កិច្ចប្រជុំស្តីពីការរៀបចំសន្តិសុខ សណ្តាប់ធ្នាប់សាធារណៈ និងបរិស្ថានអនាម័យនៅបរិវេណផ្សាររាត្រីអង្គរឃ្យូងយូ

សៀមរាប៖ នៅថ្ងៃទី០៦ ខែកុម្ភៈ ឆ្នាំ២០១៩ លោក ពៅ ពិសិដ្ឋ អភិបាលរងខេត្ត តំណាងលោក ទៀ សីហា អភិបាលនៃគណៈអភិបាលខេត្តសៀមរាប បានអញ្ជើញដឹកនាំកិច្ចប្រជុំស្តីពីការរៀបចំសន្តិសុខ សណ្តាប់ធ្នាប់ របៀបរៀបរយសាធារណៈ និងបរិស្ថានអនា​ម័យ នៅបរិវេណផ្សាររាត្រីអង្គរឃ្យូងយូ (វិថីសម្តេចបញ្ញា សុខ អាន) ស្ថិតនៅភូមិ​បឹងដូនប៉ា សង្កាត់ស្លក្រាម ក្រុងសៀមរាប ខេត្តសៀមរាប។

កិច្ចប្រជុំនេះបានប្រព្រឹត្តនៅសាលាខេត្តសៀមរាប ហើយក៏មានការអញ្ជើញចូលរួមពី លោកនាយករដ្ឋបាលសាលាខេត្ត លោក លោកស្រី តំណាងមន្ទីរ-អង្គភាពពាក់ព័ន្ធ លោក​ចៅសង្កាត់ស្លក្រាម និងមេប៉ុស្ត៍ស្លក្រាម។

ជាមួយគ្នានេះដែរ លោក អភិបាលរងខេត្តក៏បានជំរុញដល់ក្រុមការងារបន្តអនុវត្តក្នុងការរៀបចំសណ្តាប់ធ្នាប់សាធារណៈអោយមានសណ្តាប់ធ្នាប់ និងរបៀបរៀបរយ ដើម្បីបញ្ចៀសការកក់ស្ទះ។ លោក ក៏បានណែនាំបន្ថែមដល់អ្នកគ្រប់តំបន់នោះ ដោយអប់រំផ្សព្វផ្សាយដល់អាជីវករត្រូវថែរក្សាអនាម័យបរិស្ថាននៅតាមកន្លែងលក់នីមួយៗ (កន្លែងលក់ផ្ទាល់ខ្លួន) ជាប្រចាំ។

ម្យ៉ាងវិញទៀត ចំពោះសំណង់តូបដែលសាងសង់នៅតាមបណ្តោយផ្លូវសម្តេចវិបុលបញ្ញា សុខ អាន ត្រូវធ្វើរុះរើវិញតាមការកំណត់របស់អាជ្ញាធរខេត្តដោយមិនអនុញ្ញាតទុកធ្វើអោយបាត់បង់សោភ័ណភាពក្រុងឡើយ៕