លោក សុខ ឥសាន ៖ ការពិតនៅលើពិភពលោក និងការសម្លុតគំរាមមកលើកម្ពុជា

អ្នកនាំពាក្យគណបក្សប្រជាជនកម្ពុជា លោក សុខ ឥសាន នៅថ្ងៃទី១៥  ខែធ្នូ  ឆ្នាំ២០១៧នេះ បានមានលើកឡើងថា ក្រោយសង្គ្រាមលោកលើកទី២ បានកើតឡើងនូវសង្គ្រាមត្រជាក់ ដែល​ស្តែង​ឡើងតាមការរត់​ប្រណាំ​សព្វាវុធ។ ប៉ុន្តែក្រោយមកសហភាពសូវៀតបានប្រែប្រួល គេ​ថា​សង្រាមត្រជាក់ និងការប្រកួតប្រជែងខាងមនោគមវិជ្ជាត្រូវចប់។ នេះគ្រាន់តែចប់ជាទ្រឹស្តីទេ ឯការជាក់ស្តែង​នៅតែ​មានយ៉ាងស្រួចស្រាវដដែល។ ហេតុនេះហើយបានជាគេឃើញ​មហា​អំណាច​លោក​​ខាង​លិច​នៅតែបែរមុខព្រួញ​មករកមហាអំណាច​លោកខាងកើតកាន់​តែខ្លាំង​ថែម​ទៀត ។

លោក សុខ ឥសាន បានរៀបរាប់នូវការពិតដែលកើ​តមាន​នៅ​លើពិភពលោក​ដូចខាង​ក្រោម៖

១-ពួកគេនៅតែមានឧបាយកលចង់ច្បាមយកបណ្តាប្រទេសនៅឥណ្ឌូចិន ធ្វើជាភូមិសាស្ត្រន​យោ​​បាយ បែរមុខទៅរប្រទេសចិនដូចជា៖

– គេបាននិងកំពុងធ្វើស្និទ្ធស្នាលជាមួយវៀតណាម ដោយបំភ្លេ​ចចោល​រឿង​បដិបក្ខ​ពី​អតីតកាល ។

– បិទភ្នែកធ្វើមិនដឹងមិនឮពីលទ្ធិប្រជាធិបតេយ្យ និងសិទ្ធិមនុស្សនៅវៀតណាម ដែលពីមុនគេថា

. វៀតណាមមានបក្សតែមួយ កុម្មុយនីស្តផ្តាច់ការ

. សិទ្ធិមនុស្សមានលក្ខណៈធ្ងន់ធ្ងរ

. សេរីភាពខាងសារព័ត៌មាន សេរីភាពបញ្ចេញមតិចង្អៀត  ដែលឥឡូវគេបំភ្លេច​ចោល​បាត់​ឈឹង ។

២- គេព្យាមលូកដៃចូលក្នុងជម្លោះសមុទ្រចិនខាងត្បូង និងចង់ធ្វើ​អាជ្ញា​កណ្តាល​ដើម្បី​មាន​មុខមាត់​ ។

៣- គេខិតខំពង្រឹងសម្ព័ន្ធមិត្តពីមុន ដូចជា តៃវ៉ាន់ ថៃ  កូរ៉េខាងត្បូង ហ្វីលីពីន តាមរយៈ​ការលក់​សព្វាវុធ​ច្រើនៗឲ្យបណ្តាប្រទេសទាំងនេះ ។

៤- ចំពោះកម្ពុជា ដែលជាកូនក្រមុំ គេខិតខំបំបែកឲ្យឃ្លាតពីចិន ដោយសម្លុតគំរាម ដាក់គំនាប​មកលើរាជរដ្ឋាភិបាលកម្ពុជា ដោយចោទត្រង់ៗថាកម្ពុជាមានគោលជំហរលំអៀងទៅរកចិន ។ គេឃោសនាប្រែក្រឡាស់ការពង្រឹងលទ្ធិប្រជាធិបតេយ្យទៅជាបំផ្លាញប្រជាធិបតេយ្យ ការពង្រឹង​សន្តិភាព ​ស្ថេរភាពនយោបាយ និងលើកកម្ពស់​ជីវភាពប្រជាជន​ទៅជាការ​ប្រើអំពើគាប​សង្កត់​បក្ស​ប្រឆាំងទៅវិញ ។ គេកាត់ជំនួយគណៈកម្មាធិការជាតិរៀបចំការបោះឆ្នោត ដែលជាការ​ចង់​បំផ្លាញ​ការបោះឆ្នោត ទៅថាជាការពង្រឹងលទ្ធិប្រជាធិបតេយ្យ ។

៥- ចំពោះប្រទេសថៃ ទោះបីមានរដ្ឋប្រហារយោធាដណ្តើម​អំណាចពីរាជរដ្ឋាភិ​បាល​ស្រប​ច្បាប់​យ៉ាង​ណា ក៏គេបំភ្លេចមិននិយាយដល់មួយម៉ាត់ណាសោះ ពីលទ្ធិប្រជាធិបតេយ្យនិងសិទ្ធិមនុស្ស ហើយទទួលស្គាល់រដ្ឋាភិបាល លោកប្រាយុទ្ធ ចាន់អូចារ ជាចំហរ និងមានកិច្ច​សហប្រតិបត្តិ​ការ​ល្អ​ទៀតផង ។ ហេតុអី ? ពីព្រោះគេមានប្រយោជន៍ ។

៦- ជាមួយចិន ទោះបីគេដើ​រនយោបាយប្រឆាំងចិន តែដើ​ម្បីផលប្រយោជន៍​គេបាន​ធ្វើ​សហ​ប្រតិ​បត្តិ​​ការសេដ្ឋកិច្ចពាណិជ្ជកម្មជាមួយចិនបានដោយសេរី។ ទំនិញចិន មានលក់នៅគ្រប់​ហាង​ធំតូច​នៅ​សហរដ្ឋអាមេរិចប្រមាណ៦០ភារយ​តែគេបែរជាថ្នាំងថ្នាក់​នឹង​កម្ពុជា​​សហប្រតិបត្តិការ​សេដ្ឋកិច្ច​​ ពាណិជ្ជកម្មជាមួយចិនទៅវិញ ?

៧- ជាសត្យានុម័ត មិនដែលមានប្រទេសតូចរករឿងប្រទេសធំ និងខ្លាំងទេ ។ តែ គេបែរជា​ចោទ​កម្ពុជា​ថារករឿងគេជាប្រទេសធំ មហាអំណាចទៅវិញ ។

៨- ដោយឥទ្ធិពលមហាអំណាច បណ្តាប្រទេសនៅអឺរ៉ុប បានមានជំហរតាមមេ​កើ​យ​របស់​ខ្លួន​ដោយ​មិន​គិតពីឯករាជ្យ អធិបតេយ្យ និងយុត្តិធម៌សង្គមឡើយ ហើយបែរជាដាក់គំនាប​មក​លើ​កម្ពុជា ដូចមេធំដែរ នេះដោយសាតែផលប្រយោជន៍នយោបាយ សេដ្ឋកិច្ចហ្នឹងឯង ។

៩- ប្រទេសធំ និងខ្លាំង អាចដើរទៅវាយគេ វាយឯង ទម្លាក់គ្រាប់បែកលើគេឯង សម្លាប់​មនុស្ស​រាប់​រយ ពាន់ ម៉ឺនរាល់ថ្ងៃ បានតាមចិត្ត ហើយប្រកាសថាដើម្បីលទ្ធិប្រជាធិបតេយ្យ និងសិទ្ធិ​មនុស្សជាការចប់  គ្មានអ្នកណាហ៊ានក្អកទេ ។ ប៉ុណ្ណេះហើយនៅត្រូវ នៅល្អទៀត ?

លោក សុខ ឥសាន បានបន្ថែមថា ការរៀបរាប់ដោយសង្ខេបខាងលើនេះ ជាការពិតដែ​ល​កើត​មាន​​នៅលើពិភពលោក តែការវាយ​តម្លៃ មានលក្ខណៈខុសគ្នាទៅតាមទំនោរ និន្នាកានយោបាយ និងតាមផលប្រយោជន៍ ដែល​ធ្វើឲ្យ​ពិភពលោករកយុត្តិធម៌ មិនឃើញជាដរាបមក ៕