សកម្មជនយុវជនគណបក្សប្រជាជនកម្ពុជាក្រុងដូនកែវ ប្តេជ្ញា​យ៉ាង​ក្លៀវ​ក្លា បោះ​ឆ្នោត​ជូន​គណ​​បក្ស​ប្រជា​ជន​កម្ពុជា​ដើម្បី​បន្ត​ដឹក​នាំ​ថែ​រក្សា​សន្តិ​ភាព និង​ការ​អភិវឌ្ឍ

តាកែវ៖ សកម្មជនយុវជនគណបក្សប្រជាជនកម្ពុជាក្រុងដូនកែវ បានប្តេជ្ញាយ៉ាងក្លៀវក្លាមុះមុត បោះឆ្នោតជូនគណបក្សប្រជាជនកម្ពុជាដើម្បីបន្តដឹកនាំថែរក្សាសន្តិភាព និងការអភិវឌ្ឍប្រទេសឱ្យកាន់តែរីកចម្រើនជឿនលឿនទៅមុខ។ ការប្តេជ្ញានេះធ្វើឡើងនៅក្នុងពិធីជួប សំណេះសំណាល ក្រុមការងារយុវជន និង សកម្មជនយុវជនគណបក្សប្រជាជនកម្ពុជាខេត្តតាកែវ និងក្រុងដូនកែវ នៅមន្ទីរគណបក្សខេត្ត កាលពីព្រឹកថ្ងៃច័ន្ទ ទី១៦ ខែកក្កដា ឆ្នាំ២០១៨។ ពិធីនេះត្រូវប្រារព្ធឡើងក្រោមអធិបតីភាព លោក សុខ ខាវ៉ាន់ សមា​ជិកគណៈកម្មាធិការកណ្តាលគណបក្សប្រជាជនកម្ពុជា និងជាអនុប្រធានក្រុមការងារថ្នាក់កណ្ដាលចុះជួយក្រុងដូនកែវ លោក អ៊ិត សារុន សមាជិកគណៈអចិន្ត្រៃយ៍គណបក្សខេត្ត និង​ជា​ប្រធានមន្ទីរគណបក្សខេត្ត លោក សុខ សូកេន ប្រធានក្រុមការងារយុវជនគណ​បក្ស​ប្រជាជនកម្ពុជា ខេត្តតាកែវ។ ក្នុងពិធីនេះដែរក៏មានការចូលរួមពី លោក លោកស្រី ជាអនុប្រធាន សមាជិក សមាជិកា ក្រុមការងារយុវជន សរុបចំនួន ៦៥០នាក់ ដែលរៀបចំឡើងដោយក្រុមការងារយុវជនគណបក្សប្រជាជនកម្ពុជាខេត្ត។ គោលបំណងនៃពិធីនេះគឺ ដើម្បីលើកកម្ពស់ការយល់ដឹងអំពី ស្ថានភាពទូទៅពាក់ព័ន្ធនឹងការបោះឆ្នោតសកលជ្រើសតាំងតំណាងរាស្រ្ដអាណត្ដិទី៦ និងបង្កើនការយល់ដឹងឲ្យបានច្បាស់អំពី តួនាទី ភារកិច្ច និង​ការត្រៀមខ្លួនរបស់ក្រុមការងារយុវជន និងសកម្មជនយុវជនគណបក្ស ឆ្ពោះទៅ​រក​ជ័យ​ជម្នះក្នុងការបោះឆ្នោតសកលនៅថ្ងៃទី២៩ ខែកក្កដា ឆ្នាំ២០១៨ ខាងមុខនេះ ដោយគោរព និងអនុវត្តយ៉ាងខ្ជាប់ខ្ជួនតាមច្បាប់ បទបញ្ជារ និងនីតិវិធីនៃការបោះឆ្នោត។

លោក សុខ សូកេន មានប្រសាសន៍ថា សន្តិភាព ស្ថេរភាព និងការអភិវឌ្ឍ មិនមែនកើតឡើងដោយចៃដន្យទេ គឺកើតចេញពីការបូជា លះបង់របស់យុវជនយើងជំនាន់មុន និងការខិតខំប្រឹងប្រែងពុះពារគ្រប់ឧបសគ្គ ប្រកបដោយផែនការច្បាស់លាស់ និងទស្សនៈវិស័យវែងឆ្ងាយរបស់ថ្នាក់ដឹកនាំគណបក្សប្រជាជនកម្ពុជា ដែលមានលោក ហ៊ុន សែន ជាប្រធាន។ លោកបន្តថា ពាក្យថាសន្តិភាព គឺសាមញ្ញទេ ប៉ុន្តែវាមានអត្ថន័យស៊ីជម្រៅណាស់ ហើយទម្រាំទទួលបានសន្តិភាពនេះ គឺមានការលំបាកខ្លាំងណាស់។ សន្តិភាព គឺ​ជា​មូលដ្ឋានគ្រឹះនៃការអភិវឌ្ឍ ហើយការអភិវឌ្ឍសង្គមប្រៀបបានដូចជាការថែរក្សាក្ងានទេវ​តាដែលមានពងមាស ដែលស្ថិតលើទំនុកចិត្តខ្ពស់ និងពេលវេលាសមរម្យ ដើម្បីជម្រុញ​ឱ្យមានការអភិវឌ្ឍគ្រប់វិស័យប្រៀបដូចជា ពងមាសរបស់ក្ងានដូច្នេះដែរ។ ហើយវាបាន​បង្កើតឱកាសសម្រាប់កម្ពុជាក្នុងការអភិវឌ្ឍសេដ្ឋកិច្ចជាតិ បង្កើតការងារ បង្កើនប្រាក់ចំណូល ជូនប្រជាជនកម្ពុជា ជាពិសេសយុវជន និងពង្រឹងសេដ្ឋកិច្ចក្រុមគ្រួសារកាន់តែរីក​ចម្រើន និងបានបង្កើតឱកាសសម្រាប់រាជរដ្ឋាភិបាល ដើម្បីធ្វើសមាហរណកម្មចូលក្នុង​សហគមន៍អន្តរជាតិ និងទទួលបានការគាំទ្រ កោតសរសើរ និងវាយតម្លៃខ្ពស់ពីសំណាក់​បណ្ដាប្រទេសជាច្រើនជុំវិញពិភពលោក។ ជាក់ស្ដែងកម្ពុជាត្រូវបានទទួលស្គាល់ជាប្រទេស​មហាអំណាចវប្បធម៌មួយ តាមរយៈសម្បត្តិវប្បធម៌ដ៏សំបូរបែប ទាំងរូបីយ៍ និងអរូបីយ៍ ហើយត្រូវបានដាក់បញ្ចូលទៅក្នុងសម្បត្តិបេតិកភណ្ឌពិភពលោក ជាពិសេស ប្រាសាទ​អង្គរវត្ដ ប្រាសាទព្រះវិហារ និងប្រាសាទសំបូរព្រៃគុក មិនតែប៉ុណ្ណោះកម្ពុជាបានទទួល​ការគាំទ្រយ៉ាងមុតមាំ ក្នុងការបំពេញភារកិច្ចជាប្រធានគណៈកម្មាធិការបេតិកភណ្ឌពិភពលោកនៅឆ្នាំ២០១២ ក្រោមការខិតខំប្រឹងប្រែងរបស់ លោក សុខ អាន ដែលលោកបានលះបង់ទាំងកម្លាំងកាយចិត្ដ និងកម្លាំងប្រាជ្ញា ដើម្បីឲ្យកម្ពុជាមានកេរ្ដិ៍ឈ្មោះល្បីល្បាញ​លើឆាកអន្តរជាតិ លើវិស័យការទូតវប្បធម៌ និងមានប្រទេសជាច្រើនបានរៀនសូត្រ​ពីកម្ពុជា។

ក្នុងកម្មវិធីនេះដែរ លោកប្រធានក្រុមការងារយុវជន បានចាក់បញ្ចាំងវីដេអូ ស្ដីពីការដាក់បញ្ចូលប្រាសាទព្រះវិហារ ក្នុងសម្បត្តិបេតិកភណ្ឌពិភពលោក ក្នុងគោលបំណងជំរុញយុវ​ជនឲ្យបានស្វែងយល់ច្បាស់ ពីការឆ្លងកាត់កិច្ចការដ៏លំបាកជាច្រើន រួមទាំងភាពឆ្លៀស​វៃប្រកបដោយបញ្ញាញាណ និងយុទ្ធសាស្រ្ដស៊ីជម្រៅរបស់លោក សុខ អាន ក្រោមការដឹក​នាំដ៏ខ្ពង់ខ្ពស់របស់ លោកនាយករដ្ឋមន្ត្រី ហ៊ុន សែន ដើម្បីទទួលបានជោគជ័យក្នុងការដាក់បញ្ចូលប្រាសាទព្រះវិហារ ក្នុងសម្បត្តិបេតិកភណ្ឌពិភពលោក ដែលបានលើកតម្កើនឧត្ដមភាពរបស់កម្ពុជាក្នុងវិស័យវប្បធម៌លើឆាកអន្តរជាតិ។ លោក បានបន្តថា ក្នុងនាមជាយុវជនរបស់គណបក្ស យើងត្រូវចូលរួមការពារ ថែរក្សានូវសមិទ្ធផលនានារបស់គណបក្ស ហើយដើម្បីថែរក្សាសមិទ្ធផលទាំងនេះ យុវជនត្រូវមានទំនុកចិត្ដខ្ពស់ ចូលរួមសហការជាមួយក្រុមការងារគណបក្សគ្រប់លំដាប់ថ្នាក់ឱ្យការងាររបស់បក្សទទួលបាននូវប្រសិទ្ធ​ភាពខ្ពស់ និងគាំទ្រលើការដឹកនាំរបស់គណបក្ស តាមរយៈការបោះឆ្នោតជូនគណ​បក្សប្រជាជនកម្ពុជានៅក្នុងការបោះឆ្នោតជ្រើសតាំងតំណាងរាស្រ្ដអាណត្ដិទី៦ នេះ។

លោកប្រធានក្រុមការងារយុវជន ក៏បានថ្លែងអំណរគុណសមាជិកគណបក្ស និងសកម្មជនយុវជន ដែលបានចូលរួម និងលះបង់ខ្ពស់ដើម្បីបុព្វគណបក្ស និងជាតិមាតុភូមិ និងបានជម្រុញដល់សកម្មជនយុវជនទាំងអស់ ត្រូវខិតខំពង្រឹងសមត្ថភាពរបស់ខ្លួន ដើម្បីក្លាយជាអ្នកបន្តវេនចូលរួមដឹកនាំគណបក្ស និងប្រទេសជាតិឱ្យកាន់តែរុងរឿង។

លោក សុខ ខាវ៉ាន់ អនុប្រធានក្រុមការងារថ្នាក់កណ្តាលចុះជួយក្រុងដូនកែវ បានកោតសរសើរ និងវាយតម្លៃខ្ពស់ជូនចំពោះ លោក សុខ សូកេន ប្រធានក្រុមការងារយុវជន គណបក្សប្រជាជនកម្ពុជាខេត្តតាកែវ និងក្រុមការងារយុវជនទាំងអស់ ក្នុងការចូលរួមចំណែក និង សហការយ៉ាងស្អិតរមួត ជាមួយគណបក្សគ្រប់លំដាប់ថ្នាក់ដើម្បីបុព្វហេតុជាតិ និងប្រជាជន។

លោក គូសបញ្ជាក់ថារយៈពេលប៉ុន្មានឆ្នាំចុងក្រោយនេះប្រទេសយើង ជីវភាពប្រជាជនយើង មានការរីកចម្រើនកាន់តែលឿនទៅ គឺដោយសាររាជរដ្ឋាភិបាល ដឹកនាំដោយគណ​បក្សប្រជាជនកម្ពុជា បានធ្វើការអភិវឌ្ឍលើគ្រប់វិស័យ ទាំងវិស័យសេដ្ឋកិច្ច ហេដ្ឋារចនាសម្ព័ន្ធរូបវ័ន្ត និងទាក់ទាញវិនិយោគិន ព្រមទាំងបានជម្រុញវិនិយោគមកជិតបងប្អូនដើម្បបង្កើតការងារនៅមូលដ្ឋាន។ នេះជាការខិតខំប្រឹងប្រែងរបស់ថ្នាក់ដឹកនាំ ហើយយុវជនត្រូវពន្យល់ឱ្យប្រជាពលរដ្ឋយល់ពីផ្លែផ្កាទាំងនេះ ហើយត្រូវរួមគ្នាថែរក្សាឱ្យបានល្អដើម្បីឱ្យវាកាន់តែរីកធំធាត់។

លោក បានលើកទឹកចិត្តដល់យុវជនបក្សត្រូវមានមោទនភាពចំពោះខ្លួនឯង ចំពោះគណ​បក្ស ការធ្វើការជូនបក្សមិនខុសពីធ្វើការជូនខ្លួនឯងនោះទេ ព្រោះយើងបានចូលរួមនាំមកនូវការអភិវឌ្ឍ និងការពារសន្តិភាពទូទាំងប្រទេស ហើយគោលនយោបាយរបស់បក្សក្លាយជាគោលនយោបាយរបស់រាជរដ្ឋាភិបាល ដែលបាននាំមកនូវសន្តិភាព និងការអភិវឌ្ឍដែល​យើងទាំងអស់គ្នាបានឃើញនៅពេលនេះ និងបន្តអភិវឌ្ឍន៍បន្ថែមទៀតនៅ​ពេលអនា​គត៕