អភិបាលរងខេត្តកំពង់ឆ្នាំង ជួបសំណេះសំណាល និងរៀបចំអាហារសាមគ្គីដល់ក្រុមកីឡាករ”ទូកកំពង់លែងសែនជ័យបារមីពោធិ៍អណ្តែត”

(កំពង់ឆ្នាំង)៖ ដើម្បីអបអរសាទចំពោះជ័យលាភី ដែលក្រុមកីឡាករ ទូកង ឈ្មោះ”កំពង់លែងសែនជ័យបារមីពោធិ៍អណ្តែត” ដែលបានជាប់ចំណាត់ថ្នាក់លេខ២ នោះ លោក ចេង ញ៉ាន់ អភិបាលរងខេត្តកំពង់ឆ្នាំង និងលោកកែវ ពៅ ប្រធានមន្ទីរ សាធារណការនិង ដឹកជញ្ជូនខេត្តកំពង់ឆ្នាំង បានជួបសំណេះសំណាល និងរៀបចំអាហារសាមគ្គី នៅវត្តពោធិអណ្តែត ឃុំកំពង់ហៅ ស្រុកកំពង់លែង ខេត្តកំពង់ឆ្នាំង ។

លោក ចេង ចាន់ដូណា អភិបាលរងស្រុកកំពង់លែង និង ជាគណៈកម្មការរៀបចំទូកនៅស្រុកកំពង់លែង បានអោយដឹងថា ទូកឈ្មោះកំពង់លែងសែនជ័យបារមីពោធិ៍អណ្តែត មានកីឡាករចំនួន៥១នាក់ និង កីឡាករបំរុងចំនួន២៤នាក់ នៅឆ្នាំ២០១៧នេះ ដែលបានទៅចូលរួមប្រកួត ក្នុងព្រះរាជពិធីបុណ្យអុំទូក អកអំបុក និងសំពះព្រះខែ នៅរាជធានីភ្នំពេញ ដោយទទួលបានជ័យលាភីលេខពីរ ។
មានប្រសាសន៍សំណេះសំណាលជាមួយក្រុមកីឡាករនាពេលនោះ លោក ចេង ញ៉ាន់ បានសំដែងនូវការកោតសរសើរ ចំពោះកីឡាករទាំងអស់ដែលបាន ខិតខំប្រឹងប្រែងតស៊ូ ក្នុងការចូលប្រកួតកាលពីពេលកន្លងមក រហូតទទួលបានជោគជ័យ នាំជ័យលាភីប្រកបដោយកិត្តិយស ជួនខេត្ត ស្រុក និង វត្តផងដែរ ។
លោកបានបញ្ជាក់ទៀតថា កត្តាដែលក្រុមកីឡាករទទួលបានជោគជ័យ គឺដោយក្រុមកីឡាករគោរពបាននូវលក្ខន្ដិកៈនៃការប្រកួត ចេះសាមគ្គីគ្នា និង ការតស៊ូរបស់ក្រុមកីឡាករ។ បន្ថែមពីលើនេះ គោលបំណងនៃការរៀបចំពិធីសំណេះសំណាលគ្នានាពេលនេះ គឺដើម្បីលើកទឹកចិត្តដល់ក្រុមកីឡាករ ដែលបានខិតខំបចូលរួមប្រកួតប្រជែង បានជ័យលាភីជូនខេត្ត ។
លោកបានផ្តាំផ្ញើដល់ក្រុមកីឡាកទាំងអស់ដើម្បីដណ្តើមពានរង្វាន់លេខ១ គឺត្រូវបន្តហ្វឹកហាត់ អោយជាប្រចាំ មុនពេលចេញប្រកួត និង ត្រូវចេះថែទាំងសុខភាពអោយបានល្អ ដើម្បីឈានទៅយកពានរង្វាន់ជ័យលាភីសម្រាប់ឆ្នាំ២០១៨ខាងមុខអោយបានជូនខេត្ត និងស្រុករបស់យើងទាំងអស់គ្នា ៕