នៅថ្ងៃ​នេះ គណៈកម្មាធិ​ការ​ជាតិរៀប​ចំការ​បោះ​ឆ្នោត បើក​វេទិកា​ដោះ​ស្រាយ​​​ពាក្យ​​បណ្តឹង​​ចំនួន​០៨ ពាក់​ព័ន្ធនឹង​បញ្ជី​ឈ្មោះ​បោះឆ្នោត

លោក ស៊ិក ប៊ុនហុក ប្រធានគណៈកម្មាធិការជាតិរៀបចំការបោះឆ្នោត (គ.ជ.ប) បើកសវនការជាសាធារណៈ នៅទីស្តីការគណៈកម្មាធិការជាតិរៀបចំការបោះឆ្នោត ដើម្បីធ្វើសេចក្តីសម្រេច ចំពោះពាក្យបណ្តឹងចំនួន០៨ ដែលនៅសេសសល់មិនទាន់ដោះស្រាយរួច ជុំវិញការតវ៉ាលើការបិទបញ្ជីឈ្មោះបោះឆ្នោត អំឡុងពេល១០ថ្ងៃនេះ នៅថ្ងៃទី១៦ ខែមករា ឆ្នាំ២០១៧នេះ នៅសាលសន្និសីទរបស់គណៈកម្មាធិការជាតិរៀបចំការបោះឆ្នោត។

សេចក្តីជូនដំណឹងរបស់គណៈកម្មាធិការជាតិរៀបចំការបោះឆ្នោតចុះថ្ងៃទី ១៤ មករា ២០១៧បានឱ្យដឹងទៀតថា រយៈពេល១០ថ្ងៃ ចាប់ពីថ្ងៃទី០៤ ដល់ទី១៤ ខែមករា ឆ្នាំ២០១៧ កន្លងមកនេះ គណៈកម្មាធិការជាតិរៀបចំការបោះឆ្នោត បានទុកឱកាសឱ្យប្រជាពលរដ្ឋដែលបានឃើញភាពមិនប្រក្រតីចំពោះឈ្មោះបោះឆ្នោត ដែលបានបិទផ្សាយនៅតាមមូលដ្ឋានឃុំ/សង្កាត់នានាទូទាំងប្រទេស ដាក់ពាក្យបណ្តឹងតវ៉ា ដើម្បីឱ្យគណៈកម្មាធិការជាតិរៀបចំការបោះឆ្នោតនៅតាមមូលដ្ឋានរៀបចំដោះស្រាយ ៕