អគ្គស្នងការរងនគរបាលជាតិ អញ្ជើញបិទសន្និបាតបូកសរុបការងារប្រចាំឆ្នាំរបស់ស្នងការ​ដ្ឋាន​នគរបាលខេត្តព្រះសីហនុ

ព្រះសីហនុ៖ នាយឧត្តមសេនីយ៍ ថោង លីម អគ្គស្នងការរងនគរបាលជាតិ និងលោក គង់ វិតាណៈ អភិបាលរងខេត្តព្រះសីហនុ អញ្ជើញបិទសន្និបាតបូកសរុបរបាយការណ៍លទ្ធផលកិច្ចប្រតិបត្តិការប្រចាំឆ្នាំ និងផ្សព្វផ្សាយទិសដៅការងារបន្តរបស់អគ្គស្នងការដ្ឋាននគរបាលជាតិ ព្រឹកថ្ងៃទី១៣ ខែមីនា ឆ្នាំ២០១៩នេះ នៅស្នងការដ្ឋាននគរបាលខេត្តព្រះសីហនុ។

លោកអភិបាលរងខេត្ត បានកោតសរសើរចំពោះស្នាដៃរបស់កងកម្លាំងនគរបាលខេត្ត បានខិតខំប្រឹងប្រែងបំពេញការងារភារកិច្ច ថែរក្សា ការពារសន្តិសុខ សណ្តាប់ធ្នាប់សាធារណៈបានល្អ ព្រមទាំងបានរំលឹកដាស់តឿនដល់កងកម្លាំងនគរបាល ត្រូវយកចិត្តទុកលើបញ្ហា សណ្តាប់ធ្នាប់សាធារណៈ ពិសេសការកកស្ទះចរាចរណ៍ ពង្រឹងការអនុវត្តច្បាប់ចរាចរណ៍ផ្លូវគោក។ ចំពោះករណី ជនបរទេសបើកបរយានយន្តដោយគ្មានប័ណ្ណបើកបរត្រូវរឹតបណ្តឹងការត្រួតពិនិត្យបន្ថែមទៀត ព្រមទាំងបន្តអនុវត្តនូវគោលនយោបាយភូមិ/ឃុំមានសុវត្ថិភាព ការ​គ្រប់គ្រងជនបរទេសអន្តោប្រវេសន៍ និងចូលរួមបង្ការទប់ស្កាត់ក្រុមបង្កភាពអធិបតេយ្យ រំលោភបំពានទន្ទ្រានកាន់កាប់ដីរបស់រដ្ឋ និងឯកជនរបស់ប្រជាពលរដ្ឋដែលមានប័ណ្ណកម្​មសិទ្ធិ​ស្របច្បាប់។

លោកអគ្គស្នងការរងនគរបាលជាតិ បានមានប្រសាសន៍ផ្តាំផ្ញើដល់កងកម្លាំងនគរបាល ព្រមទាំងលើកឡើងអំពីសភាពការណ៍សន្តិសុខ នយោបាយក្នុងប្រទេស និងសកម្មភាពក្រុមប្រឆាំង ដែលមានឧបាយកលទុច្ចរិត ញុះញង់បំផ្លាញដល់សន្តិសុខជាតិ។ លោកក៏បានធ្វើការណែនាំឱ្យកងកម្លាំងនគរបាល ត្រូវយកចិត្តទុកដាក់លើការងារសន្តិសុខ សុវត្ថិភាពជូនប្រជាពលរដ្ឋ ភ្ញៀវទេសចរជាតិ និងអន្តរជាតិ ពិសេសត្រូវស្រាវជ្រាវមុខសញ្ញាបងតូច បងធំ បញ្ហាគ្រឿងញៀននៅតាមភូមិសាស្ត្រនានាក្នុងខេត្ត ដើម្បីមានវិធានការទប់ស្កាត់ និងបង្ការ បង្ក្រាបបានទាន់ពេលវេលា។

លោកបានបន្ថែមទៀតថា កងកម្លាំងនគរបាលត្រូវក្តាប់នូវសភាពការណ៍សន្តិសុខ នយោ​បាយ សណ្តាប់ធ្នាប់សង្គមឱ្យបានគ្រប់ជ្រុងជ្រោយ ដើម្បីរាយការណ៍ជូនថ្នាក់ដឹកនាំ ដាក់ចេញនូវវិធានការទប់ស្កាត់ឱ្យបានទាន់ពេលវេលា និងចូលរួមអនុវត្តគោលនយោបាយប្រឡងប្រណាំងភូមិ/ឃុំមានសុវត្ថិភាព ធានានូវសេចក្តីសុខប្រជាពលរដ្ឋទូទាំងខេត្តព្រះសីហនុ​ផង​ដែរ៕