនានា ក្នុងឱកាសនេះ ក៏ជាការបញ្ជាក់កាន់តែច្បាស់ថា រាជរដ្ឋាភិបាលបានផ្តល់តួនាទីយ៉ាងសំខាន់ដល់ព្រះពុទ្ធសាស​នាក្នុងសង្គមខ្មែរតាំងពីអតីតកាលរហូតមកដល់បច្ចុប្បន្ន និងទៅអនាគតហើយបានចារិកទុកក្នុងរដ្ឋធម្មនុញ្ញថា «ប្រជាពលរដ្ឋខ្មែរទាំងពីរភេទមានសិទ្ធិពេញទីខាងជំនឿសាសនា ម៉្យាងទៀ​ត​សេរីភាពខាងជំនឿ និងការប្រតិបត្តិខាងផ្លូវសាសនាត្រូវបានរដ្ឋត្រូវបានរដ្ឋធានាក្នុងលក្ខ​ខ​ណ្ឌ ដែលមិនប៉ះពាល់ដល់ជំនឿ ឬសាសនាដទៃទៀតដល់សណ្តាប់ធ្នាប់ និង សន្តិសុខសាធា រណៈ  ព្រះពុទ្ធសាសនា ជាសាសនារបស់រដ្ឋ»។ ជាមួយគ្នានោះដែរ រដ្ឋមានបេសកកម្មផ្តល់ការគាំទ្រ និងលើកតម្កើងវិស័យព្រះពុទ្ឋសាសនាឱ្យរីកចម្រើនថ្កុំថ្កើង រុងរឿង ស័ក្តិសមជាសាសនារបស់រដ្ឋ។ ក្នុងបេសកកម្មដ៏ឧត្តុង្គឧត្តមនេះ រដ្ឋមានតួនាទីផ្សព្វផ្សាយ លើកតម្កើងគ្រឹះស្ថានអប់រំផ្នែកព្រះពុទ្ធសាសនា រួមមាន សាលាបាលី និងពុទ្ធិកសិក្សានៅគ្រប់កម្រិត។

លោក ហ៊ុន ម៉ាណែត ក៏បានលើកឡើងអំពីស្ថានភាពនយោបាយក្នុង និងក្រៅប្រទេសសំខាន់ចំពោះការធ្វើបដិវត្តន៍ពណ៌របស់ក្រុមជនក្បត់ជាតិមួយចំនួនដែលមានការប៉ង់ប៉ងផ្តួលរំលំរាជរដ្ឋា ភិបាលស្របច្បាប់នៅកម្ពុជាដែលកើតចេញពីការបោះឆ្នោតគាំទ្រពីប្រជាពលរដ្ឋ។ លោកក៏បានផ្តាំផ្ញើដល់បងប្អូនប្រជាពុទ្ធបរិស័ទចំណុះជើងវត្តខ្នារក្រៅត្រូវចូលរួមថែរក្សាសមិទ្ធផលទាំ​ង​នេះ សំខាន់សមិទ្ធផលមហាស្រះទឹក ដែលជាអំណោយរបស់លោកនាយករដ្ឋមន្រ្តី ហ៊ុន សែ​ន និងភរិយា ដែលផ្តល់ជូនបងប្អូនបានប្រើប្រាស់ក្នុងភូមិនេះទាំងមូល៕