ក្រសួងមហាផ្ទៃនឹងបើកកិច្ចប្រជុំផ្សព្វផ្សាយរឿងព្រំដែន
នៅថ្ងៃទី១៤ ខែកក្កដា ឆ្នាំ២០១៥ ខាងមុខ នេះបើយោងតាមប្រសាសន៍របស់សម្តេចក្រឡាហោម
ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ។ សម្តេចក្រឡាហោម ស
ខេង បានមានប្រសាសន៍ថាសមាសភាពដែលត្រូវចូលរួមក្នុងកិច្ចប្រជុំនោះគឺ អាជ្ញាធរ
សមត្ថកិច្ច និងអង្គភាពយោធានៅមូលដ្ឋាន។ ដោយសារតែរឿងព្រំដែន គឺជារឿងសំខាន់ និងទាមទារនូវភាពច្បាស់លាស់ខ្ពស់បំផុត
តម្រូវឲ្យកិច្ចប្រជុំនេះធ្វើឡើងដោយក្រសួងមហាផ្ទៃ សហការជាមួយនឹងគណៈកម្មាធិការព្រំដែន
ដែលជាក្រុមជំនាញ និងមានវិជ្ជាជីវៈច្បាស់លាស់ស្តីពីព្រំដែន។ នេះបើយោងតាមប្រសាសន៍របស់សម្តេចក្រឡាហោម
ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ។
សម្តេចក្រឡាហោម ស ខេង មានប្រសាសន៍ដូច្នេះក្នុងពិធីប្រកាសមុខតំណែងថ្នាក់អនុរដ្ឋលេខាធិការធិការ
នៃក្រសួងមហាផ្ទៃចំនួន ៧រូប និងបំពាក់ឋាន្តរស័ក្កិជូននាយនគរបាលជាតិជាន់ខ្ពស់ចាប់ពីថ្នាក់ឧត្តមសេនីយ៍ទោល
ដល់ថ្នាក់ឧត្តមសេនីយ៍ឯកចំនួន ៤១រូប ដែលធ្វើឡើងនៅក្រសួងមហាផ្ទៃ នាព្រឹកថ្ងៃទី៨
ខែកក្កដា ឆ្នាំ២០១៥ ដោយមានការចូលរួមពីរដ្ឋលេខាធិការ និងថ្នាក់ដឹកនាំអគ្គនាយកដ្ឋានចំណុះក្រសួងមហាផ្ទៃជាច្រើនអ្នកថែមទៀត។
សម្តេចក្រឡាហោម ស ខេង បានបន្ថែមថា កិច្ចប្រជុំផ្សព្វផ្សាយរឿងព្រំដែនដែលនឹងប្រព្រឹត្តទៅនៅថ្ងៃទី១៤
ខែកក្កដា ឆ្នាំ២០១៥ ខាងមុខនេះ គឺដើម្បីពង្រឹងការយល់ដឹង និងបំពេញបន្ថែមទៅលើចំណុចខ្វះខាតដែលសមត្ថកិច្ចពុំទាន់មាន
ដែលកន្លងមកនៅខេត្តខ្លះ ដូចជាខេត្តកណ្តាល នៅភូមិមួយ ត្រូវបានអាជ្ញាធរខេត្តរាយការណ៍ថា
ជាដីរបស់វៀតណាម ប៉ុន្តែក៏មានសេចក្តីរាយការណ៍ផ្សេងទៀតថា ជាដីរបស់ខ្មែរ ប៉ុន្តែជាក់ស្តែងតំបន់នោះ
មិនទាន់បោះបង្គោលព្រំដែននៅឡើយទេ។
ក្រៅពីនេះសម្តេចក្រឡាហោម ស ខេង បានថ្លែងថាសម្តេចនឹងធ្វើយ៉ាងណាដើម្បីឲ្យសមត្ថកិច្ចទាំងអស់មានចំណេះដឹងគ្រប់គ្រាន់
ច្បាស់លាស់ អំពីបញ្ហាព្រំដែន ដែលអាចក្តាប់ឲ្យបាននូវបញ្ហាដែលកើតឡើង។
No comments:
Post a Comment