លោក​នាយក​រដ្ឋមន្រ្តី​ ហ៊ុន សែន​ ថ្លែង​អំណរគុណ​ប្រជាពលរដ្ឋ​ដែល​បាន​បោះឆ្នោត​គាំទ្រ និង​ផ្តល់ទំនុកចិត្ត​លើគណបក្ស​ប្រជាជន​កម្ពុជា

នៅ​ថ្ងៃ​ទី២៦ ខែមិថុនា​ ឆ្នាំ២០១៧​នេះ លោក​នាយករដ្ឋមន្រ្តី ​ហ៊ុន សែន បាន​បង្ហោះផ្សាយ​នៅក្នុង​ទំព័រហ្វេសប៊ុករបស់ខ្លួនដោយថ្លែង​អំណរអរគុណដល់​ប្រជាពលរដ្ឋ​ម្ចាស់ឆ្នោតទាំងអស់ដែលបាន​បោះឆ្នោត​គាំទ្រគណបក្សប្រជាជនកម្ពុជារហូតទទួលបានជោគជ័យក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់ឆ្នាំ២០១៧នេះ។

នៅក្នុងទំព័រហ្វេសប៊ុករបស់លោកនាយករដ្ឋមន្រ្តី ហ៊ុន សែន បានបញ្ជាក់ថា កាលពីថ្ងៃទី ២៥ ខែ មិថុនា ឆ្នាំ២០១៧ ម្សិលមិញនេះ គណៈកម្មាធិការជាតិរៀបចំការបោះឆ្នោត National Election Committee –(NEC) បានប្រកាសលទ្ធផលផ្លូវការនៃការបោះឆ្នោតជ្រើសរើសក្រុមប្រឹ​ក្សាឃុំសង្កាត់ អាណត្តិទី៤ ឆ្នាំ២០១៧ ដែលលទ្ធផលជាផ្លូវការគឺបានបញ្ជាក់ច្បាស់ថា «គណបក្សប្រជាជនកម្ពុជា-CPP» គឺជាគណបក្សឈ្នះឆ្នោតនៅក្នុងការបោះឆ្នោតខាងលើនេះ។ គ​ណ​​បក្សប្រជាជនកម្ពុជា ទទួលបាន ចៅសង្កាត់-មេឃុំ ចំនួន១,១៥៦ ដែលលើសជាង២ ភាគ៣ នៃឃុំ សង្កាត់នៅទូទាំងប្រទេស។ លទ្ធផលផ្លូវការនេះគឺបានបង្ហាញឱ្យឃើញកាន់តែច្បាស់ថា ប្រជាពលរដ្ឋ និងយុវជន បានគាំទ្រ និងបោះឆ្នោតឱ្យគណបក្សប្រជាជនយ៉ាងច្រើនលើសលប់បំផុត។

ប្រមុខរាជរដ្ឋាភិបាលកម្ពុជា ក៏បានថ្លែងអំណរគុណដ៏ជ្រាលជ្រៅបំផុតចំពោះសមាជិក សមា​ជិការគណបក្ស និងជនរួមជាតិនៅទូទាំងប្រទេស ដែលបានគាំទ្រនិងបានបោះឆ្នោតឱ្យគណប​ក្ស​ប្រជាជនដើម្បីថែរក្សាការពារសន្តិភាព និងបន្តការអភិវឌ្ឍន៍ប្រទេសជាតិឱ្យកាន់តែរីកច​ម្រើនទៅមុខទៀត។ គណបក្សប្រជាជនកម្ពុជា គឺនៅតែជាគណបក្សជាទីទុកចិត្តរបស់ប្រជាជននាំមុខដ៏រឹងមាំបំផុតនៅកម្ពុជា។ ជ័យជំនះនៅពេលនេះ គឺបានបង្ហាញឱ្យឃើញកាន់តែច្បាស់បំ​ផុតថា នៅក្នុងការបោះឆ្នោតជ្រើសតាំងតំណាងរាស្ត្រនីតិកាលទី០៦ នាខែកក្កដា ឆ្នាំ២០១៨ ខាងមុខនេះគឺ គណបក្សប្រជាជនកម្ពុជា នឹងទទួលនូវជ័យជំនះជាបន្តទៀតជាក់ជាមិនខាន៕