រាជធានីភ្នំពេញ បើកយុទ្ធនាការចលនាប្រឡងប្រណាំងសាលារៀនស្អាតនៅវិទ្យាល័យព្រះស៊ីសុវត្ថិ

(ភ្នំពេញ)៖ នៅថ្ងៃទី១២ ខែធ្នូ ឆ្នាំ២០១៦នេះ លោក មាន ចាន់យ៉ាដា អភិបាលរង នៃគណៈអភិបាលរាជធានីភ្នំពេញ  បានចូលរួមជាគណៈអធិបតីក្នុងពិធីបើកយុទ្ធនាការចលនាប្រឡងប្រណាំងសាលារៀនស្អាត ក្រោមវត្ដមាន លោក ហង់ ជួនណារ៉ុន រដ្ឋមន្ដ្រីក្រសួងអប់រំ យុវជន និងកីឡា នៅវិទ្យាល័យព្រះស៊ីសុវត្ថិ។

យុទ្ធនាការចលនាប្រឡងប្រណាំងសាលារៀនស្អាត គឺជាការជ្រើសរើសយកសាលារៀនដែលមានបរិស្ថានល្អ អនាម័យស្អាត និងបណ្ដុះផ្នត់គំនិតរបស់សិស្សានុសិស្ស និងបុគ្គលិកអប់រំ ឱ្យមានការយល់ដឹងពីបរិស្ថាន ស្រឡាញ់បរិស្ថាន ចេះថែរក្សា និងការពារបរិស្ថានជុំវិញខ្លួនឱ្យបានស្អាត។

លោកអភិបាលរងរាជធានីភ្នំពេញ ក៏បានអំពាវនាវដល់សិស្សានុសិស្ស និងប្រជាពលរដ្ឋដែលរស់នៅរាជធានីភ្នំពេញ ត្រូវយកចិត្តទុកដាក់ពីផលប៉ះពាល់ដែលបណ្ដាលមកពីបរិស្ថានមិនល្អ ការទុកដាក់សំរាម ការប្រើប្រាស់ថង់ផ្លាស្ទីក និងត្រូវបណ្ដុះស្មារតីទទួលខុសត្រូវ ដើម្បីឈានទៅរកសាលារៀនស្អាត ទីក្រុងស្អាត ដែលត្រូវផ្ដើមចេញពីយើងម្នាក់ៗ៕