ពិធីចែកអំណោយមនុស្សធម៌ដល់សិស្សានុសិស្ស និងជនចាស់ជរាជួបទុក្ខលំបាកក្នុងភូមិពោធិ៍

កំពង់ឆ្នាំង៖ នៅថ្ងៃទី១៨ ខែធ្នូ ឆ្នាំ២០១៩នេះ លោកស្រី ដោក សុទ្ធា ទីប្រឹក្សារាជរដ្ឋាភិបាល និងលោកស្រី ឈឹម ស្រីមុំ ឈួរច័ន្ទឌឿន ភរិយាអភិបាលខេត្ត និងមានការនិមន្តចូលរួមពីព្រះមង្គលា​នុរ័ក្ខ អំសៃ ព្រះរាជាថ្នាក់កិត្តិយសជំនួយការសម្តេចព្រះអគ្គមហាសង្ឃរាជាធិបតី កិត្តិឧទ្ទេសបណ្ឌិត ទេព វង្ស សម្តេចព្រះសង្ឃរាជ នៃព្រះរាជាណាចក្រកម្ពុជា ព្រះអង្គ សរ បញ្ញាឬទ្ធិ លោកស្រី ឡុញ ពិសា អនុប្រធានមន្ទីរប្រៃសនីយ៍ និងទូរគមនាគមន៍ខេត្ត សប្បុរសជនមកពីរាជធានីភ្នំពេញ អាជ្ញាធរ មេឃុំ មេភូមិ បាននាំយកគ្រឿងឧបភោគបរិភោគ សម្ភារប្រើប្រាស់ និងថវិកា ជូនដល់ចាស់ជរា ជួបការលំបាក ចំនួន១០គ្រួសារ ស្ថិតក្នុងភូមិពោធិ៍ ឃុំពោធិ៍ ស្រុកកំពង់លែង ខេត្តកំពង់ឆ្នាំង។

អំណោយចែកជូនចាស់ជរាក្នុងឱកាសនោះ ក្នុង ១គ្រួសារ ទទួលបាន៖ អង្ករ ៥០គីឡូក្រាម មី ១កេះ ទឹកស៊ីអីវ ១យួរ ទឹកត្រី ១យួរ ត្រីខ ១យួរ សម្លៀកបំពាក់ ១សម្រាប់ ព្រមទាំងថវិកាចំនួន ៧៥.០០០រៀល។

បន្ទាប់មកលោកស្រី និងក្រុមការងារ បានជួបសំណេះសំណាលជាមួយអ្នកគ្រូ និងសិស្សានុសិសិ្សចំនួន ៥០នាក់ នៅក្លិបកុមារស្ថិតក្នុងឃុំពោធិ៍ ស្រុកកំពង់លែង ខេត្តកំពង់ឆ្នាំង។ សិស្សានុសិស្សក្រីក្រចំនួន ៥០នាក់ ក្នុងម្នាក់ៗទទួលបាន សៀវភៅ ខ្មៅដៃ ប៊ិច នំ និងថវិកា ៥ពាន់រៀលផងដែរ។ នៅក្នុងឱកាសនោះ លោកស្រី ព្រមទាំងក្រុមការងារ និងសប្បុរសជន បានចែកជូនដល់អ្នកគ្រូ ១៨​ម៉ឺនរៀល អាជ្ញាធរដែនដីថវិកាចំនួន ១៥ម៉ឺនរៀល៕