លោក សុខ ឥសាន៖ អ្នកក​សាងស​ន្តិភាព ប្តេជ្ញា​ការពារស​ន្តិភាព

នៅថ្ងៃទី០៣ ខែមីនា ឆ្នាំ២០១៧នេះ លោក សុខ ឥសាន អ្នកនាំពាក្យគណបក្សប្រជាជនកម្ពុជា បានបញ្ជាក់ជូនសាធារណជនឱ្យធ្វើការពិចារណាថា អ្នកកសាងសន្តិភាព ប្តេជ្ញាការពារសន្តិភាព។ លោក សុខ ឥសាន បានបញ្ជាក់ខ្លឹមសារដូចខាងក្រោម៖

ប្រជាជនកម្ពុជាគ្រប់រូបសុទ្ធតែបានដឹងទាំងអស់គ្នាថា សម្តេចតេជោ ហ៊ុន សែន គឺជាស្ថាបនិកសន្តិភាពសម្រាប់ប្រជាជនកម្ពុជា និងប្រទេសជាតិកម្ពុជា តែម្នាក់គត់ដែលស្ថិតនៅក្នុងអារម្មណ៍ចងចាំជានិច្ចរបស់ប្រជាជនកម្ពុជា។

មុនទទួលបានសន្តិភាពពេញលេញ ដែលប្រទេសជាតិយើងទទួលផលរហូតមកដល់បច្ចុប្បន្ននេះ គឺសម្តេចតេជោ និងថ្នាក់ដឹកនាំគណបក្សប្រជាជនកម្ពុជា បានបូជាអាយុជីវិត ហ៊ានបូជាសាច់ស្រស់ឈាមស្រស់ និងសតិបញ្ញា កម្លាំងកាយចិត្ត ពុះពារគ្រប់ឧបសគ្គលំបាកស្មុគ្រស្មាញ រហូតដល់សម្រេចជោគជ័យជាស្ថាពរ គឺ សន្តិភាពទាំងស្រុងជូនជាតិ មាតុភូមិនាឆ្នាំ១៩៩៨។

ដូច្នេះទម្រាំបានសន្តិភាព និងបានអ្វីៗ ដែលជាផលចេញពីសន្តិភាព មានការតស៊ូខ្លាំងក្លាណាស់ មិនមែនបានមកដោយចៃដន្យនោះឡើយ។ ដោយសន្តិភាពជាសំណូមពរចាំបាច់ និងដ៏ពិសិដ្ឋរបស់ប្រជាជន ទើបថ្នាក់ដឹកនាំគណបក្សប្រជាជនកម្ពុជា ប្តេជ្ញាការពារឱ្យបានដាច់ខាតនូវសន្តិភាព ដែលរកបានដោយកម្រនេះ ឱ្យស្ថិតនៅគង់វង្សជារៀងរហូត មិនអាចបណ្តែតបណ្តោយឱ្យជនណា ឬក្រុមជនណា ធ្វើឱ្យរង្គោះរង្គើរ ឬបាត់បង់បានជាដាច់ខាត ទោះក្នុងតម្លៃណាក៏ដោយ ត្រូវតែតស៊ូការពារឱ្យបាន។

នេះជាឧត្តមគតិមិនប្រែប្រួលរបស់គណបក្សប្រជាជនកម្ពុជា ដែលមានតាំងពីដើមរៀងមក ក៏ដូចតទៅអនាគតយូរអង្វែងទៀត។ ការប្តេជ្ញាដ៏មុតមាំរបស់គណបក្សប្រជាជនកម្ពុជាបែបនេះ គឺជាជួងបន្លឺប្រាប់រាល់មជ្ឈដ្ឋានប្រឆាំង ឱ្យយល់ច្បាស់ថាកុំធ្វើអ្វីនាំឱ្យប៉ះពាល់ដល់ស្ថិរភាពនៃសន្តិភាពឱ្យសោះ បើពុំនោះទេ នឹងទទួលរងនូវការឆ្លើយតបយ៉ាស័ក្តិសម ស្របតាមទំហំនៃអំពើរបស់ខ្លួន៕