យុទ្ធនាការចុះមូលដ្ឋានយ៉ាងតក់ក្រហល់របស់ថ្នាក់ដឹកនាំគណបក្សប្រឆាំង និងការផ្ញើសារខ្លាំងៗ វាយប្រហារ លាបព៌ណ និងចោទប្រកាន់មកលើគេឯង ថា ជាអាយ៉ងអ្នកនេះជាអាយ៉ងអ្នកនោះ គឺក្នុងគោលបំណងតែម៉្យាងគត់ដែលគេដឹងថាបក្សប្រឆាំងប្រឹងបង្កើនល្បឿន ដើម្បីទប់ស្កាត់មិនឲ្យមានការបោះឆ្នោតតាមបែបប្រជាធិបតេយ្យ សេរីពហុបក្ស និងអាចថា ជាការភ័យព្រួយពីការបាត់បង់ប្រជាប្រីយភាពរបស់ខ្លួនតែប៉ុណ្ណោះ។
ប៉ុន្តែ សកម្មភាពកំរោលចូល និងការប្រើហិង្សាដោយពាក្យសម្តីមកលើគណបក្សកាន់អំណាច និងការទប់មិនឲ្យមានការបង្កើតគណបក្សតូចៗ រួមទាំងការប្រើវោហាស័ព្ទវាយប្រហារទៅលើបក្សតូចៗ ថា ដូចជាសម្រាម គឺបង្ហាញយ៉ាងច្បាស់ពីសារជាតិពិសពុលរបស់បក្សប្រឆាំងដែលភ្លេចកំណើតដើមរបស់ខ្លួន ក្នុងន័យថា អតីតកាលក្រុមមេដឹកនាំបក្សសង្គ្រោះជាតិបច្ចុប្បន្ន គឺសុទ្ធតែធ្លាប់ជាសមាជិកចូលរួមជាមួយគណបក្សហ៊ុន ស៊ីនប៉ិច ដែរនោះ។ នេះ មិនខុសអ្វីពីការប្រមាថ មេបា និងកំណើតខ្លួនឯងនោះឡើយ។
គេនៅចាំបានថា ក្រោយដឹងលទ្ធផលបោះឆ្នោតថា បក្សខ្លួនចាញ់ គណបក្សសង្គ្រោះជាតិ បានធ្វើពហិការ បដិសេធមិនទទួលស្គាល់លទ្ធផលឆ្នោត និងបានបង្កនូវភាពចលាចល តាមរយៈការបង្កើតព្រឹត្តិការណ៍ហិង្សានានានៅតាមដងផ្លូវ ដែលបណ្តាលឲ្យមានមនុស្សស្លាប់ និងរបួស និងការបាត់បង់ទ្រព្យសម្បត្តិសាធារណៈ និងឯកជនអស់ជាច្រើនម៉ឺនដុល្លារ លាយឡំជាមួយនិងការប៉ុនប៉ងធ្វើបដិវត្តពណ៌ ដើម្បីធ្វើរដ្ឋប្រហារទម្លាក់រាជរដ្ឋាភិបាលស្របច្បាប់របស់លោក ហ៊ុន សែន ដោយការដើរស្រែកអាក្រោក ដូចជា ហ៊ុន សែន អើយចុះចេញទៅជាដើម។ ជាងនេះទៅទៀត បបូរមាត់របស់បក្សប្រឆាំង បានបំភ័ន្តសាធារណៈមតិជាតិ និងអន្តរជាតិ ដោយចោទប្រកាន់ថា រាជរដ្ឋាភិបាលរបស់លោក ហ៊ុន សែន និងរដ្ឋសភា ជាសភាឯកបក្ស ខណៈដែលការបោះឆ្នោតកាលពីឆ្នាំ២០១៣ មានគណបក្សនយោបាយចំនួន៨ចូលរួមប្រកួតប្រជែង។
បក្សប្រឆាំង បានជ្រើសយកវប្បធម៌ភូតហើយ ភូតទៀត ភូតភកុហក ធ្វើជាមធ្យោបាយបំពុលសាធារណមតិ អំពី ពាក្យថា ឯកបក្ស ៗ ជាប់រហូតមក ប៉ុន្តែនៅពេលពួកគេបោកប្រជាពលរដ្ឋអស់ស្នៀត ក្នុងល្បិចតថ្លៃតំណែង បានស្ថិតនៅកាន់តែឆ្ងាយពីផ្លូវច្បាប់ និងអាចនាំឲ្យវឹកវរក្នុងសង្គមកាន់តែខ្លាំង ក៏សុខចិត្តដើរចូលសភា ទាំងបំពានសម្បថនៅឯខេត្តសៀមរាប និងបច្ចុប្បន្នមេដឹកនាំទាំងពីររូបបានទទួលដំណែងខ្ពស់ៗក្នុងរដ្ឋសភា ខណៈដែលអ្នកតស៊ូធ្វើបាតុកម្មស្ថិតក្នុងការបាក់ស្បាតដោយចាញ់កលឃោសនាបោកប្រាស់ និងខូចខាតអស់ទ្រព្យសម្បត្តិក្នុងគ្រួសារជាច្រើន។
និយាយមកបរិបត់ថ្មី នៅពេលនេះ សួរថា « ហេតុអ្វីក៏គណបក្សប្រឆាំងភ័យខ្លាច នឹងការចូលរួមរបស់គណបក្សនយោបាយតូចៗទៅវិញ? តើ ស្មារតីដើមរបស់ខ្លួន ដែលចង់បានសេរីពហុបក្ស ពួកគេទុកនៅទីណា ហេតុអ្វីបានជាពួកគេ ជ្រើសរើសយករបៀបផ្តាច់ការ និងចង់វិលត្រឡប់ទៅរកឯកបក្ស ខុសពីគោលការណ៍ច្បាប់ ដូចមានចែងនៅក្នុងរដ្ឋធម្មនុញ្ញទៅវិញ? សន្លឹកបៀនេះ មិនអាចលេងក្នុងពេលនេះបានទៀតទេ ក្នុងន័យថា បក្សកាន់អំណាចគេបានស្គាល់ស្នៀតនោះ និងបានកាច់បំបាក់ហើយ។
ប៉ុន្តែ ផ្ទុយទៅវិញចរិតផ្តាច់ការនេះ ត្រូវគណបក្សប្រឆាំងខ្លួនឯង គឺជាអ្នកយកមកអនុវត្តន៍មុនគេ នៅស្របពេលដែលរាជរដ្ឋាភិបាលដឹកនាំដោយ គណបក្សប្រជាជនកម្ពុជា បាននិងកំពុងលើកតម្កើងឲ្យមានការចូលរួមនយោបាយពីបក្សដទៃឲ្យបានច្រើន ក្នុងស្មារតី ដើម្បីដំណើរការប្រព្រឹត្តទៅដោយសេរី ត្រឹមត្រូវ យុត្តិធម៌ តាមការបោះឆ្នោតដែលមានលក្ខណៈសេរីពហុបក្សនៅកម្ពុជា។
បក្សប្រឆាំងដែលតែងប្រកាសសម្ញែងខ្លួនឯងថាជាគណបក្សប្រជាធិបតេយ្យ ប៉ុន្តែ របៀបនៃការដឹកនាំ គឺបែរជាមានចរិតផ្តាច់ការទៅវិញ ។ ឯណាទៅជាសុចរិតភាពក្នុងឋានៈជាគណបក្សនយោបាយដែលថា យកប្រជាពលរដ្ឋជាធំ? ការពិត បក្សប្រឆាំង បាននិងកំពុងបោកប្រជារាស្ត្រទាំងស្រស់ៗ និងគ្មាននូវមនសិការស្រឡាញ់ជាតិដោយស្មោះឡើយ។ មានការទំលាយនូវរឿងរ៉ាវមួយចំនួនក្នុងបក្ស ដូចជា ការកិបកេងកាន់កាប់លុយមូលនិធិក្នុងបក្សដោយលោក កឹម សុខា និងបក្ខពួក ការឈរឈ្មោះដើម្បីទទួលតំណែងធំៗ នៅក្នុងរដ្ឋសភាក្តី ឬជាប្រធានសភាភាគតិចក្តី គឺក្រៅអំពីខ្លួនឯងគ្មានឲ្យនរណាទាំងអស់ និងការជាប់ពាក់ព័ន្ធនឹងអំពើពុករលួយលុយរាប់លានដុល្លារ គឺអាចផ្តើមចេញពីមហិច្ឆតារបស់មេបក្សទាំងពីរ កឹម សុខា និងសម រង្ស៊ី ហ្នឹងឯង គឺពួកគាត់បានស្ម័គ្រចិត្តដើរតាមលទ្ធិផ្តាច់ការ និងបក្ខពួកនិយមគ្រប់កាលៈទេសៈ រីឯសកម្មភាពខាងក្រៅមើលទៅពួកគាត់ដូចជាបុគ្គលស្អាតស្អំ ប៉ុន្តែ សារជាតិពិត គឺស្អុយគគ្រុក។
ការរៀបរាប់ទាំងអស់នេះ គឺជាចំនុចត្រួសៗនៃយុទ្ធសាស្ត្រក្តោបអំណាច បើនរណាហ៊ាននិយាយការពិតត្រូវតែគេបណ្តេញចេញពីបក្ស ។ ក្នុងបញ្ហានេះ មានលោកស្រី ឡាក់ សុភាព ជាឧទាហរណ៍ស្រាប់។ ចរិតដឹកនាំផ្តាច់ការ និងគ្មានគោលការណ៍ច្បាស់លាស់នេះហើយ ត្រូវបានមន្ត្រីអង្គការសង្គមស៊ីវិលមួយចំនួនដែលធ្លាប់តែគ្រាំទ្រ ក្រោយដឹងថា ចាញ់ឧបាយកលប្រជាភិថុតិ គេក៏លែងគ្រាំទ្រ និងពួកគេក៏មានចលនាបង្កើតគណបក្សថ្មីដោយខ្លួនឯងដែរ។ ប៉ុន្តែ រឿងដ៏ចំលែកនោះគឺនៅពេលសកម្មភាពបង្កើតគណបក្សមូលដ្ឋាន បាននិងកំពុងប្រព្រឹត្តទៅ បក្សប្រឆាំងបែរជាចាត់ទុកពួកនោះថា ជាសត្រូវរបស់ខ្លួនទៅវិញ គឺបានន័យថា « អ្នកណាក៏ដោយ បើមិនរណបខ្លួន មិនគ្រាំទ្រខ្លួន គឺត្រូវចោទថាជា «អាយ៉ង»អ្នកនេះអ្នកនោះ»។
ការរៀបរាប់ទាំងនេះ គឺជាការលាបពណ៌ទៅលើគណបក្សដទៃ ដើម្បីលាក់បាំងនូវអំពើអាក្រក់របស់ខ្លួនដែលមានពាក់ព័ន្ធទៅនឹងការធ្វើប្រជាភិថុតិ ភូតកុហក អំពើពុករលួយនានា ក្នុងយុទ្ធនាការឃោសនាបោះឆ្នោតកន្លងមក តាមរយៈការសន្យាខ្យល់ ដោយភ្ជាប់នូវសកម្មភាពញុះញង់អោយមានការរើសអើងជាតិសាសន៍ ថែមទាំងដុតបញ្ឆេះកំហឹងអោយមានហឹង្សាលុបបំបាត់វប្បធម៌សន្ទនានូវអ្វីដែលខ្លួនបានសន្យាចំពោះមុខ អ្នកតំណាងប្រជាពលរដ្ឋនៅក្នុងរដ្ឋសភាកាលពីពេលកន្លងមក។
នយោបាយរបស់បក្សប្រឆាំងដែលមិនចង់ឲ្យបក្សដទៃដំណើរការបានដោយសេរី និងពហុបក្ស និងថា មានតែគណបក្សខ្លួន ទើបមានសមត្ថភាពដឹកនាំប្រទេស គឺត្រូវបានមជ្ឈដ្ឋានទូរទៅវាយតម្លៃថា គណបក្សប្រឆាំង គឺជាគណបក្សផ្តាច់ការ គ្មានជំហរដឹកនាំច្បាស់លាស់ ទើបជាហេតុបណ្តាលមានចរន្តនៃការចាកចេញពីបក្ស ចុះចូលជាមួយគណបក្សកាន់អំណាច ។ ដូចនេះ គណបក្សប្រឆាំងមិនអាចយកគណបក្សដទៃ ឬយកអ្នកដែលមិនគ្រាំទ្រ មកចាប់ធ្វើជាចំណាប់ខ្មាំងគណបក្សនយោបាយរបស់ខ្លួននោះទេ ពីព្រោះ សិទ្ធិសេរីភាពនៅក្នុងការបង្កើតគណបក្សនយោបាយ គឺជាការអនុវត្តស្របតាមរដ្ឋធម្មនុញ្ញ ក្នុងមាត្រា៥១ ចែងថា «ព្រះរាជាណាចក្រកម្ពុជា អនុវត្តនយោបាយប្រជាធិបតេយ្យសេរីពហុបក្ស ហើយប្រជាពលរដ្ឋខ្មែរ ជាម្ចាស់វាសនានៃប្រទេសជាតិរបស់ខ្លួន» យោងលើមាត្រានេះ បានបញ្ជាក់យ៉ាងច្បាស់ថាកម្ពុជាចាំចាច់ត្រូវមានគណបក្សនយោបាយច្រើនចូលរួម គឺមិនអាចមានបក្សតែមួយ និងពីរបក្សមកធ្វើការប្រកួតប្រជែងគ្នាបាននោះទេ។
បើទោះបីគណបក្សប្រឆាំង កំពុងខិតខំប្រឹងប្រែងឃោសនានៅតាមមូលដ្ឋានដោយប្រើហេតុផល បំផ្លាញសេរីពហុបក្ស បំផ្លាញវប្បធម៌សន្ទនា ដើម្បីបង្ខំអោយគេគ្រាំទ្រខ្លួនទាំងទទឹងទិស ក៏ដោយ ប៉ុន្តែ នយោបាយផ្ទុយពីរដ្ឋធម្មនុញ្ញ គឺលទ្ធផលនឹងអាចនាំឲ្យបក្សប្រឆាំងធ្លាក់ប្រជាប្រីយភាពកាន់តែខ្លាំង។ « គ្មាននរណាមួយសុខចិត្តដើរតាមមេបក្សនយោបាយដែលគ្មានគោលជំហរច្បាស់លាស់ និងក៏មិនមាននរណាម្នាក់ខ្ចីដង្ហើមគេដកនោះទេ» បើពួកគេមានសមត្ថភាព និងមានសតិសម្បជញ្ញៈ ពេលវេលាបានផ្លាស់ប្តូរទស្សនរបស់ពួកគេ គឺពួកគេនឹងមិនចាញ់ឧបាយកលក្រុមប្រឆាំងទៀតឡើយ ប៉ុន្តែជាជំនួសវិញ គឺអ្នកមានឆន្ទៈទាំងនោះ បានយកឱកាសនេះ រួមចំណែកដោយផ្ទាល់ក្នុងការបង្កើតគណបក្សនយោបាយ ហើយការបង្កើតនូវគណបក្សនយោបាយច្រើន គឺត្រូវបានគណបក្សកាន់អំណាចសំដែងការស្វាគមន៍ ខុសអីតែគណបក្សប្រឆាំងចោទប្រកាន់ទៅអ្នកដែលជម្រុញឲ្យមានពហុបក្សបែរជាត្រូវចាត់ទុកថាជា«សត្រូវ» នេះបង្ហាញពីរូបភាពផ្តាច់ការ។
ដូចនេះ អ្នកដែលបំផ្លាញលទ្ធិប្រជាធិបតេយ្យ សេរីពហុបក្សនៅកម្ពុជា គឺអាចកើតចេញពីមហិច្ឆតាល្មោភអំណាចដ៏គ្មានព្រំដែនរបស់មេដឹកនាំគណបក្សប្រឆាំងនេះឯង ដែលពួកគេកំពុងតែយកគំរូមនុស្សជំពូកផ្តាច់ការនិយមជ្រុល ដែលជាការអនុវត្តច្បាប់ព្រៃ មកលុបបំបាត់ចោលនូវតម្លៃនីតិរដ្ឋ នៅកម្ពុជា។
សូមពលរដ្ឋខ្មែរពិចារណាឲ្យបានល្អិតល្អន់ចំពោះតម្លៃនៃសន្លឹកឆ្នោតរបស់ខ្លួន សម្រាប់អណត្តិខាងមុខ ដើម្បីបញ្ចៀសបាននូវការចាញ់ឧបាយកលបោកប្រាស់របស់អ្នកនយោបាយមួយចំនួន ៕
អត្ថបទៈ លី ចិន្តា ( អ្នកសិក្សាស្រាវជ្រាវគោលការណ៍នីតិរដ្ឋនៅកម្ពុជា)
No comments:
Post a Comment