ចរិកពិសពុលនៃភេរវកម្ម និងបដិវត្តន៍ពណ៌

នៅថ្ងៃទី១៥  ខែធ្នូ  ឆ្នាំ២០១៧នេះ  លោក សុខ ឥសាន អ្នកនាំពាក្សគណបក្សប្រជាជនកម្ពុជា បានមានលើកឡើងថា ការរត់ប្រណាំងសព្វាវុធ និងការប្រកួតប្រជែងមនោគមន៍វិជ្ជា បានជះ ឥទ្ធិពលដល់ការកើតមាននូវអំពើភេរវកម្ម និងបដិវត្តន៍ពណ៌ដែលផ្តល់ផលវិបាក ដូចគ្នា ដល់សង្គមមនុស្ស ដូចជាសង្គ្រាមរ៉ាំរ៉ៃ ការកាប់សម្លាប់រង្គាល ការវិនាសអន្តរាយដល់រចនាសម្ព័ន្ធ សេដ្ឋកិច្ច សង្គមលើគ្រប់វិស័យ ។  ប៉ុន្តែដើម្បីបំភាន់មតិសាធារណៈ គេសង្កេតឃើញ មានរូប ភាពខុសគ្នា អំពើភេរវកម្មមានលក្ខណៈហឹង្សាច្រើន សាហាវយង់ឃ្នងជាង ឯបដិវត្តន៍ពណ៌ មានលក្ខណៈត្រជាក់ដោយយកលទ្ធិប្រជាធិបតេយ្យ និងសិទ្ធិមនុស្សមកបិទបាំងពីមុខ តែខ្លឹមសារពិតគឺជាការផ្តួលរំលំ ដណ្តើមអំណាច ក្នុងចេតនាបម្រើឧបាយកលនៃការ ប្រកួតប្រ ជែងមនោគមន៍វិជ្ជា ដែលជាប្ញសគល់ដើមរបស់វាតែប៉ុណ្ណោះ ។

លោក សុខ ឥសាន បានលើកឡើងទៀតថា  ដើម្បីបុព្វហេតុនៃការប្រកួតប្រជែងមនោគមន៍វិជ្ជា គោលដៅចម្បងគឺការដណ្តើមភូមិសាស្ត្រនយោបាយ ដើម្បីយកប្រៀបលើដៃគូប្រជែង។ ដោយ សារការប៉ុនប៉ងដណ្តើមយកប្រៀបបនេះហើយ ទើបបានជាមានសកម្មភាព ប្រើឧបាយកល គាបសង្កត់ អូសទាញ និងសំឡុតគំរាមកំហែង ដាក់គំនាប ដាក់ទណ្ឌកម្មផ្សេងៗ ធ្វើឲ្យសង្គម មានភាពវឹកវរ ចលាចល ដើម្បីងាយស្រួលយកឡេះលោតចូលមកធ្វើអន្តរាគមន៍ត្រួតត្រា និងគ្រប់គ្រងនិងដាក់អាណានិគមន៍ដោយប្រើរូបភាពថ្មី បំភាន់ភ្នែក។ តែផលវិបាក នឹងមាន នៅពេលក្រោយ ។ លោកបន្តថា ករណីទាំងនេះបានកើតឡើងនៅបណ្តាប្រទេសមួយចំនួន នៅតំបន់ភាគអាហ្វ្រិកខាងជើង នៅអាហ្វ្រិកកណ្តាល និងនៅតំបន់មជ្ឈឹមបូព៌ាជាដើម ដែល បាន និងកំពុងហុយផ្សែងទល់សព្វថ្ងៃនេះ ។ ដូច្នេះហើយបានជា មេក្លោងធំចង់សាកល្បង នៅតំបន់ឥណ្ឌូចិន យើងនេះ  ដូចកម្ពុជាជាអាទិ៍ ដែលគេចាត់ទុកថាជាភូមិសាស្ត្រនយោបាយ អំណោយផលដល់ពូកគេ ។

លោក សុខ ឥសាន បានបញ្ជាក់ថា ក្នុងសភាពការណ៍អំណោយផលដល់រាជរដ្ឋាភិបាលកម្ពុជា ប្រជាជនកម្ពុជា ចាំបាច់ត្រូវរួបរួមមហាសាមគ្គីក្រោមការការដឹកនាំរបស់គណបក្សប្រជាជន កម្ពុជានិងរាជរដ្ឋាភិបាលកម្ពុជា ដែលមានលោកនាយករដ្ឋមន្ត្រី ហ៊ុន សែន ជាប្រមុខ ប្តេជ្ញា ការពារឲ្យខានតែបានគង់វង្ស សន្តិភាព ស្ថេរភាពនយោបាយនិងបណ្តា សមិទ្ធផលសង្គម ជាតិ ជាពិសេសជីវភាពរស់នៅប្រកបដោយសុខសាន្តត្រាណរបស់ប្រជាជនគ្រប់ៗរូបឲ្យបានស្ថិត ស្ថេរយូរអង្វែងតទៅ ទប់ស្កាត់ឲ្យខាងតែបាននូវបដិវត្តន៍ពណ៌ទោះក្រោមរូបភាពណាក៏ដោយ ៕