គណៈកម្មាធិការជាតិគ្រប់គ្រងអភិវឌ្ឍន៍តំបន់ឆ្នេរសមុទ្រកម្ពុជា
នៅថ្ងៃច័ន្ទទី១៦ ខែឧសភា ឆ្នាំ២០១៦កន្លងទៅនេះ
បានសម្រេចបែងចែកតំបន់ឆ្នេរសមុទ្រកម្ពុជាជា៣ប្រភេទ ដើម្បីងាយស្រួលនៅក្នុងការរៀបចំសណ្តាប់ធ្នាប់
និងការគ្រប់គ្រង។ នេះបើតាមសេចក្តីសម្រេចនៅក្នុងកិច្ចប្រជុំ ដើម្បីគ្រប់គ្រង
និងអភិវឌ្ឍន៍តំបន់ឆេ្នរសមុទ្រខេត្តព្រះសីហនុ។
កិច្ចប្រជុំនេះ
បានធ្វើឡើងនៅទីស្តីការក្រសួងទេសចរណ៍ នាព្រឹកថ្ងៃទី១៦ ខែឧសភា ឆ្នាំ២០១៦កន្លងទៅនេះ
ដឹកនាំដោយ ឯកឧត្តមទេសរដ្ឋមន្ត្រី ជា សុផារ៉ា រដ្ឋមន្រ្តីក្រសួងរៀបចំដែនដី
នគរូបនីយកម្ម និងសំណង់ ដែលជាប្រធានគណៈកម្មាធិការជាតិគ្រប់គ្រង
និងអភិវឌ្ឍតំបន់ឆ្នេរសមុទ្រកម្ពុជា និង ឯកឧត្តម ថោង ខុន រដ្ឋមន្រ្តីក្រសួងទេសចរណ៍
និងជាអនុប្រធានអចិន្ត្រៃយ៍ គណៈកម្មាធិការជាតិគ្រប់គ្រង
និងអភិវឌ្ឍតំបន់ឆ្នេរសមុទ្រកម្ពុជា។
តាមសេចក្តីសម្រេចរបស់អង្គប្រជុំ
បានបែងចែកឆ្នេរសមុទ្រកម្ពុជា ជា៣រួមមាន៖ ទី១- ឆ្នេរសមុទ្រសាធារណៈរបស់រដ្ឋ
ទី២-ឆ្នេរសាធារណៈរបស់រដ្ឋ ដោយមានការចូលរួមពីវិស័យឯកជន និងទី៣-
ឆ្នេរកំសាន្តសាធារណៈរបស់រដ្ឋបែបប្រណិត។
លោក នី ផល្លី អគ្គលេខាធិការរងគណៈកម្មាធិការជាតិ គ្រប់គ្រងអភិវឌ្ឍន៍តំបន់ឆ្នេរសមុទ្រកម្ពុជា
បានឲ្យដឹងថា ក្រៅពីការពិភាក្សានិងកំណត់តំបន់ឆ្នេរសមុទ្រគណៈកម្មាធិការ ក៏បានពិភាក្សាអំពីការរៀបចំកែលម្អរតំបន់ឆ្នេរ
ឲ្យស្របតាមស្តង់ដាបទដ្ឋានគតិយុត្តិ និងការវាយតម្លៃឆ្នេររបស់កម្ពុជាយើង
ដើម្បីឲ្យក្លាយទៅជាឆ្នេរស្អាតមានសូចនាករ រួមទាំងការកំណត់យន្តការនៃការគ្រប់គ្រង
។ លោក នី ផល្លា ក៏បានបញ្ជាក់បន្ថែមឲ្យដឹងដែរថា កិច្ចពិភាក្សានោះក៏បានកំណត់នូវការរៀបចំខ្លោងទ្វារសម្រាប់ចូលកំសាន្តនៅឆ្នេរនីមួយៗ
ដោយមានដាក់ឈ្មោះ
ដើម្បីឲ្យសាធារណជនក៏ដូចជាទេសចរណ៍ស្គាល់ឈ្មោះរបស់ឆ្នេរកំសាន្តនីមួយៗ ។
ទន្ទឹមនោះ
កិច្ចប្រជុំក៏បានពិភាក្សានូវការរៀបចំសំណង់តូប នៅតាមតំបន់ឆ្នេរផងដែរ។ សូម
បញ្ជាក់ថា កិច្ចប្រជុំនោះបានពិភាក្សាលើបញ្ហាចំនួន៥ រួមមាន៖
១-បើករបងបាំងខឿនខណ្ឌព្រំដីតូបដែលលយចូលឆេ្នរសមុទ្រខុសពីការកំណត់
២-បើកច្រកធើ្វខ្លោងច្រកចូលដោយដាក់ឈោ្មះ (ឆេ្នរឯករាជ្យ ឆេ្នរអូរឈើទាល ឆេ្នរអូតេ្រះ...)
ដើម្បីឲ្យកូនខែ្មរសា្គល់ និងទេសចរណ៍ ព្រោះកន្លងមកចេះតែហៅឈ្មោះក្រុមហ៊ុនបរទេស,
ដើរត្រង់មិនបាន ព្រោះទើសតូប និងមើលមិនឃើញសម្រស់ និងលំហសមុទ្រ
៣-សម្រាប់ខ្លោងច្រកចូល សូមអំពាវនាវសប្បុរសជនចូលរួម ដោយអនុញាតឲ្យដាក់ឈោ្មះ
តែមិនទទួលក្រុមហ៊ុនផ្សាយបារី ឬគ្រឿងស្រវឹង ៤-អភិវឌ្ឍន៍តំបន់បៃតង និងបម្រែបម្រួលអាកាសធាតុ
និង៥/.លើកកម្ពស់ជីវភាពប្រជាជន និងបង្កើតការងារជូនយុវជន។
ឯកឧត្តមទេសរដ្ឋមន្ត្រី ជា សុផារ៉ា
រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ បានថ្លែងថា
សម្រាប់ការសាងសង់តូបកំសាន្ត និងខ្លោងទ្វារឆ្នេរទាំងអស់
នឹងមិនប្រើប្រាស់ថវិការបស់រដ្ឋនោះទេ គឺធ្វើឡើងតាមរយៈការអំពាវនាវសប្បុរសជនជួយសាងសង់ជំនួសវិញ៕
No comments:
Post a Comment