ក្រសួងធនធានទឹក៖ ទឹកជំនន់ទន្លេសេសាន នៅផ្នែកខាងលើបានចាប់ផ្តើមស្រកចុះ តែផ្នែកខាងក្រោម នៅតែបន្តកើនឡើងលើសកម្រិតប្រកាសអាសន្ន

រតនគិរី៖ ក្រសួងធនធានទឹក និងឧតុនិយម បានបញ្ជាក់ថា គិតត្រឹមម៉ោង៦ព្រឹក ថ្ងៃទី២៤ ខែកក្កដា ឆ្នាំ២០១៨នេះ ទឹកទន្លេសេសាននៅផ្នែកខាងលើ ចំណុចឃុំសេសាន ស្រុកអូរយ៉ាដាវ បានចាប់ផ្តើមស្រក​ចុះវិញហើយ ខណៈនៅផ្នែកខាងក្រោម ចំណុចឃុំកាចូន ស្រុកវើនសៃ ទឹកបានបន្តកើនឡើងដល់កម្ពស់ ៩.៣៤ម៉ែត្រ គឺលើសកម្រិតប្រកាសឱ្យប្រុងប្រយ័ត្ន ១.៣៤ ម៉ែត្រ។

ក្រសួងបញ្ជាក់ទៀតថា ទឹកនៅផ្នែកខាងក្រោម នឹងបន្តកើនឡើងមួយកម្រិតបន្ថែមទៀត រួចនឹងចាប់ស្រកចុះ​វិញជាបន្តបន្ទាប់នៅរសៀលថ្ងៃនេះ។

សូមជម្រាបថា តំបន់មួយចំនួននៅក្នុងស្រុកចំនួន៤ នៅក្នុងខេត្តរតនគិរី ចាប់ជន់លិចដោយសារទឹកជំនន់​ពីទន្លេសេសាន។ ស្រុកដែលរងការជន់លិចនេះ រួមមាន៖ ស្រុកតាវែង ស្រុកអូរយ៉ាដាវ ស្រុកអណ្តូងមាស និងស្រុកវើនសៃ។ បន្ទាប់ពីការជន់លិចនេះអាជ្ញាធរ និងសមត្ថកិច្ចពាក់ព័ន្ធនៅក្នុងខេត្ត បានចុះអន្តរាគមន៍​ជម្លៀស ប្រជាពលរដ្ឋរកទីទួលសុវត្ថិភាពផងដែរ ៕