ឯកឧត្តមបណ្ឌិតទេសរដ្ឋមន្ត្រី អូន ព័ន្ធមុនីរ័ត្ន បានអនុញ្ញាតឲ្យគណៈ​ប្រតិភូកូរ៉េចូលជួបសំដែងការ​គួរសមនិង ជំរុញការវិនិយោគ និងពាណិជ្ជកម្មកូរ៉េ

យោងតាមសេចក្តីប្រកាសព័ត៌មានរបស់ក្រសួងសេដ្ឋកិច្ច និង  ​​​​ហិរញ្ញវត្ថុចេញថ្ងៃទី១៣ ខែ​​មិថុនា ឆ្នាំ២០១៦ ​​​   នៅទីស្តីការក្រសួងសេដ្ឋកិច្ច    ​ និងហិរញ្ញវត្ថុ ​​​​ ​​ ឯកឧត្តមបណ្ឌិត អូន ព័ន្ធ​មុនីរ័ត្ន ទេសរដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានអនុញ្ញាតឲ្យ គណៈ​ប្រតិភូកូរ៉េ មកពីគណៈកម្មការសេវាហិរញ្ញវត្ថុកូរ៉េ (FSC) ភ្នាក់ងារជំរុញការវិនិយោគ និង​ពាណិជ្ជ​កម្មកូរ៉េ (KOTRA) និងមជ្ឈមណ្ឌល FINTECH ដឹកនាំដោយលោក KIM HAK KYUN ជា Standing Commissioner នៃ FSC ចូលជួបសំដែងការគួរសម និង​ពិភាក្សា​ការងារ​​​អំពី​ការអភិវឌ្ឍន៍វិស័យហិរញ្ញវត្ថុនៅកម្ពុជា និងប្រព័ន្ធបច្ចេក​វិទ្យា​ហិរញ្ញ​វត្ថុ ហៅ​កាត់​ថា Fin Tech (Financial Technology)។

ឯកឧត្តមបណ្ឌិតទេសរដ្ឋមន្ត្រី ក៏បានរំលឹកអំពីកិច្ចសហប្រតិបត្តិការរវាងក្រសួងសេដ្ឋកិច្ច និងហិរញ្ញវត្ថុ និងគណៈកម្មការសេវាហិរញ្ញវត្ថុកូរ៉េ ក្នុងការកសាងទីផ្សារមូលបត្រ​កម្ពុជា​តាំង​ពី​ដំណាក់កាលដំបូង។ តាមរយៈកិច្ចសហប្រតិបត្តិការល្អពី FSC របស់កូរ៉េ កម្ពុជាបានដាក់​ឲ្យដំណើរការទីផ្សារមូលបត្រដោយជោគជ័យ ដោយបច្ចុប្បន្នមានក្រុមហ៊ុនចុះបញ្ជី​បោះ​ផ្សាយ​លក់មូលបត្រជាសាធារណៈ    ​​​ ​​​នៅលើក្រុមហ៊ុនផ្សារមូលបត្រកម្ពុជាចំនួន ​​​​​​   ​​    ​​​​​ ០៤ក្រុម​​ហ៊ុន។ ឯកឧត្តមបណ្ឌិតក៏បានមានប្រសាសន៍ទៀតថា    ​​   ដើម្បីបន្តគាំទ្រវិស័យនេះ

រាជរដ្ឋាភិបាលបានដាក់ចេញនូវគោលនយោបាយលើកទឹកចិត្តផ្នែកពន្ធដារនៅក្នុងវិស័យមូលបត្រ ដោយបន្ថយពន្ធលើប្រាក់ចំណេញចំនួន ៥០% នៃពន្ធលើប្រាក់ចំណេញត្រូវបង់ សម្រាប់​រយៈពេល ៣ឆ្នាំ ជូនក្រុមហ៊ុនចុះបញ្ជី និងគោលនយោបាយជំរុញការធ្វើ I.P.O របស់សហគ្រាសរដ្ឋ។ ទន្ទឹមនឹងនេះ រាជរដ្ឋាភិបាល បាននិងកំពុងរៀបចំក្របខ័ណ្ឌច្បាប់ និង​ស្ថាប័នដើម្បីផ្តល់លទ្ធភាពឲ្យសហគ្រាសធុនតូច និងមធ្យម (SMEs) អាចស្វែងរក​ប្រភព​ទុនពីទីផ្សារមូលបត្រផងដែរ។

ពាក់ព័ន្ធនឹងប្រព័ន្ធបច្ចេកវិទ្យាហិរញ្ញវត្ថុ (Fin Tech) ឯកឧត្តមបណ្ឌិតទេសរដ្ឋមន្ត្រី បាន​គូសបញ្ជាក់អំពីសារៈសំខាន់ នៃប្រព័ន្ធព័ត៌មានវិទ្យានៅក្នុងជីវិតរស់នៅប្រចាំថ្ងៃ ក៏ដូច​ជា​នៅក្នុងកិច្ចការធុរកិច្ច។ ការផ្សាភ្ជាប់រវាងប្រព័ន្ធបច្ចេកវិទ្យា និងវិស័យហិរញ្ញវត្ថុ ពិតជា​អាច​រួម​ចំណែកដល់ដំណើរការក្នុងវិស័យហិរញ្ញវត្ថុឲ្យកាន់តែមានប្រសិទ្ធភាព តាមរយៈ​ការ​កាត់​បន្ថយពេលវេលា និងចំណាយប្រតិបត្តិការផងដែរ។ យ៉ាងណាក៏​ដោយបច្ចុប្បន្ន វត្តមាន​នៃប្រព័ន្ធបច្ចេកវិទ្យាហិរញ្ញវត្ថុនៅកម្ពុជា គឺមានកម្រិតទាបនៅឡើយ ដែលនេះ​ជាកិច្ចការ​ដែល​ត្រូវធ្វើការអភិវឌ្ឍបន្ថែម។ ឯកឧត្តមបណ្ឌិតទេសរដ្ឋមន្ត្រី ក៏បានលើកឡើងអំពីចេតនា ក្នុងការពិនិត្យលើការរៀបចំឡើងវិញនូវអនុស្សរណៈនៃការយោគយល់ (MOU) រវាង​ក្រសួង​សេដ្ឋកិច្ច និងហិរញ្ញវត្ថុ និងគណៈកម្មការសេវាហិរញ្ញវត្ថុកូរ៉េ ដោយពង្រីកវិសាលភាពនៃ MOU ​​​​​​នេះលើការអភិវឌ្ឍសកម្មភាពគោលនយោបាយបន្ថែមទៀតនៅក្នុងវិស័យហិរញ្ញ​​វត្ថុ​នេះ។

សេចក្តីប្រកាសព័ត៌មានក៏បានឲ្យដឹងថា លោក KIM HAK KYUN  តំណាងប្រតិភូកូរ៉េ ក៏បានជំរាបជូនឯកឧត្តមបណ្ឌិតទេសរដ្ឋមន្ត្រី អំពីអាទិភាពរបស់រាជរដ្ឋាភិបាល​កូរ៉េក្នុង​ការ​ធ្វើ​​ឲ្យ Fin Tech ក្លាយជាក្បាលម៉ាស៊ីននៃកំណើនថ្មីរបស់ប្រទេសកូរ៉េ។ ដូច្នេះការវិនិយោគ​លើ​Fin Tech គឺជាអាទិភាពរបស់ប្រទេសកូរ៉េ។

ក្នុងនោះតាមរយៈដំណើរបេសកកម្មកម្ពុជានាពេលនេះ គណៈប្រតិភូកូរ៉េបានចូលរួមក្នុង​ការ​ចុះហត្ថលេខាលើ MOU រវាងធនាគារកាណាឌីយ៉ា និង ធនាគារគួកមិន (Kookmin  Bank) និង MOU រវាង គ្រឹះស្ថានមីក្រូហិរញ្ញវត្ថុ AMK និង ធនាគារគួក​មិន ស្តីពីកិច្ច​សហ​ប្រតិបត្តិ​ការធុរកិច្ច ក៏ដូចជាកិច្ចព្រមព្រៀងរវាង ធនាគារឯកទេស វីង និង ក្រុមហ៊ុន Gmoney Trans របស់កូរ៉េស្តីពីការផ្ទេរប្រាក់រវាងប្រទេសកូរ៉េ និងកម្ពុជា។ ភាគីកូរ៉េ ក៏បាន​ថ្លែង​អំណរគុណ​យ៉ា​ង​ជ្រាលជ្រៅជូនចំពោះ ឯកឧត្តមបណ្ឌិតទេសរដ្ឋមន្ត្រី     ព្រមទាំង​មានចេតនា​ក្នុងការ​បន្ត​​​គាំទ្ររាជរដ្ឋាភិបាលកម្ពុជាលើការអភិវឌ្ឍន៍វិស័យ​ហិរញ្ញវត្ថុផងដែរ៕