នៅក្នុងឱកាសទទួលជួបសវនាការជាមួយលោក បេកេតហ្សាន ហ្សូម៉ាខាណូវ (Beketzhan Zhumakhanov) ឯកអគ្គរដ្ឋទូត នៃសាធារណរដ្ឋកាហ្សាក់ស្ថាន នៅព្រឹកថ្ងៃទី១៤ ខែមីនាឆ្នាំ២០១៩ នៅវិមានរដ្ឋសភា លោក ហេង សំរិន ប្រធានរដ្ឋសភា បានស្នើដល់លោកឯកអគ្គរដ្ឋទូត ជួយផ្សព្វផ្សាយ លើកទឹកចិត្តឱ្យអ្នកវិនិយោគ និងប្រជាជនកាហ្សាក់ ស្ថាន មកពិនិត្យឱកាសវិនិយោគ និងធ្វើទេសចរណ៍ កម្សាន្តនៅកម្ពុជា ឱ្យបានច្រើនបន្ថែមទៀត ដើម្បីផ្សារភ្ជាប់ទំនាក់ទំនងរវាងប្រជាជន និងប្រជាជន នៃប្រទេសទំាងពីរឱ្យកាន់តែជិតស្និទ្ធ។
ប្រធានរដ្ឋសភាកម្ពុជា បានស្វាគមន៍យ៉ាងកក់ក្តៅចំពោះ វត្តមានបេសកកម្មរបស់លោក បេកេតហ្សាន ហ្សូម៉ាខាណូវ នៅកម្ពុជាដោយបានលើកឡើងថា កាហ្សាក់ស្ថាន និងកម្ពុជា មានទំនាក់ទំនងការទូតជាមួយគ្នាដ៏យូរលង់រហូតជាង៦ទសវត្សរ៍ ហើយសព្វថ្ងៃត្រូវបានពង្រឹង និងពង្រីកជាបន្តបន្ទាប់។
លោកបានសង្កត់ធ្ងន់ថា បេសកកម្មរបស់លោកឯកអគ្គរដ្ឋទូត នៅកម្ពុជានាពេលនេះ មានសារៈសំខាន់ខ្លាំងណាស់ សម្រាប់ប្រទេសទាំងពីរ កម្ពុជា-កាហ្សាក់ស្ថាន ក្នុងការបន្តពង្រឹង និងពង្រីកកិច្ចសហប្រតិបត្តិការជាមួយគ្នា ទាំងក្នុងក្របខណ្ឌនីតិប្បញ្ញត្តិ និងនីតិប្រតិបត្តិ។
លោក បេកេតហ្សាន ហ្សូម៉ាខាណូវ បានគំាទ្រចំពោះប្រសាសន៍លើកឡើង របស់ប្រធានរដ្ឋសភាកម្ពុជា និងបានគូសបញ្ជាក់ថានៅក្នុងបេសកកម្មការ ទូតរបស់លោកនៅកម្ពុជា លោក នឹងខិតខំលើកកម្ពស់ទំនាក់ទំនងប្រទេស ទំាងពីរឱ្យបានរឹងមាំបន្ថែមទៀត ទំាងស្ថាប័ននីតិប្បញ្ញត្តិ និងនីតិប្រតិបត្តិ។
នៅក្នុងឱកាសនេះដែរ លោកឯកអគ្គរដ្ឋ បានប្រគល់ជូននូវលិខិតអញ្ជើញ របស់ ប្រធានរដ្ឋសភាម៉ាជីលីស កាហ្សាក់ស្ថាន ប្រធានសភាឌូម៉ារុស្ស៊ី និងប្រធានសភាសាធារណរដ្ឋកូរ៉េ ដែលគោរពអញ្ជើញ លោក ហេង សំរិន ចូលរួមក្នុងកិច្ចប្រជុំកម្រិតប្រធានសភា ប្រទេស អាស៊ី-អឺរ៉ុប លើកទី៤ ដែលកាហ្សាក់ស្ថានធ្វើជាម្ចាស់ផ្ទះនាពេលខាងមុខ។ លោក ហេង សំរិន បានទទួលយកការគោរពអញ្ជើញនេះ ដោយបានគូសបញ្ជាក់ថានឹងជូនដំណឹងជាផ្លូវការតាមរយៈការទូត នាពេលក្រោយ។
លោក ហេង សំរិន បានលើកឡើងថា សភាប្រទេសទំាងពីរបានធ្វើកិច្ច សហប្រតិបត្តិការជាមួយគ្នាជាហូហែរ តាមរយៈការចូលរួមវេទិកាសភា អន្តរជាតិផេ្សងៗ ដែលសភា ប្រទេសទាំងពីរជាសមាជិកជាមួយគ្នា មានជាអាទិ៍៖ អាយភីយូ (IPU) អេភីអេ (APA) និង អាសឹប (ASEP)…ជាដើម។ ឆ្លៀតឱកាសនោះ លោក បានគោរពអញ្ជើញសភា កាហ្សាក់ស្ថាន ចូលរួមកិច្ចប្រជុំ ASEP លើកទី១១ ដែលសភាកម្ពុជានឹងធ្វើជាម្ចាស់ផ្ទះ នៅឆ្នាំ២០២០ ខាងមុខនេះផងដែរ៕
No comments:
Post a Comment