ថ្លែងក្នុងពិធីចែកសញ្ញាបត្រដល់និស្សិតសាកលវិទ្យាល័យធនធានមនុស្ស នាព្រឹកថ្ងៃទី២៨ ខែមេសា ឆ្នាំ ២០១៦ សម្ដេចតេជោនាយករដ្ឋមន្រ្ដី បានថ្លែងសារចូលរួមរំលែកទុក្ខដ៏ក្រៀមក្រំចំពោះក្រុមគ្រួសារសព មន្រ្តីកងរាជអាវុធដែលបានពលី ក្នុងការបង្រ្កាបក្រុមជួញដូរគ្រឿងញៀន កាលពីថ្ងៃទី២៧ ខែមេសា ម្សិលមិញនេះ។ ជាមួយគ្នានេះសម្ដេចតេជោ ហ៊ុន សែន បានលើកឡើងថា បញ្ហាជួញដូរគ្រឿងញៀនជាបញ្ហាមួយដ៏សំខាន់សម្រាប់ប្រទេសជាតិ ដែលត្រូវទាមទារឲ្យមានវិធានការបង្រ្កាប ឲ្យបានខ្លាំងក្លាថែមទៀត។
សម្ដេចតេជោ ហ៊ុន សែន បានលើកឡើងបន្ដថា បញ្ហានៃការជួញដូរគ្រឿងមិនមែន ជាបញ្ហារបស់កម្ពុជាដាច់ដោយឡែកនោះទេ ព្រោះថាប្រទេសកម្ពុជាមិនមានលទ្ធភាពដើម្បីផលិតគ្រឿងញៀនដោយខ្លួនឯងបាននោះទេ ប៉ុន្ដែគ្រឿងញៀននេះបានចូលពីប្រទេសនានាលើពិភពលោក មកកាន់ប្រទេសកម្ពុជាយើង។ សម្ដេចតេជោ បានបញ្ជាក់ថា សម្រាប់រាជរដ្ឋាភិបាលកម្ពុជា បានឱ្យឧបនាយករដ្ឋមន្រ្ដីមួយរូប ដើម្បីទទួលបន្ទុកការងារបង្ក្រាបនូវបទល្មើសគ្រឿងញៀនគ្រប់ប្រភេទទាំងក្នុងប្រទេស និងការនាំចូលពីប្រទេសផ្សេង។
ជាមួយគ្នានេះសម្ដេចតេជោ ហ៊ុន សែន នាយករដ្ឋមន្រ្ដី ក៏បានអំពាវនាវដល់យុវជនទាំងអស់ខិតខំរៀនសូត្រ នាំគ្នាហាត់លេងកីឡា និងត្រូវចៀសឲ្យឆ្ងាយពីគ្រឿងញៀនគ្រប់ប្រភេទ ព្រោះការប្រើប្រាស់គ្រឿងញៀន មិនបានចំណេញអ្វីដល់ជីវិតយើងឡើយ។
គួររំលឹកថា កាលពីរសៀលថ្ងៃទី២៧ ខែមេសា ឆ្នាំ២០១៦ កម្លាំងកងរាជអាវុធហត្ថរាជធានី បានបង្រ្កាបក្រុមឧក្រិដ្ឋជនគ្រឿងញៀនដ៏ធំមួយ ធ្វើឲ្យកក្រើករាជធានីភ្នំពេញ ដោយចាប់ខ្លួនមេក្លោងនិងបក្ខពួកសរុប៥នាក់ និងបាញ់ស្លាប់ម្នាក់ខណៈពេលបាញ់តបតជាមួយសមត្ថកិច្ច។ ចំណែកកម្លាំងសមត្ថកិច្ចអាវុធហត្ថម្នាក់ គឺលោកអនុសេនីយ៍ឯក ទៀន ករុណា ជានាយរងការិយាល័យប្រឆាំងបទល្មើសគ្រឿងញៀនរាជធានីភ្នំពេញ បានពលីជីវិតដោយត្រូវគ្រាប់កាំភ្លើងមួយគ្រាប់របស់ក្រុមឧក្រិដ្ឋជនគ្រឿងញៀន៕
No comments:
Post a Comment