ខេត្តសៀមរាប រៀបចំពិធី​សំណេះសំណាល​ និង ពិសារអាហារ​ ជាមួយប្រតិភូ​បវរកញ្ញា​ពិភពលោក​ ឆ្នាំ២០១៧​

សៀមរាប៖ កាលពីរសៀលថ្ងៃទី០៩ ខែវិច្ឆិកា ឆ្នាំ២០១៧ លោក ឃឹម ប៊ុនសុង អភិបាលនៃគណៈអផិបាលខេត្តសៀមរាប និងលោកស្រី និងលោក នូ ផល្លា ប្រធានក្រុមប្រឹក្សាខេត្តបានទទួលបដិសណ្ឋារកិច្ចគណៈប្រតិភូបវរកញ្ញាពិភពលោកឆ្នាំ២០១៧ ដែលបានអញ្ជើញមកដល់លើទឹកដីប្រវត្តិសាស្ត្រសៀមរាប។

ការអញ្ជើញមកដល់ទឹកដីខេត្តសៀមរាបនេះ គឺមកទស្សនកិច្ច ដើម្បីស្វែងពីសក្តានុពល ទេសចរណ៍នៅខេត្តសៀមរាប ដែលជាតំបន់គោលដៅទេសចរណ៍វប្បធម៌ធម្មជាតិប្រវត្តិសាស្ត្រ ហើយក៏ជាសម្បត្តិបេតិកភ័ណ្ឌពិភពលោករបស់មនុស្សជាតិផងដែរ។

បន្ទាប់ពីចំណាប់អារម្មណ៍របស់លោក ប្រួន ( Brune ) តំណាងក្រុមហ៊ុនស្រាបៀរ ហ្គេនបឺត និង កញ្ញា អាំងចែលឡា ប៊ូនីឡា (Angela Bonila ) ម្ចាស់មកុដបវរកញ្ញាពិភពលោកឆ្នាំ២០១៦ និង ម្ចាស់មកុដបវរកញ្ញាពិភពលោកឆ្នាំ២០១៧ ក៏បានលើកឡើងពីភាពអស្ចារ្យនៃព្រះរាជាណាចក្រកម្ពុជា ក្នុងការអភិវឌ្ឍលើគ្រប់វិស័យ ជាពិសេសនៅ ខេត្តសៀមរាប ដែលសម្បូរទៅដោយសម្បត្តិវប្បធម៌ និងធម្មជាតិ បានកំពុងទាក់ទាញអារម្មណ៍ភ្ញៀវទេសចរណ៍ចូលមកទស្សនាកម្សាន្ត មកពីគ្រប់មជ្ឈដ្ឋាន នានាលើពិភពលោក ដែលប្រកបទៅដោយសុខសន្តិភាព និងសុវត្ថិភាពទៀតផង។

មានប្រសាសន៍សំណេះសំណាលនាឱកាសនោះ លោក ឃឹម ប៊ុនសុង បានធ្វើការស្វាគមន៍ ចំពោះប្រតិភូបវរកញ្ញាឯកពិភពលោក ឆ្នាំ២០១៧ ដែលមកទស្សនកិច្ច ដើម្បីស្វែងពីសក្តានុពលទេសចរណ៍នៅខេត្តសៀមរាប ដែលជាតំបន់គោលដៅទេសចរណ៍វប្បធម៌ និងធម្មជាតិ ហើយក៏ជាសម្បត្តិបេតិកភ័ណ្ឌពិភពលោកយើង ដោយផ្តោតលើសក្តានុពលរបស់ខេត្តសៀមរាប និងការងារសន្តិសុខ សណ្តាប់ធ្នាប់ បរិស្ថាន អនាម័យ និង ជីវភាពរស់នៅរបស់ប្រជាពលរដ្ឋខេត្តសៀមរាប ដោយពឹងផ្អែកលើវិស័យកសិកម្ម និងទេសចរណ៍៕