ក្រុមបាល់ទាត់ជម្រើសជាតិកម្ពុជា ប៉ះជាមួយម៉ាឡេស៊ី នៅពហុកីឡដ្ឋានជាតិ នាល្ងាចនេះ

ក្រុមបាល់ទាត់ជម្រើសជាតិកម្ពុជា នឹងបើកទ្វារពហុកីឡដ្ឋានជាតិទទួលក្រុមជម្រើសជាតិម៉ាឡេស៊ី ក្នុងជំនួបមិត្តភាពអន្ដរជាតិជាផ្លូវការ នាវេលាម៉ោង ៦៖៣០នាទីល្ងាចនេះ ហើយនេះគឺជាការប្រកួតដំបូងរបស់ក្រុមរហស្សនាមគោព្រៃកម្ពុជា ក្រោមការដឹកនាំរបស់គ្រូបង្វឹកថ្មី លោក Keisuke Honda ។

បើគិតចាប់ពីឆ្នាំ២០០៧ រហូតដល់បច្ចុប្បន្នក្រុមគោព្រៃកម្ពុជា មិនធ្លាប់មានប្រវត្តិឈ្នះ ឬស្មើម៉ាឡេស៊ីឡើយ តួយ៉ាងឆ្នាំ២០០៧ ចាញ់ម៉ាឡេស៊ី ៦-០ ក្នុងជំនួបមិត្តភាព, ឆ្នាំ២០១២ ចាញ់ម៉ាឡេស៊ី ២-១ ក្នុងជំនួបមិត្តភាព, ឆ្នាំ២០១៤ ចាញ់ម៉ាឡេស៊ី ៤-១ ក្នុងជំនួបមិត្តភាព និងឆ្នាំ២០១៦ កម្ពុជា ចាញ់ម៉ាឡេស៊ី ៣-២ ក្នុងជំនួបពានរង្វាន់ AFF Suzuki Cup នៅលើទឹកដីមីយ៉ាន់ម៉ា ។

សូមជម្រាបផងដែរថា ក្រុមជម្រើសជាតិកម្ពុជា មិនត្រឹមតែផ្លាស់ប្ដូរគ្រូបង្វឹក ដឹកនាំដោយកីឡាករលំដាប់អន្ដរជាតិ Keisuke Honda នោះទេ សូម្បីកីឡាករក៏មានការផ្លាស់ប្ដូរច្រើនផងដែរ ជាក់ស្ដែងកីឡាករ ចាន់ វឌ្ឍនាកា ដែលជាអ្នកទាត់បំប៉ោងសំណាញ់ទីក្រុមម៉ាឡេស៊ី ២គ្រាប់ម្នាក់ឯង កាលពីឆ្នាំ២០១៦ ក៏មិនមានវត្តមានដែរ ព្រោះតែបញ្ហារបួស ។

យ៉ាងណាមិញលោក Honda នៅតែមានជំនឿចិត្តខ្ពស់លើកូនក្រុមខ្លួន នឹងធ្វើបានល្អ នៅក្នុងការប្រកួតមិត្តភាពល្ងាចនេះ ទោះបីលោកចាត់ទុកក្រុមម៉ាឡេស៊ី គឺជាក្រុមខ្លាំងមួយក្នុងតំបន់ក៏ដោយ ។ នេះបើតាមការលើកឡើងក្នុងសន្និសីទសារព័ត៌មាន មុនការប្រកួតកាលពីម្សិលមិញ៕