រដ្ឋមន្ត្រីក្រសួងការងារ ​ស្នើដល់ប្រធាន​មន្ទីរដែល​ទើបនឹងតែង​តាំងថ្មី​ ត្រូវយកចិត្ត​ទុកដាក់​ក្នុងការបំពេញការងារតាមតួនាទីភារកិច្ចខ្លួនឱ្យបានល្អ

នាថ្ងៃទី២៧ ខែមេសា ឆ្នាំ២០១៧ លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នៅសាលារាជធានីភ្នំពេញ បានអញ្ជើញជាអធិបតីក្នុងពិធីប្រកាសចូលកាន់ មុខតំណែងលោក ជួន វិឌ្ឍី ប្រធានមន្ទីរការងារ និងបណ្តុះ បណ្តាលវិជ្ជាជីវៈរាជធានីភ្នំពេញជំនួសលោក នូ នឹម ដែលត្រូវចូលនិវត្តន៍។

លោករដ្ឋមន្ត្រីបានមានប្រសាសន៍ថា រាជរដ្ឋាភិបាលបានដាក់ចេញនូវយុទ្ធសាស្រ្តចតុកោណដំណាក់កាលទី៣ ដើម្បីកំណើន ការងារ សមធម៌ និងប្រសិទ្ធភាពនៅកម្ពុជា ដោយផ្តោតការយកចិត្តទុកដាក់យ៉ាងខ្លាំងលើគ្រប់វិស័យ ជាពិសេសការអភិវឌ្ឍន៍វិស័យការងារ និងបណ្តុះបណ្តាលវិជ្ជាជីវៈ សំដៅធ្វើឱ្យប្រសើរឡើងនូវលក្ខខណ្ឌការងារ បង្កើនឱកាសការងារ ពង្រឹងសុខដុមរមនានៃទំនាក់ទំនងវិជ្ជាជីវៈ និងពង្រឹងការបណ្តុះបណ្តាលបច្ចេកទេស និងវិជ្ជាជីវៈ ឱ្យសមស្របតាមតម្រូវការទីផ្សារការងារ ដើម្បីចូលរួមចំណែកក្នុងការកាត់បន្ថយភាពក្រីក្រ លើកស្ទួយជីវភាពប្រជាពលរដ្ឋ និងអភិវឌ្ឍសេដ្ឋកិច្ចប្រកបដោយចីរភាព ធ្វើឱ្យកម្ពុជា បានឈានដល់ដំណាក់កាលនៃការប្រែ

ប្រួលរចនាសម្ព័ន្ធសេដ្ឋកិច្ច ពីប្រទេសដែលពឹងផ្អែកលើវិស័យកសិកម្ម ទៅជាប្រទេសដែលពឹងផ្អែកលើវិស័យឧស្សាហកម្ម ព្រមទាំងកំពុងឈានទៅសម្រេចឋានៈជាប្រទេសដែលមានចំណូលកម្រិតមធ្យមនាពេលដ៏ខ្លីខាងមុខនេះ។

រដ្ឋមន្ត្រីក្រសួងការងារ បានបន្ថែមទៀតថា ដើម្បីផ្សារភ្ជាប់ជាមួយនឹងកម្មវិធីកែទម្រង់ស៊ីជម្រៅស្របតាមយុទ្ធសាស្រ្តចតុកោណដំណាក់កាលទី៣ របស់រាជរដ្ឋាភិបាលនីតិកាលទី៥ នៃរដ្ឋសភា ក្រសួងការងារ និងបណ្តុះបណ្តាលវិជ្ជាជីវៈ បានដាក់ចេញនូវផែនការយុទ្ធសាស្រ្តអភិវឌ្ឍវិស័យការងារ និងបណ្តុះបណ្តាលវិជ្ជាជីវៈ រយៈពេល ៥ ឆ្នាំ “២០១៤-២០១៨” ដោយប្រមូលផ្តុំលើអាទិភាព៥ រួមមាន៖ ទី១-ការអភិវឌ្ឍលក្ខខណ្ឌការងារ និងសុខដុមនីយកម្មក្នុងទំនាក់ទំនងវិជ្ជាជីវៈ ទី២-ការអភិវឌ្ឍការអប់រំ បណ្តុះបណ្តាលបច្ចេកទេស និងវិជ្ជាជីវៈ ទី៣-ការអភិវឌ្ឍមុខរបរ និងការងារ ទី៤-ការអភិវឌ្ឍរបបសន្តិសុខសង្គមសម្រាប់ជនទាំងឡាយដែលស្ថិតនៅក្រោមបទបញ្ញត្តិនៃច្បាប់ស្តីពីការងា និងទី៥-ការពង្រឹងសេវាសាធារណៈល្អ ដោយអនុវត្តទទួលបានសមិទ្ធផលថ្មីៗជាដើម។

លោកក៏បានស្នើដល់ប្រធានមន្ទីរដែលទើបនឹងតែងតាំងថ្មី ត្រូវយកចិត្តទុកដាក់ក្នុងការបំពេញការងារតាមតួនាទីភារកិច្ចរៀងៗខ្លួនឱ្យបានល្អ និងត្រូវបន្តជំរុញកំណែទម្រង់អាទិភាពទាំង៥ នៃផែនការអភិវឌ្ឍវិស័យការងារ និងបណ្តុះបណ្តាលវិជ្ជាជីវៈ ឆ្នាំ២០១៤-២០១៨ឱ្យទទួលបានលទ្ធផលល្អប្រកបដោយប្រសិទ្ធភាពខ្ពស់ ត្រូវមានសាមគ្គីភាព ឯកភាពផ្ទៃក្នុងឱ្យបានល្អ៕

អភិបាលខេត្តស្វាយរៀង អញ្ជើញសំណេះសំណាលអបអរសាទរខួបអនុស្សាវរីយ៍លើកទី​១៣១ ​ទិវាពលកម្ម​អន្តរជាតិ​នៅតំបន់​សេដ្ឋកិច្ច​ពិសេស​មេនហាតធេន​ ស្ថិតក្នុង​ក្រុងបាវិត​

នៅថ្ងៃទី២៨ ខែមេសា ឆ្នាំ២០១៧នេះ លោក ម៉ែន វិបុល អភិបាល នៃគណៈអភិបាលខេត្តស្វាយរៀងបានអញ្ជើញជួបសំណេះសំណាលដើម្បីអបអរសាទរខួបអនុស្សាវរីយ៍លើកទី១៣១ ទិវាពលកម្មអន្តរជាតិនៅតំបន់សេដ្ឋកិច្ចពិសេសមេនហាតធេន ស្ថិតនៅក្រុងបាវិត ខេត្តស្វាយរៀង។

ក្នុងពិធីនេះ លោកអភិបាលខេត្ត បានអានសារលិខិតរបស់លោកនាយករដ្ឋមន្រ្តី ហ៊ុន សែន និងមានប្រសាសន៍សំណេះសំណាល ដោយបានបញ្ជាក់សង្កត់ធ្ងន់ថា សន្តិភាព ស្ថិរភាពនយោបាយ និងសន្តិសុខសណ្ដាប់សង្គម ដែលរាជរដ្ឋាភិបាលកម្ពុជា ក្រោមការដឹកនាំរបស់លោកនាយករដ្ឋមន្រ្តី ហ៊ុន សែន សម្រេច និងកសាងបានតាមរយៈគោលនយោបាយឈ្នះ-ឈ្នះ គឺជាមូលដ្ឋានគ្រឹះដ៏ចម្បងសម្រាប់ការអភិវឌ្ឍសេដ្ឋកិច្ចសង្គមបង្កើនការវិនិយោគ បង្កើតការងារធ្វើ លើកកម្ពស់កម្រិតជីវភាពរស់នៅរបស់ប្រជាពលរដ្ឋកាន់តែធូរធារ និងល្អប្រសើរឡើងជាលំដាប់។

ទន្ទឹមនេះ លោកអភិបាលខេត្ត ក៏បានផ្ដាំផ្ញើដល់បងប្អូនកម្មករ កម្មការិនី និងអ្នកពាក់ព័ន្ធទាំងអស់ត្រូវចូលគោរពច្បាប់ស្ដីការងារ ច្បាប់ស្ដីពីរបបសន្តិសុខសង្គម រក្សានូវសាមគ្គីភាពផ្ទៃក្នុង ចេះជួយគ្នាទៅវិញទៅមក និងទទួលខុសត្រូវលើភារកិច្ចការងាររបស់ខ្លួន ជាពិសេសខិតខំពង្រឹងភាពសុខុដុមរមនារវាងនិយោជក និងកម្មករនិយោជិត ដោយមិនត្រូវជឿលើការញុះញង់ពីជនខិលខូចមួយចំនួនដែលនាំឱ្យប៉ះពាល់ផលប្រយោជន៍របស់បងប្អូនកម្មករនិយោជិត និយោជកឡើយ ព្រមទាំងត្រូវចូលរួមគោរព និងអនុវត្តច្បាប់ចរាចរណ៍ផ្លូវគោកថ្មី ចៀសឱ្យឆ្ងាយពីគ្រឿងញៀន និងអញ្ជើញទៅបោះឆ្នោតជ្រើសរើសក្រុមប្រឹក្សាឃុំ សង្កាត់អាណត្តិទី៤ នៅថ្ងៃទី០៤ ខែមិថុនា ឆ្នាំ២០១៧ ខាងមុខនេះឱ្យបានគ្រប់ៗគ្នា ។

ក្នុងឱកាសនេះដែរ លោកអភិបាលខេត្ត បានចែកជូនកម្មករ កម្មការិនី ដែលចូលរួមក្នុងពិធីសំណេះសំណាលចំនួន ១២០០នាក់ ក្នុងម្នាក់ៗទទួលបានសារ៉ុង ១ និងថវិកា ១ម៉ឺនរៀល និងបានអញ្ជើញទៅទស្សនា និងពិនិត្យមើល ពីសង្វាក់ផលិតកម្មនៅរោងចក្រកាត់ដេរសម្លៀកបំពាក់ ជីហ្វាអេសផងដែរ ៕

ក្រសួង​បរិស្ថាន រៀប​ចំកិច្ចប្រ​ជុំស្តីពី​សេ​ចក្តី​ព្រាងទ្វេ​ភាគី កម្ពុជា-រុស្ស៊ី លើ​កិច្ចសហ​ប្រតិ​បត្តិការក្នុង​ការប្រើ​ប្រាស់​ថាម​ពលនុយ​ក្លែអ៊ែ

នាទីស្តីការក្រសួងបរិស្ថាន នៅថ្ងៃទី២៧ ខែមេសា ឆ្នាំ២០១៧ នាយកដ្ឋានវិទ្យាសាស្រ្ត និងបច្ចេកវិទ្យា នៃអគ្គលេខាធិការដ្ឋានក្រុមប្រឹក្សាជាតិអភិវឌ្ឍន៍ដោយចីរភាព បានរៀបចំកិច្ចប្រជុំពិគ្រោះយោបល់ កម្ពុជា-រុស្ស៊ីស្តីពីសេចក្តីព្រាងទ្វេភាគីកម្ពុជា-រុស្ស៊ី លើកិច្ចសហប្រតិបត្តិការក្នុងការប្រើប្រាស់ថាមពលនុយក្លែអ៊ែ សម្រាប់បម្រើឱ្យគោលបំណងសន្តិភាពក្រោមការដឹកនាំរបស់លោក ទិន ពន្លក អគ្គលេខាធិការក្រុមប្រឹក្សាជាតិអភិវឌ្ឍន៍ដោយចីរភាព (ក.ជ.អ.ច.) និងជាសហប្រធានក្រុមការងាររួមកម្ពុជា-រុស្ស៊ី និង លោក Todeson Sergey អនុប្រធាននាយកដ្ឋានកិច្ចសហប្រតិបត្តិការអន្តរជាតិ នៃសាជីវកម្មថាមពលបរមាណូរដ្ឋ (Rosatom) និងជាប្រធានគណៈប្រតិភូរុស្ស៊ី។

សូមជម្រាបផងដែរថា កិច្ចប្រជុំនេះមានការចូលរួមពីភាគីរុស្ស៊ី ចំនួន ៦នាក់ និងភាគីកម្ពុជាចំនួន ១៥នាក់ ដែលជាសមាជិកក្រុមការងាររួមកម្ពុជា-រុស្ស៊ី តំណាងស្ថានទូតសហព័ន្ធរុស្ស៊ីប្រចាំកម្ពុជា ក្រុមលេខាធិការដ្ឋាន និងថ្នាក់ដឹកនាំនៃអគ្គលេខាធិការដ្ឋាន ក.ជ.អ.ច.។
គោលបំណងនៃកិច្ចប្រជុំនេះ គឺដើម្បីពិនិត្យ និងពិភាក្សាទៅលើសេចក្តីពា្រងចុងក្រោយ នៃកិច្ចព្រមព្រៀងរវាងរាជរដ្ឋាភិបាលកម្ពុជា និងរដ្ឋាភិបាលសហព័ន្ធរុស្ស៊ី ស្តីពីកិច្ចសហប្រតិបត្តិការក្នុងវិស័យនៃការប្រើប្រាស់ថាមពលនុយក្លែអ៊ែ សម្រាប់បម្រើឱ្យគោលបំណងសន្តិភាព និងការត្រៀមរៀបចំនីតិវិធីចុះហត្ថលេខារវាងរដ្ឋាភិបាលប្រទេសទាំងពីរ នាពេលខាងមុខ។
បន្ទាប់ពីបានស្វាគមន៍ និងពិភាក្សាលើសេក្តីព្រាងនៃកិច្ចព្រមព្រៀងភាគីទាំងពីរ បានឯកភាពគ្នា ចាប់ផ្តើមអនុម័តលើនីតិវិធីផ្ទៃក្នុងនៃកិច្ចព្រមព្រៀង។ ខ្លឹមសារនៃកិច្ចព្រមព្រៀងជាច្រើនត្រូវបានកែសម្រួលឡើងវិញ ដូចនេះ Rosatom និង ក.ជ.អ.ច.ត្រូវតែរៀបចំបញ្ចប់ការពិគ្រោះយោបល់ជាមួយស្ថាប័នពាក់ព័ន្ធ ដើម្បីឈានទៅការចុះហត្ថលេខាទ្វេភាគី នៅក្នុងអំឡុងពេលកិច្ចប្រជុំអន្តររដ្ឋាភិបាល កម្ពុជា-រុស្ស៊ីលើកទី១០ ស្តីពី ពាណិជ្ជកម្ម សេដ្ឋកិច្ច និងកិច្ចសហប្រតិបត្តិការវិទ្យាសាស្រ្ត និងបច្ចេកទេស នៅទីក្រុងម៉ូស្គូ សហព័ន្ធរុស្ស៊ី នៅថ្ងៃទី២៣ ខែសីហា ឆ្នាំ២០១៧។
ក្រោយពីកិច្ចប្រជុំបច្ចេកទេសនេះ លោក សាយ សំអាល់ រដ្ឋមន្រ្តីក្រសួងបរិស្ថាន និងជាប្រធាន ក.ជ.អ.ច. បានទទួលជួបស្វាគមន៍គណៈប្រតិភូរុស្ស៊ី និងពិភាក្សាការងារ ក្នុងឱកាសអាហាររួមគ្នាថ្ងៃត្រង់ ដោយលោកបានគូសបញ្ជាក់អំពីសារៈសំខាន់នៃកិច្ចព្រមព្រៀងនេះសម្រាប់កម្ពុជា ទាំងក្នុងទិដ្ឋភាពសេដ្ឋកិច្ច និងនយោបាយ ដោយបញ្ជាក់អំពីជំហានថ្មីមួយក្នុងដំណើរអភិវឌ្ឍ របស់ជាតិចេញពី ស្ថានភាពជាប្រទេសអភិវឌ្ឍតិចតួច ទៅជាប្រទេសចំណូលមធ្យមកម្រិតទាប៕

លោក វេង សាខុន ចុះជួបសំណេះសំណាលជាមួយប្រជាពលរដ្ឋនៅស្រុកកំពង់សៀម

នៅថ្ងៃទី២៨ ខែមេសា ឆ្នាំ២០១៧នេះ នៅវត្តគគរ ភូមិគគរ២ ឃុំគគរ ស្រុកកំពង់សៀម ខេត្តកំពង់ចាម លោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងារថ្នាក់ជាតិចុះមូលដ្ឋានស្រុកកំពង់សៀម ខេត្តកំពង់ចាម បានអញ្ជើញជាអធិបតីភាពក្នុងវេទិកាសាធារណៈរបស់ក្រុមការងារថ្នាក់ជាតិចុះមូលដ្ឋាន ដើម្បីត្រួតពិនិត្យ និងគាំទ្រការអនុវត្តកម្មវិធីនយោបាយ និងយុទ្ធសាស្ត្រចតុកោណតំណាក់កាលទី៣ របស់រាជរដ្ឋាភិបាល ដោយមានការចូលរួមពីប្រជាពលរដ្ឋចំនួន ២ឃុំ ចំនួន ១៤០០នាក់។

នាឱកាសនោះផងដែរ លោករដ្ឋមន្រ្តីបានលើកទ្បើងពីការវិវឌ្ឍនៃសង្គមសេដ្ឋកិច្ច និងផែនការអភិវឌ្ឍនានា ជាពិសេសការអភិវឌ្ឍហេដ្ឋរចនាសម្ព័ន្ធ ផ្លូវថ្នល់ ប្រព័ន្ធធារាសាស្រ្ត និងការតភ្ជាប់បណ្តាញអគ្គីសនី។
នៅក្នុងឱកាសវេទិកានេះ ប្រជាពលរដ្ឋរស់នៅក្នុង ឃុំគគរ និងឃុំកោះទន្ទឹម ស្រុកកំពង់សៀម ខេត្តកំពង់ចាម បានលើកឡើងនូវបញ្ហាប្រឈម ដូចជា បញ្ហាខូចខាតផ្លូវលំ សំណើស្តារប្រឡាយ ជួសជុលសាលារៀន និងវត្តអារាម និងរថយន្តសង្រ្គោះបន្ទាន់។ ជាការឆ្លើយតប លោករដ្ឋមន្រ្តី បានដោះស្រាយជូនទៅតាមសំណូមពររបស់ប្រជាពលរដ្ឋ និងចាត់ឱ្យក្រុមការងារបន្តតាមដានចំពោះការអនុវត្តសំណើទាំងអស់ឱ្យមានប្រសិទ្ធភាព៕

ស្អែកនេះ លោកនាយករដ្ឋមន្រ្តី ហ៊ុន សែន ចូលរួមក្នុងកិច្ចប្រជុំកំពូលអាស៊ានលើកទី៣០ នៅទីក្រុងម៉ានីឡា ក្រោមមូលបទ «រួមគ្នាជាដៃគូ ដើម្បីធ្វើការផ្លាស់ប្តូរ រួមចំណែកជាមួយពិភពលោក»

នៅព្រឹកថ្ងៃទី២៨ ខែមេសា ឆ្នាំ២០១៧នេះ លោកនាយករដ្ឋមន្រ្តី ហ៊ុន សែន បានដឹកនាំគណៈ ប្រតិភូជាន់ខ្ពស់ទៅចូលរួមក្នុងកិច្ចប្រជុំកំពូលអាស៊ានលើកទី៣០ នៅទីក្រុងម៉ានីឡា ប្រទេសហ្វីលីពីន ក្រោមមូលបទ «រួមគ្នាជាដៃគូ ដើម្បីធ្វើការផ្លាស់ប្តូរ រួមចំណែកជាមួយពិភពលោក» ដែលនឹងមានការពិភាក្សា និងផ្លាស់ប្តូរទស្សនៈ លើបញ្ហាជាសារវ័ន្តនានា ដែលអាស៊ាន និងពិភពលោកកំពុងប្រឈម ដើម្បីលើកតម្កើងសន្តិភាព សន្តិសុខ និងវិបុលភាពសម្រាប់តំបន់ និងពិភពលោកដែលនឹងប្រព្រឹត្តទៅនៅថ្ងៃទី ២៩ ខែមេសា ឆ្នាំ២០១៧។
នៅក្នុងក្របខ័ណ្ឌកិច្ចប្រជុំកំពូលអាស៊ានលើកទី៣០នេះ លោក ហ៊ុន សែន នឹងជួបថ្នាក់ដឹកនាំអាស៊ាន តំណាងអន្តរសភាអាស៊ាន និងតំណាងយុវជនអាស៊ានផងដែរ ក្នុងពេលដែលអាស៊ានប្រារព្ធខួបលើកទី៥០ នៅឆ្នាំ២០១៧នេះ៕

សហរដ្ឋអាមេរិក ​មានគំរោង​នឹងស្នើសុំ​ឱ្យបិទបេសកកម្ម​ការទូត​ទាំងអស់​របស់កូរ៉េ​ខាងជើង​ នៅទូទំាងពិភពលោក នៅអំឡុងកិច្ចប្រជុំពិសេសនៃក្រុមប្រឹក្សាសន្តិសុខ UN

បើតាមអ្នកនាំពាក្យក្រសួងការបរទេសអាមេរិក ដកស្រង់ដោយទីភ្នាក់ងារសារព័ត៌មានយ៉ុនហាប់ នៅព្រឹកថ្ងៃសុក្រ ទី២៨ ខែមេសា ឆ្នាំ២០១៧នេះបានឱ្យដឹងថា សហរដ្ឋអាមេរិកមានគំរោងនឹងស្នើសុំឱ្យបិទបេសកកម្មការទូតទាំងអស់របស់កូរ៉េខាងជើង នៅទូទំាងពិភពលោក នៅអំឡុងកិច្ចប្រជុំពិសេស នៃក្រុមប្រឹក្សាសន្តិសុខ UN ដែលនឹងប្រព្រឹត្តទៅនៅថ្ងៃសុក្រសប្ដាហ៍នេះ (ម៉ោងនៅក្នុងទីក្រុងញូយ៉ក)។

យោងតាមអ្នកនាំពាក្យក្រសួងការបរទេសអាមេរិក លោក Mark Toner បានឱ្យដឹងថា រដ្ឋមន្រ្តីការបរទេសអាមេរិក លោក រិច ធីល្លឺសុន នឹងធ្វើជាប្រធានដឹកនាំកិច្ចប្រជុំពិសេសថ្នាក់រដ្ឋមន្ត្រីនៃក្រុមប្រឹក្សាសន្តិសុខ ដើម្បីពិភាក្សាលើសំណុំរឿងនុយក្លេអ៊ែរកូរ៉ខាងជើង នៅក្នុងក្របខ័ណ្ឌនៃការពង្រឹងការគាំទ្រពីអន្តរជាតិ បង្កើនការដាក់សម្ពាធលើទីក្រុងព្យុងយ៉ាង សម្រាប់កម្មវិធីនុយក្លេអ៊ែរ និងមីស៊ីលផោ្លង។

លោក Mark Toner បានបន្តទៀតថា មានជម្រើសជាច្រើន ក៏ប៉ុន្តែក្នុងចំណោមជម្រើសទំាងនេះ ក៏មានការដាក់ទណ្ឌកម្ម ហើយការធ្វើឱ្យឯកោនៃការទូតកូរ៉េខាងជើង ក៏ជាមធ្យោបាយមួយផងដែរ។ ដោយឡែកឆ្លើយតបទៅនឹងសំណួរអ្នកសារព័ត៌មានដែលសួរថា តើទណ្ឌកម្មទំាងនោះរួមមានការបិទបេសកកម្មការទូតកូរ៉េខាងជើង នៅទូទំាងពិភពលោកដែរឬទេ? អ្នកនាំពាក្យរូបនេះបានតបថា មាន។ បើតាមសម្តីលោក Mark Toner គំនិតនេះ គឺជាជម្រើសមួយក្នុងមធ្យោបាយ ដែលអាចនឹងត្រូវធ្វើឡើងក្រោមវិធានការយ៉ាងតឹងរឹងបំផុត។

គួររំលឹកថា កាលពីខែកញ្ញា ឆ្នាំ២០១៦ សហរដ្ឋអាមេរិកធ្លាប់បានស្នើសុំឱ្យបណ្ដាប្រទេសជុំវិញពិភពលោក កាត់បន្ថយ ឬក៏កាត់ផ្ដាច់ទំនាក់ទំនងការទូតជាមួយកូរ៉េខាងជើង បន្ទាប់ពីទីក្រុងព្យុងយ៉ាងសាកល្បងអាវុធនុយក្លែអ៊ែជាលើកទី០៥ ក្នុងឆ្នាំដដែល។ ក៏ប៉ុន្តែផ្អែកលើស្ថានភាពជាក់ស្ដែង បើគ្មានជំនួយពីចិនគេពិបាកនឹងដោះស្រាយជាមួយកូរ៉េខាងជើងណាស់ ត្បិតចិនមានសិទ្ធិវេតូ និងតែងតែការពាររបបដឹកនាំទីក្រុងព្យុងយ៉ាងជានិច្ច បើទោះជាខ្លួនសម្រេចចិត្តដាក់ទណ្ឌកម្មខ្លះ លើសម្ព័ន្ធមិត្តយូរអង្វែងមួយនេះក៏ដោយ៕

កាកបាទក្រហមកម្ពុជា បានរៀបចំពិធីបិទវគ្គយល់ដឹងមូលដ្ឋានជូនដល់ទីប្រឹក្សាយុវជន និងយុវជនកាកបាទក្រហមកម្ពុជា

កាកបាទក្រហមកម្ពុជារាជធានីភ្នំពេញ នៅល្ងាចថ្ងៃទី ២៧ ខែមេសា ឆ្នាំ២០១៧នេះ នៅអនុវិទ្យាល័យទួលស្លែង សាខាកាកបាទក្រហមកម្ពុជារាជធានី បានរៀបចំពិធីបិទវគ្គយល់ដឹងមូលដ្ឋានជូនដល់ទីប្រឹក្សាយុវជន និងយុវជនកាកបាទក្រហមកម្ពុជា ប្រចាំអនុវិទ្យាល័យសរុបចំនួន ៥៩នាក់ (ស្រី២៩នាក់) ដោយបានការចូលរួមជាអធិបតីពី លោក ឈាវ ប៊ុន នាយករងអនុវិទ្យាល័យ ដែលវគ្គយល់ដឹងនេះបានចាប់ដំណើរការអស់រយៈពេល ១ថ្ងៃកន្លងមក ប្រកបដោយជោគជ័យ ជាលទ្ធផលយុវជនទទួលបាននិទ្ទេសល្អចំនួន ៧០ភាគរយ និងមធ្យម៣០ភាគរយ ។

ក្នុងឱកាសនោះ លោកនាយករងអនុវិទ្យាល័យ បានថ្លែងអំណរគុណយ៉ាងជ្រាលជ្រៅចំពោះសាខាកាកបាទក្រហមកម្ពុជា រាជធានីភ្នំពេញ ដែលបានមកធ្វើការបើកវគ្គយល់ដឹងមូលដ្ឋានជូនដល់យុវជនកាកបាទក្រហម ប្រចាំអនុវិទ្យាល័យរបស់លោក។ លោកនាយករងសង្ឃឹម និងជឿជាក់ថា បន្ទាប់ពីឆ្លងកាត់វគ្គយល់ដឹងនេះ ហើយក្មួយៗពិតជាបានយល់ច្បាស់ពីប្រវត្តិចលនាបដិរូប គោលការណ៍គ្រឹះទាំង៧, តួនាទីភារកិច្ចយុវជនកាកបាទក្រហម, ការគ្រប់គ្រងគ្រោះមហន្តរាយ, ច្បាប់ចរាចរណ៍ និងវិជ្ជាសង្គ្រោះបឋម ។ល។ ដែលជាមុខវិជ្ជាមូលដ្ឋានសម្រាប់ជាគ្រឹះឱ្យក្មួយៗ យកទៅអនុវត្តសំដៅជួយដល់ជនរងគ្រោះ និងងាយរងគ្រោះគ្រប់ប្រភេទ ក៏ដូចជាកម្មវិធីមិត្តអប់រំមិត្ត ៕