យោងតាមសេចក្តីជូនព័ត៌មានរបស់ក្រសួងការបរទេស
និងសហប្រតិបត្តិការអន្តរជាតិ ថ្ងៃទី០២ កក្កដា ឆ្នាំ២០១៥ បានបញ្ជាក់ថា ក្នុងអំឡុងពេលទស្សនកិច្ចផ្លូវការនៅព្រះរាជាណាចក្រថៃ
ឯកឧត្តមឧបនាយករដ្ឋមន្ត្រី ហោ ណាំហុង នឹងអញ្ជើញចូលរួមក្នុងពិធីប្រគល់វត្ថុបុរាណខ្មែរចំនួន
១៦ ជូនដល់កម្ពុជា ដោយភាគីថៃ។
ការអញ្ជើញទៅបំពេញទស្សនៈកិច្ចផ្លូវការរបស់
ឯកឧត្តមឧបនាយករដ្ឋមន្ត្រី ហោ ណាំហុង រដ្ឋមន្ត្រីការបរទេស និងសហប្រតិបត្តិការអន្តរជាតិនៃព្រះរាជាណាចក្រកម្ពុជា
គឺតបតាមការអញ្ជើញរបស់ឯកឧត្តមឧត្តមសេនីយ៍ ថាណៈសាក់ ប៉ាទិម៉ាប្រាកន ឧបនាយករដ្ឋមន្ត្រី
រដ្ឋមន្ត្រីការបរទេស នៃព្រះរាជាណាចក្រថៃ។
ដំណើរទស្សនកិច្ចផ្លូវការនៅប្រទេសថៃនេះ គឺចាប់ពីថ្ងៃទី១០ ដល់ថ្ងៃទី១២
ខែកក្កដា ឆ្នាំ២០១៥ ក្នុងគោលបំណងទំនាក់ទំនងប្រទេសទាំងពីរឲ្យកាន់តែស៊ីជំរៅលើគ្រប់វិស័យបន្ថែមទៀត។
សេចក្តីជូនព័ត៌មានបានបន្ថែមថា ដោយទស្សនកិច្ចផ្លូវការនេះស្របពេលនឹងខួបលើកពី៦៥
នៃទំនាក់ទំនងការទូតរវាងប្រទេសទាំងពីរ។ ឯកឧត្តម ហោ ណាំហុង នឹងជួបសំដែងការគួរសមជាមួយឯកឧត្តម
ឧត្តមសេនីយ៍ ប្រាយុទ្ធ ច័ន្ទអូចា នាយករដ្ឋមន្ត្រីនៃព្រះរាជាណាចក្រថៃ និងជួបពិភាក្សាទ្វេភាគីជាមួយឯកឧត្តម
ឧត្តមសេនីយ៍ ថាណៈសាក់ ប៉ាទិម៉ាប្រាកន។
គួរបញ្ជាក់ផងដែរថា គណៈប្រតិភូអមដំណើររួមមាន
ឯកឧត្តម វ៉ា គឹមហុង ទេសរដ្ឋមន្ត្រីទទួលបន្ទុកកិច្ចការព្រំដែន និងលោកជំទាវ
ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ។
No comments:
Post a Comment