បរិបទសង្គមខ្មែរតែងឲ្យតម្លៃ
ឬមិនឲ្យតម្លៃមនុស្ស អាស្រ័យលើ អាក្បកិរិយា និងទង្វើដែលស្តែងចេញពីសកម្មភាព ស្របគ្នាជាមួយនឹងពាក្យសម្តី។
ប៉ុន្តែ សម្រាប់ជំពូកមនុស្សដែលស្តែងចេញនូវការនិយាយផ្សេង ធ្វើសកម្មភាពផ្សឹងវិញនោះគឺមិនត្រូវបានសង្គមចាត់ទុកថាជាមនុស្សថ្លៃថ្នូរនោះទេ។
យ៉ាងណាមិញ មនុស្សដែលនិយាយល្អ និយាយពិរោះ តែធ្វើអាក្រក់ ឬមិនធ្វើតាមអ្វីដែលខ្លួនបានសន្យានោះ
ត្រូវបានសង្គមខ្មែរចាត់ទុកថាជា «មនុស្សមានចិត្តជាទេវទត្ត មាត់ជាទេវតា» ។ ក៏ដូចគ្នានេះដែរ
ចំពោះមេដឹកនាំ ប្រសិនបើក្នុងសភាពមួយដែលដៃគូបាននិយាយល្អ និងធ្វើអំពើល្អចំពោះខ្លួន
ឬនិយាយល្អក្នុងកិច្ចព្រមព្រៀងជាមួយគ្នាហើយ តែបែរជាលួចវាយប្រហារដៃគូពីក្រោយខ្នងវិញ
គេហៅថាជាប្រភេទមេដឹកនាំក្បាលខូច ឬជាអ្នកនយោបាយប្រភេទ «ចាប់ដៃជាន់ជើង» ។
ក្រោយពេលមានកិច្ចព្រមព្រៀងនយោបាយថ្ងៃទី២២ ខែកក្កដា
ឆ្នាំ២០១៤ និងការបង្កើតឡើងនូវ «វប្បធម៌សន្ទនា» ក្នុងឆ្នាំ២០១៥ រវាងមេគណបក្សកាន់អំណាច និងមេគណបក្សប្រឆាំងរួចមក ទាំងពីរនាក់បានប្ដេជ្ញាថា
ត្រូវតែដោះស្រាយបញ្ហានយោបាយ និងបញ្ហាជាតិដោយសន្តិវិធី តាមរយៈការសន្ទនា និងចៀសវាងឲ្យបាននូវ« វប្បធម៌ចាប់ដៃជាន់ជើង» គ្នានេះ។
ចាប់ពីពេលនោះមក គេសង្កេតឃើញលោក
ហ៊ុន សែន ដែលជាមេបក្សកាន់អំណាចបានព្យាយាមម្តងហើយម្តងទៀត ក្នុងការរក្សាទំនាក់ទំនងល្អរវាងគណបក្សទាំងពីរឲ្យកាន់តែមានភាពស្និតស្នាល
ដើម្បីរួមគ្នាអភិវឌ្ឍន៍ប្រទេស។ ជាក់ស្តែងចាប់ពីពិធីបុណ្យចូលឆ្នាំខ្មែរ នៅខែមេសា
រហូតមកដល់ខែកក្កដា ឆ្នាំ២០១៥ លោក ហ៊ុន សែន បានបង្កើតព្រឹត្តិការណ៍ប្លែកៗជាច្រើនដើម្បីបង្កើនភាពស្និតស្នាលជាមួយលោក
សម រង្ស៊ី ក្នុងន័យលើកស្ទួយនូវអ្វីដែលបានចុះកិច្ចព្រមព្រៀងជាមួយគ្នាកន្លងមក។
រឿងដែលលេចធ្លោជាងគេនោះ
គឺលោក ហ៊ុន សែន បានបន្ទន់ឥរិយាបថយ៉ាងខ្លាំងក្នុងន័យបង្រួបបង្រួមជាតិ ធ្វើការជាមួយគ្នាដើម្បីអភិវឌ្ឍប្រទេស
និងដើម្បីបង្កើននូវការទុកចិត្តគ្នាដោយឈរលើ«វប្បធម៌សន្ទនា» រវាងបក្សកាន់អំណាច និងបក្សប្រឆាំង ហើយក៏ដើម្បីបង្ហាញសហគមន៍ជាតិ និងអន្តរជាតិ
ពីការប្ដេជ្ញាចិត្តអនុវត្តគំនិតផ្ដួចផ្ដើមនេះផងដែរ។
ការចូលរួមក្នុងពិធីអង្គរសង្ក្រាន្តយ៉ាងល្អូកល្អិន
និងសប្បាយរីករាយរួមគ្នា,
ការចូលរួមពិធីជួបជុំជាមួយពលករខ្មែរនៅប្រទេសម៉ាឡេស៊ី នាពេលកន្លងមក
និងថ្មីៗបំផុតនេះ គ្រួសាររបស់លោក ហ៊ុន សែន និងលោកសម រង្ស៊ី បានបង្កើតឱកាសពិសាបាយជុំគ្នានៅសណ្ឋាគារកាំបូឌីយ៉ាណា
កាលពីថ្ងៃទី១១ ខែកក្កដា ២០១៥ ដែលក្នុងនោះក៏បានបង្ហាញភាពស្និទ្ធស្នាលតាមរយៈការថតរូបទុកជាអនុស្សាវរីយ៍ជាមួយគ្នាទៀតផង។
ប៉ុន្តែ ការព្យាយាមធ្វើនូវអំពើល្អរបស់លោក
ហ៊ុន សែន ទាំងប៉ុន្មាន ត្រូវបានប្រជាពលរដ្ឋមើលឃើញថាលោក សម រង្ស៊ី យកមកធ្វើជាការកេងចំណេញនយោបាយសម្រាប់ខ្លួនឯងនិងគណបក្សទៅវិញ។
ក្រោយពីមានព្រឹត្តិការណ៍ជួបជុំគ្នាជាបន្តបន្ទាប់រួចមក
លោក សម រង្ស៊ី បែរជាយកវេទិកានោះទៅបកស្រាយជាមួយអ្នកកាសែតថា លោក ហ៊ុន សែន ហាក់បីដូចជាដឹងខ្លួនជាមុនថានឹងចាញ់ឆ្នោត
ដូច្នេះ ត្រូវរៀបចំការផ្ទេរអំណាចឲ្យគណបក្សសង្គ្រោះជាតិ ដោយសន្តិវិធី ដែលប្រការនេះជាការកេងចំណេញខាងនយោបាយលើគូសន្ទនា
និងមិនមែនជាទឹកចិត្តស្មោះ ភាតរភាព សុឆន្ទៈ របស់អ្នកនយោបាយឡើយ។
ប្រជាពលរដ្ឋក៏បានសង្កេតឃើញផងដែរថា
រឿងបញ្ហាព្រំដែនកន្លងមក គឺលោក សម រង្ស៊ី
មិនបានធ្វើសកម្មភាពចេញមុខជាចំហរទេ តែហាក់ដូចជាមានការបញ្ជាកូនចៅពីក្រោយឲ្យធ្វើសកម្មភាពអុកឡុក
ញុះញង់ប្រជាពលរដ្ឋទៅតវ៉ានៅតាមព្រំដែន និងបំភ្លៃការពិតលើបញ្ហាផែនទី ហើយយកលេសថា
ជាការសម្តែងមតិរបស់កូនចៅ មិនបានទាក់ទងនឹងការបញ្ជារបស់មេបក្សទេ ហើយពេលខ្លះបានសារភាពទៀតថា
គ្រប់គ្រងកូនចៅមិនបាន និយាយមិនស្តាប់ ។ល។
ចំណុចមួយទៀត ដែលធ្វើឲ្យលោក ហ៊ុន សែន កាន់តែក្តៅស្លឹកត្រចៀកនោះគឺការឃុបឃិតគ្នាប្រើឯកសារសាធារណៈក្លែង
ស្តីពីសន្ធិសញ្ញារវាងកម្ពុជា-វៀតណាម ថ្ងៃទី២៨ ខែកុម្ភៈ ឆ្នាំ១៩៧៩ ហើយបានធ្វើការផ្សព្វផ្សាយ
និងធ្វើអត្ថាធិប្បាយបំភ្លៃការពិត របៀបញុះញង់ ពេញប្រព័ន្ធបណ្តាញផ្សព្វផ្សាយសង្គម
( Face
book ) ធ្វើឲ្យមានការយល់ច្រឡំពីប្រជាពលរដ្ឋ
និងសាធរណៈមតិ។
ប្រការនេះបានធ្វើឲ្យលោក
ហ៊ុន សែន ប្រតិកម្មតបវិញយ៉ាងចាស់ដៃ ដោយលោកចាត់ទុកថាសកម្មភាពទាំងនោះគឺជាការមើលស្រាលដល់កិត្តិយសគ្រួសារ
និងគណបក្សនយោបាយរបស់លោក ហើយក៏បានព្រមានជាញយដង លុបចោលនូវវប្បធម៌សន្ទនា។
ដូច្នេះ ក្នុងនាមជាអ្នកដឹកនាំ
លោក សម រង្ស៊ី មិនគួរក្លាយខ្លួនជាមនុស្សដែលគ្មានភាពស្មោះត្រង់ចំពោះដៃគូខ្លួន
និងប្រជាពលរដ្ឋបែបនេះទេ។ ម្យ៉ាងទៀត ជារឿយៗ មេដឹកនាំរូបនេះតែងតែគេចវេសទៅក្រៅប្រទេសយករួចខ្លួន
នៅពេលដែលសកម្មជន និងអ្នកគាំទ្រ កំពុងរងគ្រោះដោយសារការដឹកនាំរបស់ខ្លួន។ ចរិតខ្លាច
កំសាកមិនហ៊ានទទួលខុសត្រូវចំពោះមុខសភាពការណ៍របស់លោក សម រង្ស៊ី គឺជាទម្លាប់អាក្រក់បំផុតដែលធ្វើឲ្យអ្នកគាំទ្រមិនអាចជឿជាក់លើការដឹកនាំរបស់លោកបានឡើយ។
យើងសូមអំពាវនាវឲ្យលោក
សម រង្ស៊ី បញ្ឈប់នូវការប្រើកលល្បិចនយោបាយរបៀប «ចាប់ដៃជាន់ជើង» ដូចដែលមេដឹកនាំប្រទេសថៃធ្លាប់បានធ្វើចំពោះមេដឹកនាំកម្ពុជាកន្លងមក
ហើយបង្ហាញនូវទស្សនៈជាវិជ្ជមានរបស់ខ្លួនក្នុងការរួបរួមឯកភាពជាតិ ដើម្បីរក្សាសន្តិសុខ
សណ្ដាប់ធ្នាប់សង្គមការ អភិវឌ្ឍប្រកបដោយនិរន្តរភាព និងសុខដុមរមនា៕
No comments:
Post a Comment