លោក សុខ ឥសាន៖ ២២ឆ្នាំ សម រង្សី បានរត់ទៅក្រៅប្រទេស ៤ដង

មន្ត្រីនាំពាក្យគណបក្សប្រជាជនកម្ពុជា លោក សុខ ឥសាន នៅថ្ងៃទី២៤មិថុនានេះ ថ្លែងថា ដោយសារនយោបាយអរិភាពនៅក្នុងសង្គមជាតិ និងធ្វើសកម្មភាពល្មើសច្បាប់ សម រង្ស៊ី បានរត់ភៀសខ្លួនទៅក្រៅប្រទេសជាបន្តបន្ទាប់ ចាប់តាំងពីបង្កើតគណបក្សជាតិខ្មែរពីឆ្នាំ១៩៩៥មក។

បើតាមលោក សុខ ឥសាន ការរត់ភៀសខ្លួននេះ មិនមែនដើម្បីរកមធ្យោបាយរំដោះប្រទេសឲ្យរួចផុតពីការឈ្លានពាន ឬជិះជាន់ណាមួយទេ តែគឺជាការរត់ភៀសខ្លួនគេចចេញពីសំណាញ់ច្បាប់ដែល សម រង្ស៊ី បានប្រព្រឹត្តល្មើសរំលោភច្បាប់ ហើយខ្លាចជាប់គុកតែប៉ុណ្ណោះ។ ដូច្នេះ សកម្មភាពរត់ចោលស្រុករបស់ សម រង្សី មិនមែនជាវីរភាពស្អីទេ តែគឺជាទង្វើកំសាក ប្រព្រឹត្តខុសច្បាប់ ហើយ មិនហ៊ានទទួសខុសត្រូវ បែរជារត់ផាស់ក្រញ៉ាំយករួចខ្លួនទៅវិញ។

លោក សុខ ឥសាន បញ្ជាក់ថា ដូច្នេះ សរុបមក សម រង្សី ត្រូវបានមហាជនដាក់ឈ្មោះឲ្យថា ជាជន កំសាកបំផុត ដោយសារបង្កើតបញ្ហា ហើយរត់យករួចខ្លួន មិនហ៊ាននៅទទួលខុសត្រូវចំពោះទង្វើខុសច្បាប់របស់ខ្លួន អាងអី មានសញ្ជាតិ២ លិខិតឆ្លងដែន២ ជាមធ្យោបាយល្អសម្រាប់ជាជម្រើស រត់ទៅក្រៅប្រទេស។

លោក សុខ ឥសាន អះអាងថា សកម្មភាពរបស់ សម រង្ស៊ី ខាងលើនេះ ជាគំរូអាក្រក់របស់មេដឹកនាំបក្សប្រឆាំង ដែលខ្វះស្មារតីទទួលខសត្រូវចំពោះទង្វើ និងសកម្មភាពរបស់ខ្លួន ៕