នៅវេលាម៉ោង៨ព្រឹកថ្ងៃទី២៨ ខែមេសា ឆ្នាំ២០១៦នេះ សម្តេចតេជោ ហ៊ុន សែន
នាយករដ្ឋមន្រ្តីនៃកម្ពុជា បានអញ្ជើញជាអធិបតីភាព ក្នុងពិធីប្រគល់សញ្ញាបត្រ
ដល់និស្សិតសាកលវិទ្យាល័យធនធានមនុស្ស ដែលមានអ្នកចូលរួមជាង ១៥៨៩ នាក់ មាននិស្សិតថ្នាក់វិជ្ជាជីវៈ និស្សិតថ្នាក់បរិញ្ញាបត្ររង ថ្នាក់បរិញ្ញាបត្រ
និងថ្នាក់បរិញ្ញាបត្រជាន់ខ្ពស់ នៅវិទ្យាស្ថានជាតិអប់រំ រាជធានីភ្នំពេញ។
នៅក្នុងឱកាសនោះផងដែរ សម្តេចតេជោ ក៏បានសំណូមពរដល់ សិស្សនិស្សិតឱ្យខិតខំសិក្សា ទោះបីមានការបន្តុះបង្អាប់មាក់ងាយពីក្រុមអ្នកនយោបាយមួយចំនួន
ដែលមើលងាយដល់ សញ្ញាបត្រក្នុងប្រទេសយ៉ាងក៏ដោយ។ សម្តេចតេជោ
ក៏បានលើកឡើងអំពីបញ្ហាមួយចំនួនដូច តទៅ៖
១. សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា
សូមប្រកាសចូលរួមរំលែកទុក្ខចំពោះក្រុមគ្រួសារសព មន្រ្ដីកងរាជអាវុធហត្ថ
ដែលត្រូវក្រុមជួញដូរគ្រឿងញៀនបាញ់ស្លាប់ នៅល្ងាចថ្ងៃម្សិលមិញក្នុងប្រតិបត្តិការបង្ក្រាបក្រុមជួញដូរគ្រឿងញៀនដ៏ធំ
នៅខណ្ឌទួលគោក រាជធានីភ្នំពេញ។
២. សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា
ថ្លែងថា នៅពេលនេះមិនទាន់ឃើញមានគណបក្សនយោបាយណាមួយចូលរួម ចែកចាយទឹកស្អាតដល់ប្រជាពលរដ្ឋនៅឡើយទេ
បន្ទាប់ពីមានការអំពាវនាវដល់ទាំងមន្រ្តីរាជរដ្ឋាភិបាល, បក្សនយោបាយ និងកាកបាទក្រហម
ចូលរួមចែកចាយទឹកសម្រាប់ប្រជាពលរដ្ឋ ដែលកំពុងខ្វះខាតទឹកនៅតាមបណ្តាខេត្តនិងទីជនបទ។
៣. សម្តេចតេជោបានបញ្ជាក់ថា
យើងនឹងប្រឹងរហូតដល់ប្រជាពលរដ្ឋមានទឹកប្រើប្រាស់គ្រប់គ្រាន់ ទើបយើងអាចបន្ធូរដៃបាន
ប៉ុន្តែឥឡូវនេះ នៅកាងដៃនៅឡើយទេ ហើយកាងដៃកាន់តែធំទៀត។ សម្តេចបន្តអំពាវនាវឲ្យបន្តយុទ្ធនាការចែកចាយទឹកជូនប្រជាពលរដ្ឋ។
៤. សម្តេចតេជោ ហ៊ុន សែន បានអះអាងថា
កម្ពុជានឹងធ្វើការសិក្សាដោយពិចារណា លើការបិទទន្លេសាប ដើម្បីទប់ទល់ចំពោះបញ្ហាខ្វះខាតទឹក។
៥. សម្តេចតេជោ ហ៊ុន សែន អំពាវនាវឲ្យមានការប្រុងប្រយ័ត្នចំពោះរលកកំដៅក្នុងឆ្នាំនេះ
បញ្ហារលកកំដៅគឺជាបញ្ហាពិភពលោក ចំណែកបញ្ហាគ្រោះធម្មជាតិជាបញ្ហាក្នុងតំបន់ទាំងមូល។
៦. សម្តេចតេជោ ហ៊ុន សែន សង្ឃឹមថា គណបក្សនយោបាយដទៃ
នឹងចូលរួមយុទ្ធនាការចែកចាយទឹកជូនប្រជាពលរដ្ឋដែលខ្វះខាតទឹក។
៧. សម្តេចតេជោ ហ៊ុន សែន បានអះអាងថា
សម្តេចទើបនឹងចុះហត្ថលេខា ដើម្បីបែងចែកភារកិច្ចក្រសួងបរិស្ថាន
និងក្រសួងកសិកម្មឱ្យនៅដាច់ដោយឡែកពីគ្នា។ សម្តេច បានថ្លែងថា ចាប់ពីពេលនេះតទៅ
ក្រសួងបរិស្ថាន ត្រូវប្រគល់ដីសម្បទានដែលគ្រប់គ្រងដោយវិស័យឯកជន
ទៅឱ្យក្រសួងកសិកម្ម ហើយក្រសួងកសិកម្ម ត្រូវប្រគល់សិទ្ធិគ្រប់គ្រងព្រៃឱ្យក្រសួងបរិស្ថាន។
៨. សម្តេចតេជោ ហ៊ុន សែន ព្រមានគណបក្សនយោបាយមួយចំនួន
ដែលបានឆ្លៀតយកបញ្ហាគ្រោះរាំងស្ងួតនៅកម្ពុជា ដើម្បីទាញចំណេញនយោបាយ។ សម្តេច
បានថ្លែងថា កន្លងមកនៅពេលដែលកម្ពុជាជួបបញ្ហាគ្រោះធម្មជាតិ ក្រុមអ្នកនយោបាយទាំងនោះតែងនិយាយថា
មកពីបញ្ហាកាប់ព្រៃឈើ ប៉ុន្តែបញ្ហានេះមិនមែនមានតែនៅកម្ពុជាទេ ប្រទេសផ្សេងទៀតជាពិសេសឥណ្ឌាក៏មានបញ្ហាគ្រោះរាំងស្ងួតដូចគ្នា
រហូតដល់មានមនុស្សស្លាប់ថែមទៀតផង។ សម្តេចពន្យល់ថា បញ្ហាគ្រោះធម្មជាតិ គឺជាបញ្ហាពិភពលោកមិនមែនប្រទេសណាមួយនោះទេ៕
No comments:
Post a Comment