ប៉ុន្មានថ្ងៃនេះ អតីតអ្នកនយោបាយចាញ់ចាស់វស្សាម្នាក់ បានខិតខំស្រវេស្រវ៉ាស្រែក និងបង្កើតព្រឹត្តិការណ៍ទាំងទទឹងទិស ដោយក្តីស្រម៉ៃ ក្នុងន័យសោកស្តាយពីការបញ្ចប់ជីវិតនយោបាយចុងក្រោយរបស់ខ្លួន ដែលស្ថិតក្នុងភាពបរាជ័យស្ទើរពេញមួយជីវិតបែបនេះ នោះគឺអតីតមេបក្សប្រឆាំង សម រង្ស៊ី។ នរណាក៏ដឹងដែរថាមកដល់ឆ្នាំ២០១៨នេះ លោក សម រង្ស៊ី មានអាយុជិត៧០ឆ្នាំទៅហើយ ស្ទើរពេញមួយជីវិតនយោបាយរបស់គាត់គឺជួបតែភាពបរាជ័យយ៉ាងអាម៉ាស់ និងជូរចត់ ម្លោះហើយនៅតំណាក់កាលនៃជីវិតចុងក្រោយនេះ គឺត្រូវតែត្រដរខ្យល់ស្រែកបំពងសម្លេងក្នុងន័យបំបាត់ជម្ងឺស្ត្រេសខាងនយោបាយ បើទោះបីជាដឹងថាគ្មានសង្ឃឹមក៏ដោយ។ រីឯកំលាំងកាយ និងប្រាជ្ញាស្មារតី ក៏ទ្រុឌទ្រោម ចុះខ្សោយមិនអាចតស៊ូលើសៃវៀននយោបាយជាមួយគូប្រកួតបានឡើយ។ តើមាន១០ឆ្នាំប៉ុន្មានដងទៀតសម្រាប់ជីវិតនយោបាយចុងក្រោយនេះ? ចម្លើយគឺសូន្យបាត់ទៅហើយ។ ម៉្យាងទៀតក្នុងភាពជាទណ្ឌិតរត់គេចខ្លួនពីសំណាញ់ច្បាប់ក្នុងសំណុំរឿងព្រហ្មទណ្ឌជាច្រើនករណីផងនោះ បានធ្វើឱ្យគាត់ស្ថិតក្នុងសម្ពាធពោរពេញដោយអារម្មណ៍ធុញថប់ វិលវល់ ស្មុគស្មាញចាក់ស្រេះ គិតមិនបានជ្រៅ មុជមិនបានឆ្ងាយឡើយ។ ប្រហែលដោយសារអារម្មណ៍បែបនេះហើយ ទើបរាល់សកម្មភាពដែលគាត់បង្កើតឡើង គឺហាក់គ្មានប្រសិទ្ធភាព និងដូចភ្នក់ភ្លើងចំបើង ហើយកាន់តែវ័ណ្ឌក នឹងគុគច្រវ៉ាក់កាន់តែច្រើនថែមទៀត។
ថ្មីៗនេះការបង្កើតអង្គការចាត់តាំងឧទ្ទាមក្រៅច្បាប់នៅបរទេសឈ្មោះ «ចលនាសង្គ្រោះជាតិ» ផ្តួចផ្តើមដោយ សម រង្ស៊ី គឺជាការញុះញង់ និងបញ្ចុះបញ្ចូល តាមគ្រប់ទម្រង់ប្រកបដោយឧបាយកលបោកបញ្ឆោត ដើម្បីអូសទាញឱ្យប្រជាជនបះបោរប្រឆាំងនឹងរដ្ឋអំណាច និងឱ្យកងកម្លាំងប្រដាប់អាវុធមិនស្តាប់បង្គាប់បញ្ជារបស់រដ្ឋអំណាចដើម្បីសម្រេចគោលដៅថ្មី គឺការបង្កើតបណ្តាញសម្ងាត់ក្នុងប្រទេសក្នុងន័យប្រកាសឱ្យប្រជាពលរដ្ឋប្រមូលផ្តុំធ្វើបាតុកម្ម ឬញុះញង់ឱ្យកម្លាំងប្រដាប់អាវុធ បង្កភេរវកម្ម ប្រឆាំងរាជរដ្ឋាភិបាល ដែលជាសកម្មភាពថ្មីមួយទៀត ប្រឆាំងនឹងរាជរដ្ឋាភិបាលស្របច្បាប់ដោយចំហរ ហើយដែលជាការប្រឈមនឹងវិធានការច្បាប់បន្ថែមទៀតយ៉ាងប្រាកដ។ ការបង្កើតចលនាឧទ្ទាមខុសច្បាប់នៅបរទេសបែបនេះ គេនៅរង់ចាំមើលថា តើបរទេសណាមួយដែលនឹងហ៊ានអនុញ្ញាតឱ្យចលនាឧទ្ទាមខុសច្បាប់របស់ សម រង្ស៊ី នេះ បង្កើតមូលដ្ឋាននៅក្នុងប្រទេសខ្លួនប្រឆាំងនឹងរដ្ឋាភិបាលស្របច្បាប់នោះ? តើប្រទេសនោះនឹងជ្រើសរើសយកទំនាក់ទំនងការទូត និងកិច្ចសហប្រតិបត្តិការជាមួយក្រុមចលនាឧទ្ទាមខុសច្បាប់ ឬជាមួយរាជរដ្ឋាភិបាលកម្ពុជាស្របច្បាប់?
ក្នុងករណីដែលចលនាខុសច្បាប់មួយនេះ នៅតែបន្តធ្វើសកម្មភាព និងមានអង្គការចាត់តាំងខុសច្បាប់នៅបរទេស វាពិតជាផ្ទុយទាំងស្រុងទៅនឹងរដ្ឋធម្មនុញ្ញនៃព្រះរាជាណាចក្រកម្ពុជា និងច្បាប់ជាធរមាន។
ដូច្នេះ ចលនាសង្គ្រោះជាតិ ដែលមាន សម រង្ស៊ី ជាមេក្លោងនោះ និងបក្ខពួក នឹងត្រូវទទួលខុសត្រូវចំពោះមុខច្បាប់ជាក់ជាមិនខាន។ ការអនុវត្តនីតិវិធីច្បាប់ក៏នឹងអាចដំណើរការបានតាមរយៈការធ្វើបត្យាប័នជនឧក្រិដ្ឋដែលរត់គេចខ្លួន ក្រោយពីតុលាការរកឃើញនូវបទល្មើស។
តើចលនាសង្រ្គោះជាតិគឺជាអ្វី? ចលនានេះ គឺពិតជាចលនាឧទ្ទាមក្រៅច្បាប់ បង្កើតឡើងដោយក្រុមសមាសភាពមួយតំបរស្វា ដែលធ្លាប់ត្រូវបានតុលាការកំពូលហាមឃាត់មិនឱ្យធ្វើសកម្មភាពនយោបាយរយៈពេល៥ឆ្នាំរួចទៅហើយ ហើយស្ថិតក្នុងសមាសភាពតែមួយនៃអតីតគណបក្សសង្រ្គោះជាតិ ដែលត្រូវបានតុលាការកំពូលសម្រេចរំលាយចោលកាលពីថ្ងៃទី១៦ ខែវិច្ឆិកា ឆ្នាំ២០១៧។ ចលនាឧទ្ទាមក្រៅច្បាប់បែបនេះ គឺជាចលនាដែលធ្វើសកម្មភាពផ្ទុយពីរដ្ឋធម្មនុញ្ញ និងច្បាប់នៃព្រះរាជាណាចក្រកម្ពុជា។
ប្រជាពលរដ្ឋគ្រប់រូបត្រូវស្វែងយល់ថា ការចូលរួមក្នុងសកម្មភាពសម្ងាត់របស់ចលនាឧទ្ទាមខុសច្បាប់ណាមួយ គឺវាប្រឈមនឹងទោសគុគឧក្រិដ្ឋ។ នៅពេលដែលមេក្លោងនៃចលនាឧទ្ទាមនោះមិនបានចូលរួមនោះទេ ប៉ុន្តែពួកមេក្លោងទាំងនោះបានប្រើវោហាសាស្ត្រអូសទាញបងប្អូនឱ្យប្រព្រឹត្តិជាក់ស្តែង ហើយទីបំផុតបងប្អូនប្រជាពលរដ្ឋដែលប្រព្រឹត្តិផ្ទាល់ត្រូវបានចាត់វិធានការច្បាប់ដោយអាជ្ញាធរមានសមត្ថកិច្ចទៅវិញ ចំណែកឯពួកមេក្លោងនិងគូកនរបស់គេ បែរជានាំគ្នាដេកបញ្ជា និងញុះញង់ពីបរទេសយ៉ាងមានសុវត្ថិភាព។
ក្នុងនាមជាពលរដ្ឋល្អ ប្រជាពលរដ្ឋគ្រប់រូបត្រូវស្វែងយល់ថា ការផ្លាស់ប្តូររដ្ឋអំណាចក្នុងសង្គមស៊ីវិល័យ គឺត្រូវអនុវត្តក្នុងក្របខណ្ឌនៃដំណើរការលទ្ធិប្រជាធិបតេយ្យ សេរីពហុបក្ស តាមរយៈការបោះឆ្នោត ប្រកបដោយតម្លាភាព។ ការជ្រើសរើសការផ្លាស់ប្តូររបប តាមរយៈការបះបោរក្រោមការញុះញង់របស់ក្រុមចលនាឧទ្ទាមនឹងបង្កើតឱ្យមានការបែកបាក់ជាតិ និងសង្គ្រាមស៊ីវិលដូចនៅបណ្តាប្រទេសនៅអារ៉ាប់ និងមជ្ឈឹមបូព៌ាជាក់ជាមិនខាន។
រាជរដ្ឋាភិបាលកម្ពុជាបានប្តេជ្ញាយ៉ាងម៉ឹងម៉ាត់ ក្នុងការបន្តដំណើរការនៃលទ្ធិប្រជាធិបតេយ្យ ប្រកបដោយនីតិរដ្ឋ ដោយជំរុញឱ្យមានដំណើរការបោះឆ្នោតយ៉ាងទៀងទាត់នៅរៀងរាល់៥ឆ្នាំម្តងដូចមានចែងក្នុងរដ្ឋធម្មនុញ្ញ។ ជាក់ស្តែង លោកនាយករដ្ឋមន្ត្រី ហ៊ុន សែន បានបញ្ជាក់ជាថ្មីថា ការបោះឆ្នោតព្រឹទ្ធសភាអាណត្តិទី៤នឹងប្រព្រឹត្តិទៅតាមកាលកំណត់គឺនៅថ្ងៃទី២៥ ខែកុម្ភៈ ឆ្នាំ២០១៨ និងការបោះឆ្នោតជ្រើសតាំងតំណាងរាស្ត្រអាណត្តិទី៦ នឹងប្រព្រឹត្តិទៅនៅថ្ងៃទី២៩ ខែកក្កដា ឆ្នាំ២០១៨ ខាងមុខនេះ ដោយគ្មានការប្រែប្រួល ឬពន្យារពេលជាដាច់ខាត។
ដូច្នេះ ទោះបីជាស្រមោលនៃអតីតមេបក្សប្រឆាំងខិតខំបង្កើតព្រឹត្តិការណ៍ ឬចលនាឧទ្ទាម ដើម្បីឱ្យសាធារណៈមតិចាប់អារម្មណ៍យ៉ាងណាក៏ដោយ ក៏ចលនាឧទ្ទាមនេះគឺជាឧទ្ទាមភ្លើងចំបើងតែប៉ុណ្ណោះ និងមិនអាចផ្លាស់ប្តូរស្ថានការណ៍នៅកម្ពុជា ដែលកំពុងមានសុខសន្តិភាព ស្ថេរភាពសេដ្ឋកិច្ច និងការអភិវឌ្ឍដូចបច្ចុប្បន្ននេះបានឡើយ។ ចលនាឧទ្ទាមក្រៅច្បាប់របស់ក្រុម សម រង្ស៊ី នឹងកាន់តែបន្ថែមបន្ទុកនៃបទឧក្រឹដ្ឋកាន់តែធ្ងន់ធ្ងរ ដោយមិនអាចអត់ឱនឱ្យបានជាដាច់ខាត៕
ដោយ៖ សួន ចំរើន
No comments:
Post a Comment