ស្វាយរៀង៖ នៅថ្ងៃទី០៦ ខែកុម្ភៈ ឆ្នាំ២០១៩ លោក រស់ ផារិទ្ធ អភិបាលរងខេត្តស្វាយរៀង តំណាងឱ្យ លោក ម៉ែន វិបុល អភិបាលខេត្ត បានអញ្ជើញជាអធិបតីក្នុង កិច្ចប្រជុំពង្រឹងការងារផ្តល់សេវានៅអង្គភាពច្រកចេញចូលតែមួយសាលាខេត្តស្វាយរៀង។ ក្នុងកិច្ចប្រជុំនេះ ក៏មានអញ្ជើញចូលរួមពី លោកនាយករងរដ្ឋបាលសាលាខេត្ត លោក លោកស្រី តំណាងមន្ទីរ-អង្គភាពពាក់ព័ន្ធ និងតំណាងទីចាត់ការហិរញ្ញវត្ថុសាលាខេត្ត។
មានប្រសាសន៍នៅក្នុងកិច្ចប្រជុំនោះ លោកអភិបាលរងខេត្ត បានផ្តាំផ្ញើដល់អង្គភាពពាក់ព័ន្ធទាំងអស់ នៃអង្គភាពច្រកចេញចូលតែមួយសាលាខេត្ត ត្រូវពង្រឹងការអនុវត្តការងារផ្តល់សេវាឱ្យបានល្អប្រសើរ ដើម្បីលើកកម្ពស់ គុណភាព ប្រសិទ្ធភាព ប្រសិទ្ធផល តម្លាភាព និងគណនេយ្យភាពនៃការផ្តល់សេវា នៅរដ្ឋបាលថ្នាក់ក្រោមជាតិតាមរយៈការប្រមូលផ្តុំ ការផ្តល់សេវារដ្ឋបាលលើវិស័យនានា នៅកន្លែងតែមួយ ដែលបង្កលក្ខណៈងាយស្រួល និងឆ្លើយតបទាន់ពេលវេលាទៅនឹង តម្រូវការរបស់ប្រជាពលរដ្ឋ។
លោកអភិបាលរងខេត្តបានបន្តថា ការផ្តល់សេវានេះ បានចូលរួមលើកកម្ពស់អភិបាលកិច្ចល្អក្នុងការផ្តល់សេវា និងការអភិវឌ្ឍសេដ្ឋកិច្ចមូលដ្ឋាននៅរដ្ឋបាលថ្នាក់ក្រោមជាតិ តាមរយៈការពង្រឹងតួនាទី ភារកិច្ចរបស់រដ្ឋបាលថ្នាក់ក្រោមជាតិក្នុងការទទួលនឹងការសម្រុះ សម្រួលដោះស្រាយបណ្តឹងនៅក្រៅប្រព័ន្ធតុលាការដែលពាក់ព័ន្ធទៅនឹងការផ្តល់សេវាសាធារណៈ និងការគ្រប់គ្រងរដ្ឋបាលនៅថ្នាក់ក្រោមជាតិប្រកបដោយតម្លាភាព គណនេយ្យភាព និងប្រសិទ្ធភាព ទាន់ពេលវេលា សំដៅបង្កើនជំនឿទុកចិត្តរបស់ប្រជាពលរដ្ឋដែលមកទទួលសេវា៕
No comments:
Post a Comment