ក្រសួង​សាធារ​ណការ នឹងផលិ​តស្ពតអប់​រំពីគ្រោះ​ថ្នាក់ចរាច​រណ៍ ដើម្បី​កាត់បន្ថ​យគ្រោះថ្នាក់​

លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រី​ក្រសួងសាធារណ​ការ​ និងដឹកជញ្ជូន បាន​ដឹក​​នាំ​កិច្ច ប្រជុំបូកសរុបលទ្ធផលការងារត្រួតពិនិត្យការអនុវត្តច្បាប់ ស្តីពីចរាចរណ៍ផ្លូវ​គោក​ប្រចាំ​ខែ ដោយ​មាន​ការ​ចូលរួមពីសមាជិកគណៈកម្មាធិការ និងមន្ត្រីជាន់ខ្ពស់ក្រសួងសាធារណការ និង​ដឹក​ជញ្ជូន នៅថ្ងៃទី១៥ ខែ សីហា ឆ្នាំ២០១៧ ។

ជាលទ្ធផលនៃកិច្ចប្រជុំបានបង្ហាញឲ្យឃើញថា គ្រោះថ្នាក់ចរាចរណ៍នៅក្នុង​ខែកក្កដា​កន្លង​ទៅនេះ កើតមានចំនួន២៥៤ករណី បណ្តាលឲ្យមនុស្សស្លាប់ចំនួន១៣០ នាក់ និងរបួស ៣៧០ នាក់ គិត​ជាមធ្យម​ក្នុងមួយថ្ងៃស្លាប់ចំនួន៤,៣នាក់ និងបានត្រួតពិនិត្យការអនុវត្តច្បាប់​ស្តីពី​ចរាចរណ៍ផ្លូវគោកលើយានយន្តសរុបចំនួន ៧៨១៥០ គ្រឿង ក្នុងនោះមានរថយន្តល្មើសច្បាប់​ស្មើ១៤% ហើយបាន​ធ្វើការអប់រំចំនួន៤៦៧០គ្រឿង។

ចុងបញ្ចប់នៃកិច្ចប្រជុំ មានការចាក់បញ្ចាំងស្ពតអប់រំ ស្តីពីផលប៉ះពាល់នៃគ្រោះថ្នាក់ចរាចរណ៍ ដែលជាវីដេអូរយៈពេល៥នាទី ដើម្បីស្នើសុំយោបល់បន្ថែមពីសមាជិក គ.ស.ច.គ ក្នុងការធ្វើឲ្យ ស្ពតអប់រំនេះកាន់តែមានមានការចាប់អារណ៍បន្ថែមទៀត៕