ខេត្តស្វាយរៀង ប្រជុំបូកសរុប​ និងវាយ​តម្លៃការងារ​លុបបំបាត់​ឱសថក្លែងក្លាយ​ និងសេវាសុខា​ភិបាលខុសច្បាប់​​

លោក តូច ប៉ូលីវ៉ា អភិបាលរងខេត្តស្វាយរៀង និងជាប្រធានគណៈកម្មាធិការលុបបំបាត់ឱសថក្លែងក្លាយ និងសេវាសុខាភិបាលខុសច្បាប់ខេត្ត នៅថ្ងៃទី១៥ ខែសីហា ឆ្នាំ២០១៧ បានដឹកនាំកិច្ចប្រជុំបូកសរុប និងវាយតម្លៃការងារលុបបំបាត់ឱសថក្លែងក្លាយ និងសេវាសុខាភិបាលខុសច្បាប់ ប្រចាំឆមាសទី១ ឆ្នាំ២០១៧ និងលើកទិសដៅបន្ត។

កិច្ចប្រជុំនេះ មានការអញ្ជើញចូលរួមពីលោកប្រធានមន្ទីរសុខាភិបាលខេត្ត ស្នងការរងនៃស្នងការដ្ឋាន នគរបាលខេត្ត ប្រធានលេខាធិការសាលាដំបូងខេត្ត នាយករងទីចាត់ការអន្តរវិស័យសាលាខេត្ត សមាជិក សមាជិកា គណៈកម្មាធិការ លោក លោកស្រី ជាប្រធាន អនុគណៈកម្មាធិការលុបបំបាត់ឱសថក្លែងក្លាយ និងសេវាសុខាភិបាលខុសច្បាប់ ក្រុង ស្រុក ប្រធានស្រុកប្រតិបត្តិសុខាភិបាលទាំង៤ អធិការរង ក្រុង ស្រុក លោក លោកស្រី ប្រធានមណ្ឌលសុខភាពទាំង៤៣ និងមន្ត្រីពាក់ព័ន្ធ។

មានប្រសាសន៍នៅក្នុងកិច្ចប្រជុំនេះ លោកអភិបាលរងខេត្ត បានជំរុញអោយភាគីពាក់ព័ន្ធទាំងអស់ ចូលរួមលុបបំបាត់ឱសថក្លែងក្លាយ និងសេវាសុខាភិបាលខុសច្បាប់នៅក្នុងខេត្តស្វាយរៀង ធ្វើយ៉ាងណាឲ្យប្រជាពលរដ្ឋឈប់ស្វែងរក និងឈប់ទទួលប្រើប្រាស់សេវាសុខាភិបាលខុសច្បាប់ និងត្រូវនាំគ្នាលើកកំពស់ការផ្តល់សេវា សុខាភិបាលជូនប្រជាពលរដ្ឋប្រកបដោយគុណភាព និងក្រមសីលធម៌ រហ័សទាន់ចិត្ត នៅប៉ុស្ត៍សុខភាព តាមមណ្ឌលសុខភាព និងមន្ទីរពេទ្យបង្អែកដោយធានាបាននូវប្រសិទ្ធភាពខ្ពស់៕