នៅថ្ងៃទី១៦ ខែសីហា ឆ្នាំ២០១៧ នៅវិទ្យាល័យ ហ៊ុន សែន តាខ្មៅ បានរៀបចំពិធីសំណេះសំណាលជាមួយសិស្សថ្នាក់ទី១២ និងគ្រូបង្រៀនថ្នាក់ទី១២ ក្នុងក្រុងតាខ្មៅ ក្រោមអធិបតីភាព លោក ម៉ៅ ភិរុណ អភិបាលនៃគណៈអភិបាលខេត្តកណ្តាល និងជាប្រធានក្រុមការងារថ្នាក់ជាតិចុះជួយក្រុងតាខ្មៅ និងមានការចូលរួមមានពី សមាជិកក្រុមប្រឹក្សាខេត្ត អភិបាលរងខេត្ត ប្រធានមន្ទីរអង្គភាពជុំវិញខេត្ត ក្រុមប្រឹក្សា គណៈអភិបាលក្រុង មន្រ្តីរាជការជុំវិញក្រុង លោកគ្រូ អ្នកគ្រូ និងសិស្សានុសិស្ស សរុបចំនួន ១៣០០ នាក់។
នាឱកាសនោះដែរ អភិបាលខេត្ត បានឧបត្ថម្ភដល់ លោកគ្រូ អ្នកគ្រូបង្រៀនថ្នាក់ទី១២ ក្នុងក្រុងតាខ្មៅចំនួន១០៨នាក់ ក្នុងម្នាក់ៗទទួលបានថវិកាចំនួន ១០ ម៉ឺនរៀល សិស្សានុសិស្សថ្នាក់ទី១២ ចំនួន ១១៦២ នាក់ ក្នុងម្នាក់ៗទទួលបានថវិកាចំនួន ៥ម៉ឺនរៀល។ លោកក៏បានលើកទឹកចិត្តដល់សិស្សជ័យលាភីប្រឡងសញ្ញាបត្រនៅក្នុងក្រុងតាខ្មៅផងដែរ ដោយសិស្សដែលប្រលងបាននិទ្ទេសAនឹងទទួលបានម៉ូតូស៊េរីថ្មីមួយគ្រឿង ហើយចំពោះសិស្សដែលប្រឡងជាប់នឹងទទួលបានការលើកទឹកទៅតាមនិទ្ទេសនីមួយៗ ។
លោក ម៉ៅ ភិរុណ បានឱ្យដឹងថា រាល់ការផ្ញើកង់ ម៉ូតូ និងរថយន្តក្នុងពេលប្រលងបាក់ឌុប គឺមិនត្រូវគិតប្រាក់នោះទេ ហើយរាល់ការបាត់បង់ គឺអាជ្ញាធរជាអ្នកទទួលខុសត្រូវ។ លោក ម៉ៅ ភិរុណ ក៏បានណែនាំឱ្យមន្ទីរពាក់ព័ន្ធ និងអាជ្ញាធរក្រុងតាខ្មៅ ជួបប្រជុំជាមួយម្ចាស់សណ្ឋាគារ និងផ្ទះសំណាក់នានា ស្នើសុំកុំឱ្យមានការតម្លើងថ្លៃឈ្នួលផ្ទះសំណាក់ និងសណ្ឋាគារ នៅពេលប្រឡងខាងមុខ ដើម្បីសម្រួលដល់ការចំណាយនានារបស់សិស្សដែលមកចូលរួមប្រឡង៕
No comments:
Post a Comment