លោកនាយករដ្ឋមន្រ្តី ហ៊ុន សែន៖ ប្រជាពលរដ្ឋនឹងបន្តបោះឆ្នោតគាំទ្រគណបក្សប្រជាជនកម្ពុជាឱ្យដឹកនាំប្រទេស

នៅថ្ងៃទី២៣ ខែកក្កដា ឆ្នាំ២០១៨ លោកនាយករដ្ឋមន្រ្តី ហ៊ុន សែន បានបញ្ជាក់នៅក្នុងទំព័រហ្វេសប៊ុកថា ប្រជាពលរដ្ឋខ្មែរភាគច្រើនលើសលុប​បំផុតបោះឆ្នោតគាំទ្រគណបក្សប្រជាជនកម្ពុជាឱ្យដឹក​នាំប្រទេស ព្រោះប្រជាពលរដ្ឋចង់រស់នៅក្រោមម្លប់សន្តិភាពយូរអង្វែង។

លោកនាយករដ្ឋមន្រ្តី ហ៊ុន សែន បានសរសេរនៅក្នុងហ្វេសប៊ុកថា «នៅសល់តែ៦ថ្ងៃទៀតប៉ុណ្ណោះ ថ្ងៃបោះឆ្នោតជាតិជាប្រវត្តិសាស្រ្តនឹងមកដល់! ជាការពិត គឺប្រជាពលរដ្ឋខ្មែរភាគច្រើនលើសលុប​បំផុតបោះឆ្នោតគាំទ្រគណបក្សប្រជាជនអោយដឹក​នាំប្រទេស ព្រោះពលរដ្ឋចង់រស់នៅក្រោមម្លប់សន្តិភាពយូរអង្វែង។ គណបក្សប្រជាជន គឺជារបស់ពលរដ្ឋខ្មែរ​គ្រប់ៗ​រូប​។ គណបក្សប្រជាជនកម្ពុជាយើងឈ្នះ គឺកម្ពុជាឈ្នះទាំងអស់គ្នា!»

លោកនាយករដ្ឋមន្រ្តី ហ៊ុន សែន បានគូសបញ្ជាក់ថា ដើម្បីកម្ពុជាយើងឈ្នះទាំងអស់គ្នា គឺសូមបងប្អូនកូនក្មួយទៅបោះឆ្នោតគាំទ្រ គណបក្សប្រជាជនកម្ពុជា លេខរៀងទី​ ២០​ នៅថ្ងៃទី ២៩ កក្កដា ២០១៨ ខាងមុខនេះ! លោក និងភរិយា ក៏សូមអរគុណ និងជូនពរបងប្អូនជនរួមជាតិជួបតែសេចក្តីសុខនិងសំណាងល្អគ្រប់ៗគ្នាផងដែរ៕