លោក សុខ ឥសាន ៖ មិនចូលប្រជុំរដ្ឋសភា

កាលពីល្ងាចថ្ងៃទី១៩ ខែកុម្ភៈ ឆ្នាំ២០១៧ អ្នកនាំពាក្យគណបក្សប្រជាជនកម្ពុជា លោក សុខ ឥសាន បានបញ្ចេញទស្សនៈមួយដែលមានចំណងជើងថា មិនចូលប្រជុំសភា ដែលមានខ្លឹមសារទាំងស្រុងដូចខាងក្រោម៖

តាំងពីចេះចាញ់ឆ្នោតមក គណបក្សសគ្រោះជាតិបានយកវប្បធម៌ពហិកា មិនចូលប្រជុំសភាជាញឹកញាប់ ដោយយកលេសនេះលេសនោះមកសំអាងបំភាន់សាធារណមតិ បិទបាំងការទទួលខុសត្រូវរបស់ខ្លួន ក្នុងនាមជាតំណាងរាស្ត្រទទួលអាណត្តិពីប្រជារាស្ត្រឲ្យធ្វេីការបំរេីរាស្ត្រ ។រដ្ឋសភាបេីកទ្វារជានិច្ច បេីមិនចូលប្រជុំទេ ប្រៀបដូចជាសិស្សគេចសាលា ដូច្នោះដែរ ។

ទោះបីគណបក្សប្រឆាំងធ្វេីពហិកាមិនចូលប្រជុំក្តី ក៏ការប្រជុំពេញអង្គវិសាមញ្ញអាចប្រព្រឹត្តទៅដោយរលូនដែរ ដោយមានចំនួនគ្រប់គ្រាន់តាមខ្លឹមសាររដ្ឋធម្មនុញ និងបទបញ្ជាផ្ទៃក្នុងរដ្ឋសភា ។ នេះហេីយជាឧត្តមភាព នៃគណបក្សឈ្នះឆ្នោត ។ ដូច្នេះហេីយបានជា គណៈបក្សប្រកួតប្រជែង ចង់បានការឈ្នះឆ្នោតណាស់ រហូតដល់គណបក្សខ្លះប្រេីឧបាយកលយ៉ាងពិសពុលឲ្យតែបានសំរេចបំណងឈ្នះឆ្នោតរបស់ខ្លួន ។ នេះបានហៅថាប្រជាធិបតេយ្យសេរីពហុបក្សមែន ៕