នៅរាត្រីថ្ងៃទី១៩ធ្នូ
ឆ្នាំ២០១៥ ឯកឧត្តម ប្រាយុទ្ធ ចាន់អូចារ នាយករដ្ឋមន្រ្តីថៃ និងជាប្រធាន កិច្ចប្រជុំកំពូល
នៃមហាអនុតំបន់មេគង្គលើកទី៥ និងលោកជំទាវ បានប្រារព្ធពិធីលាងសាយភោជន៍ជាមហាកិត្តិយសដ៏ខ្ពង់ខ្ពស់បំផុត
ជូនសម្តេចឯកឧត្តមបណ្តាប្រមុខរដ្ឋ-ប្រមុខរដ្ឋាភិបាលនៃបណ្តាប្រទេសក្នុងមហាអនុតំបន់មេគង្គ និងគណៈប្រតិភូ ដែលបានអញ្ជើញចូលរួមកិច្ចប្រជុំកំពូលមហាអនុតំបន់មេគង្គលើកទី៥
នៅទីក្រុងបាងកក ព្រះរាជាណាចក្រថៃ។
ប្រមុខរដ្ឋ
ប្រមុខរដ្ឋាភិបាល នៃប្រទេសមហាអនុតំបន់មេគង្គ ដែលបានអញ្ជើញចូល រួម ក្នុងពិធីលាងសាយភោជន៍ជាមហាកិត្តិយសនោះរួមមាន
សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា
ឯកឧត្តម លី ខឺឈាង នាយករដ្ឋមន្រ្តីចិន ឯកឧត្តម ថងស៊ីង ថាមម៉ាវង្ស នាយករដ្ឋមន្រ្តី
នៃសាធារណរដ្ឋប្រជាធិបតេយ្យប្រជាមានិតឡាវ
ឯកឧត្តម ថេន សេន ប្រធានាធិបតីនៃសាធារណរដ្ឋសហភាពមីយ៉ាន់ម៉ារ
ឯកឧត្តម ង្វៀន
តាន់យ៉ុង នាយករដ្ឋមន្រ្តី នៃសាធារណរដ្ឋសង្គមនិយមវៀតណាម ឯកឧត្តម ឡេ លឿងមិញ អគ្គលេខាធិការអាស៊ាន។
ថ្លែងទៅកាន់មេដឹកនាំ
នៃប្រទេសក្នុងមហាអនុតំពន់មេគង្គ ឯកឧត្តម ប្រាយុទ្ធ ចាន់អូចារ នាយករដ្ឋមន្រ្តីថៃ
និងជាប្រធានកិច្ចប្រជុំកំពូល នៃមហាអនុតំបន់មេគង្គលើកទី៥ មានប្រសាសន៍ថ្លែងនូវអំណរគុណយ៉ាងជ្រាលជ្រៅបំផុត ជូនចំពោះសម្តេច ឯកឧត្តមប្រមុខរដ្ឋ
ប្រមុខរដ្ឋាភិបាល និងគណៈប្រតិភូទាំងអស់
នៃបណ្តាប្រទេសក្នុងមហាអនុតំបន់មេគង្គ ដែលបានចំណាយនូវពេលវេលាដ៏មានតំលៃបំផុត
អញ្ជើញ មកចូលរួមកិច្ចប្រជុំកំពូលមហាអនុតំបន់មេគង្គលើកទី៥
នៅទីក្រុងបាងកកដ៏បវរនៃព្រះរាជាណាចក្រថៃ។
ឯកឧត្តមឧត្តមសេនីយ៍មានប្រសាសន៍បន្តថា
ឯកឧត្តមផ្ទាល់ក៏ដូចជាប្រជាពលរដ្ឋថៃទាំងអស់ មានការរីករាយខ្លាំងណាស់ ក្នុងការធ្វើគារវកិច្ចស្វាគមន៍ចំពោះវត្តមានរបស់បន្តាប្រមុខរដ្ឋ
ប្រមុខរដ្ឋាភិបាល និងប្រតិភូទាំងអស់ នៃប្រទេសក្នុងមហាអនុតំបន់មេគង្គ
ដែលបានខិតខំពុះពារនូវរាល់ការលំបាកគ្រប់បែបយ៉ាង
ក្នុងការសំរេចបាននូវសមិទ្ធផលដ៏ធំធេង បន្ទាប់ពីកិច្ចប្រជុំកំពូលមហាអនុតំបន់មេគង្គលើកទី៤
ដែលបានបញ្ចប់ទៅប្រកបដោយលទ្ធផលដ៏ត្រចះត្រចង់បំផុត។
ឯកឧត្តមឧត្តមសេនីយ៍មានប្រសាសន៍បញ្ជាក់បន្ថែម ថា ថ្ងៃនេះយើងទាំងអស់គ្នាបានមកជួបជុំគ្នា
ក្នុងព្រឹត្តិការណ៍ជាប្រវត្តិសាស្រ្ត នៃកិច្ចប្រជុំកំពូលមហាអនុតំបន់មេគង្គលើកទី៥
ដើម្បីផ្លាស់ប្តូរយោបល់លើវិធីសាស្រ្ត ក្នុងការពង្រឹងភាពជាដៃគូរបស់យើង
ដើម្បីគាំទ្រដល់កិច្ចសហប្រតិបត្តិការរបស់ប្រទេស ក្នុងមហាអនុតំបន់មេគង្គ។
ឯកឧត្តមប្រធានកិច្ចប្រជុំកំពូលលើកទី៥
បានធ្វើការកត់សំគាល់នៅក្នុងសុន្ទរកថាគន្លឹៈនោះថា
ចាប់តាំងពីការចាប់ផ្តើមក្នុងឆ្នាំ១៩៩២ កម្មវិធីកិច្ច សហប្រតិបត្តិការនៃប្រទេស GMS សម្រេចបាននូវភាពជោគជ័យយ៉ាងធំធេង។
ដៃគូអភិវឌ្ឍន៍នានាបានសហការជាមួយប្រទេស GMS ក្នុងការបង្កើតការតភ្ជាប់ក្នុងតំបន់
ពិសេសជម្រុញឲ្យមានការប្រកួតប្រជែង និងបង្កើតស្មារតីសហគមន៍ឲ្យបានច្រើនជាងមុន។
ឯកឧត្តមប្រធានមានប្រសាសន៍បន្ថែមថា ចាប់តាំងពីឆ្នាំ ១៩៩៣ដល់ឆ្នាំ២០១៣
ដៃគូអភិវឌ្ឍន៍បានរួមចំណែកជាទឹកប្រាក់សរុប ១២ពាន់២០០លានដុល្លាអាមេរិក
សម្រាប់គម្រោងវិនិយោគ និងទឹកប្រាក់ចំនួន៣១១លានដុល្លា សម្រាប់គម្រោងជំនួយបច្ចេកទេស។
ក្រៅពីការផ្តល់ជំនួយផ្នែកហិរញ្ញវត្ថុដ៏ច្រើននោះ
ការគាំទ្ររបស់ដៃគូអភិវឌ្ឍន៍ក៏ធ្វើឡើងក្នុងទ្រង់ទ្រាយផ្សេងៗ ដូចជាការផ្តល់ចំណេះដឹង
ការណែនាំអំពីគោលនយោបាយ និងអភិវឌ្ឍក្រមនវានុវត្តន៍សម្រាប់កិច្ចសហប្រតិបត្តិការ និងការអភិវឌ្ឍក្នុងតំបន់៕
No comments:
Post a Comment