ក្រចេះ៖ នៅថ្ងៃទី១១ ខែកញ្ញា ឆ្នាំ២០១៩ លោកឧបនាយករដ្ឋមន្ត្រី គង់ សំអុល រដ្ឋមន្ត្រីក្រសួងព្រះបរមរាជវាំង និងជាព្រះរាជតំណាងដ៏ខ្ពង់ខ្ពស់របស់ព្រះករុណា ព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងសម្ដេចព្រះមហាក្សត្រីនរោត្ដម មុនីនាថ សីហនុព្រះវរាជមាតាជាតិខ្មែរ អមដំណើរដោយលោក គុយ សុផល ក្រុមប្រឹក្សាផ្ទាល់ព្រះមហាក្សត្រ លោក វ៉ា ថន អភិបាល នៃគណៈអភិបាលខេត្តក្រចេះ លោក លោកស្រី ជាតំណាងកាកបាទក្រហមកម្ពុជា តំណាងក្រសួងស្ថាប័ននានា ព្រមទាំងអាជ្ញាធរដែនដីគ្រប់លំដាប់ថ្នាក់ បានអញ្ជើញជួបសំណេះសំណាល និងនាំយកព្រះរាជអំណោយព្រះមហាក្សត្រ និងសម្ដេចម៉ែចែកជូនប្រជារាស្ត្ររងគ្រោះដោយទឹកជំនន់ចំនួន ៨៥៧គ្រួសារនៅភូមិចំនួន៤ គឺភូមិម្រើម ភូមិតាងួន ភូមិជួរជ្រៃ និងភូមិខ្នងពស់ ក្នុងឃុំដារ ស្រុកចិត្របុរី ខេត្តក្រចេះ។
ក្នុងឱកាសជួបសំណេះសំណាល លោកឧបនាយករដ្ឋមន្ត្រីបានពាំនាំនូវព្រះរាជបណ្ដាំសាកសួរសុខទុក្ខ និងព្រះហឬទ័យអាណិតស្រឡាញ់ និងសេចក្ដីនឹករលឹកយ៉ាងជ្រាលជ្រៅបំផុតរបស់ព្រះករុណា ព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងសម្ដេចព្រះមហាក្សត្រី ព្រះវរាជមាតាជាតិខ្មែរ ជាទីក្ការៈដ៏ខ្ពង់ខ្ពស់បំផុតជូនចំពោះបងប្អូន កូនចៅ ចៅទូត នៅទូទាំងប្រទេស ពិសេសព្រះហឬទ័យ យកចិត្តទុកដាក់ចំពោះជីវភាពរស់នៅរបស់បងប្អូនប្រជារាស្ត្ររបស់ព្រះអង្គ។
លោកក៏បានលើកឡើងផងដែរនូវការសាកសួរសុខទុក្ខ និងការផ្ដាំផ្ញើពីសំណាក់រាជរដ្ឋាភិបាល ក្រោមការដឹកនាំរបស់លោកនាយករដ្ឋមន្ត្រី ហ៊ុន សែន ជូនដល់បងប្អូនប្រជាពលរដ្ឋនៅក្នុងខេត្តក្រចេះ ក៏ដូចជានៅទូទាំងប្រទេស ដែលលោកបានដឹកនាំប្រទេសជាតិ នាំមកនូវសុខសន្តិភាព ស្ថិរភាពនយោបាយ ព្រមទាំងបានធ្វើឲ្យប្រទេសជាតិមានការអភិវឌ្ឍរីកចំរើនលើគ្រប់វិស័យ ពិសេសបានធ្វើឲ្យជីវភាពរបស់ប្រជាពលរដ្ឋកាន់តែប្រសើឡើងពីមួយថ្ងៃទៅមួយថ្ងៃ ដែលទទួលបានការកោតសសើរពីសំណាក់មជ្ឈដ្ឋានអន្តរជាតិ។
ជាមួយគ្នានេះ កាកបាទក្រហមកម្ពុជាដែលមានលោកស្រី ប៊ុន រ៉ានី ហ៊ុនសែន ជាប្រធាន តែងតែយកចិត្តទុកដាក់ និងមានវិធានការក្នុងការជួយសង្គ្រោះប្រជាពលរដ្ឋ ដែលរងគ្រោះដោយគ្រោះមហន្តរាយផ្សេងៗ បានទាន់ពេលវេលានៅគ្រប់ទីកន្លែង ដោយមិនប្រកាន់និន្នាការនយោបាយ ពណ៌សម្បុរ ជាតិសាសន៏ណាមួយឡើយ។
ព្រះរាជអំណោយព្រះមហាក្សត្រ និងសម្ដេចម៉ែបានប្រទានជូនដល់ប្រជារាស្រ្តរងគ្រោះដោយទឹកជំនន់ចំនួន ៨៥៧គ្រួសារ ដោយក្នុង ១គ្រួសារទទួលបាន អង្ករ ៥០គីឡូក្រាម ឃីត ១កញ្ចាប់ (មុង១ ភួយ១ សារុង១ និងក្រម៉ា១) មី ១កេស ត្រីខ ១០កំប៉ុង កៅស៊ូតង់ ១ផ្ទាំង អាវ យឺតមានស្លាកព្រះរាជអំណោយព្រះករុណា ព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជាចំនួន១ និងថវិការចំនួន ២០ម៉ឺនរៀល៕
No comments:
Post a Comment