ទំព័រ Facebook ផ្លូវការមួយចំនួនរបស់អាជ្ញាធរជាតិអប្សរា កំពុងត្រូវបានក្រុមចោរលួចចូលគ្រប់គ្រង

នៅក្នុងសេចក្តីប្រកាសព័ត៌មានរបស់អាជ្ញាធរជាតិអប្សរា ចុះថ្ងៃទី១៩ ខែកុម្ភៈ ឆ្នាំ២០១៧ បាន​បញ្ជាក់ថា អាជ្ញាធរជាតិអប្សរាមានកិត្តិយសសូមជម្រាបជូនដំណឹងដល់ប្រិយមិត្តអ្នកអាននិងសាធារណជនទាំងអស់ឱ្យបានជ្រាបថា តាំងពីព្រលឹមថ្ងៃទី១៨ ខែកុម្ភៈ ឆ្នាំ២០១៧ គេហទំព័រ Facebook ផ្លូវការរបស់អាជ្ញាធរជាតិអប្សរា រួមនឹង Facebook ពាក់ព័ន្ធមួយចំនួន ព្រមទាំងគណនី Facebook របស់មន្ត្រីអាជ្ញាធរជាតិអប្សរាផង ត្រូវបានក្រុមចោរលួចចូល និងគ្រប់​គ្រងទាំងស្រុង។

សេចក្តីប្រកាសព័ត៌មាន ក៏បានបញ្ជាក់ថា ប្រសិនបើមានការផ្សាយព័ត៌មានដែលធ្វើឱ្យប៉ះពាល់ដល់កិត្តិយស សេចក្តីថ្លៃថ្នូរ ឬប៉ះពាល់សន្តិសុខសណ្តាប់ធ្នាប់សង្គមផ្សេងៗនោះ គឺជាការបង្ខូចរបស់ក្រុមចោរដែលកំពុងកាន់កាប់តែប៉ុណ្ណោះ។

នៅ​ក្នុងសេចក្តីប្រកាកសព័ត៌មាន ក៏បានបញ្ជាក់ថា ក្នុងខណៈដែលក្រុមជំនាញអាជ្ញាធរជាតិអប្សរា កំពុងសហការជាមួយសមត្ថកិច្ចពាក់ព័ន្ធដើម្បីជួយដោះស្រាយបញ្ហានេះឱ្យបានទាន់ពេល សូមប្រិយមិត្តអ្នកអាន និងសាធារណជនទាំងអស់ មេត្តាជ្រាប និងកុំជឿលើការផ្សព្វ​ផ្សាយ​​​​ព័ត៌មានមិនពិតទាំងនោះឱ្យសោះ។ អាជ្ញាធរជាតិអប្សរា នឹងផ្តល់ដំណឹងជូនប្រិយមិត្តអ្នក​អាននិងសាធារណជនវិញ ក្រោយពេលដោះស្រាយបញ្ហានេះរួចរាល់៕