សម្តេចតេជោ នាយករដ្ឋមន្ត្រី បានថ្លែងនៅក្នុងសេចក្តីថ្លែងការណ៍ពិសេសរបស់សម្តេចជុំវិញបញ្ហាផែនទីព្រំដែនរដ្ឋរវាងព្រះរាជាណាចក្រកម្ពុជានិងសាធារណរដ្ឋសង្គមនិយមវៀតណាម កាលពីថ្ងៃទី ០៨ ខែកញ្ញា ឆ្នាំ២០១៥ថា «ការក្លែងសិទ្ធិសញ្ញា ១៩៧៩ថា ខ្មែររំលាយព្រំដែននោះ បើយើងមិនបានចាត់វិធានការផ្លូវច្បាប់ទេ អ្នកតំណាងរាស្ត្រនោះនឹងធ្វើការបោកប្រាស់ ទឹកចិត្តស្នេហាជាតិរបស់ប្រជាពលរដ្ឋ ហើយធ្វើឲ្យមានការពុះកញ្ជ្រោលឡើង។ សង្គ្រាមផ្ទៃក្នុងក៏អាចកើតឡើង សង្គ្រាមទល់ដែនក៏អាចកើតឡើង។ គឺដូចអ្វីដែលអ្នកនយោបាយថៃលោក អាប់ភីស៊ីត វីចាជីវ៉ា បង្កបញ្ហាព្រះវិហារដោយសារតែចង់បង្វែរស្ថានការនយោបាយក្នុងប្រទេសថៃមកព្រំដែន ដែលមកដល់ពេលនេះថៃនៅតែមិនទាន់មានស្ថេរភាពនៅឡើយទេ មានលឿង មានក្រហម នេះជាលទ្ធផលនៃភាពនិយមជ្រុល»។
សម្តេចតេជោ បានបញ្ជាក់ថា កម្ពុជាជារដ្ឋអធិបតេយ្យ យើងមានព្រំដែនរដ្ឋតាំងពីសម័យដើមមកម្លេះ សម្តេចលើកឡើងថា «សូម្បីតែកុលសម្ព័ន្ធក៏មានព្រំប្រទល់, នៅក្នុងប្រទេសមួយក៏មានព្រំប្រទល់, ខេត្តមួយក៏មានព្រំប្រទល់, ស្រុកមួយក៏មានព្រំប្រទល់ និងសូម្បីតែផ្ទះនីមួយៗក៏មានប្លង់ដែរ ចុះហេតុអ្វីអ្នកតំណាងរាស្ត្របក្សប្រឆាំង ក្លែងបន្លំឯកសារព្រំដែនជាតិខ្លួនឯងបែបនេះ។ ពាក្យរំលាយព្រំដែនេះវាធ្ងន់ណាស់ ទោះបីខ្ញុំផ្ទាល់ក៏ខ្ញុំមិនព្រមដែរ ហើយទោះខ្ញុំព្រម ក៏ពលរដ្ឋដែលស្នេហាជាតិ នឹងពុះកញ្ជ្រោលឡើងធ្វើឲ្យមានការបះបោរដែរ បើនេះជាការពិតនោះ»។
មានអ្នកខ្លះលើកឡើងថា «នៅលើផែនទីកម្ពុជាដែលប្រើផ្លូវការ គឺមានហត្ថលេខា វៀតណាម ការពិតអ្នកនិយាយនោះគឺឆោតល្ងង់ណាស់ បើអត់មានហត្ថលេខា គឺវាងាយនឹងបន្លំណាស់។ សូម្បីតែកិច្ចសន្យា កិច្ចព្រមព្រៀង ព្រះរាជកឹ្រត្យ គឺសុទ្ធតែត្រូវការចុះហត្ថលេខា ជៀសវាងការក្លែងបន្លំ បើអត់ចុះហត្ថលេខាទេគេងាយនឹងយកឯកសារផ្សេងមកជំនួសណាស់។ខ្ញុំឆ្ងល់ថា តើការចុះហត្ថលេខានេះ ជាការដាក់អាណានិគម រឺបញ្ជាក់ថាមិនស្នើភាពគ្នា? តែការពិតមិនមែនមានតែខាងវៀតណាមចុះហត្ថលេខាតែឯងឯណា គឺកម្ពុជាក៏ចុះដែរ គឺចុះទាំងពីរ បើមានតែម្ខាងក៏កម្ពុជាមិនអានទទួលយកបានដែរ»។
សម្តេចតេជោបន្ថែមថា «ផែនទីដែលរាជរដ្ឋាភិបាលកម្ពុជាកំពុងប្រើប្រាស់ រួមទាំងសិទ្ធិសញ្ញាស្តីពីព្រំដែន គឺស្របច្បាប់ មានសច្ចាប័នដែលចេញពីស្ថាប័នច្បាប់ឯករាជ្យរបស់ជាតិ គឺរដ្ឋសភា ដែលមានចុះព្រះហត្ថលេខាដោយព្រះមហាក្សត្រនៃព្រះរាជាណាចក្រកម្ពុជា សម្តេចព្រះបរមនាថនរោត្តមសីហមុនី, សម្តេចក្រុមព្រះនរោត្តម រណឬទ្ធ ប្រធានព្រឹទ្ធសភាជាតិ, សម្តេចអគ្គធម្មពោធិសាល ជា ស៊ីម ប្រធានព្រឹទ្ធសភា និង សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។ ជាទូទៅប្រទេសណាក៏ដោយ សទ្ធិសញ្ញារឺកិច្ចព្រមព្រៀងព្រំដែនជាតិ ត្រូវសុំសច្ចាប័នពីរដ្ឋសភា ឲ្យសច្ចាប័នហើយត្រូវដោះដូរគ្នា រវាងរដ្ឋភាគីនៃប្រទេសព្រំដែនជាប់គ្នា ដើម្បីមានការឯកភាពគ្នា បើអត់មានសច្ចាប័នមិនអាចធ្វើព្រំដែនបានទេ»។
ជាការពិតផែនទី អមសទ្ធិសញ្ញាព្រំដែនដែលរាជរដ្ឋាភិបាលកំពុងប្រើប្រាស់ បោះបង្គោលព្រំដែនជាមួយប្រទេសវៀតណាម ជាផែនទីមានលក្ខណៈផ្លូវច្បាប់ពេញលេញ ដូច្នេះវាមិនមានភាពចាំបាច់ណាមួយឲ្យរាជរដ្ឋាភិបាលស្វែងរកការសហការសុំខ្ចីផែនទីពីប្រទេសនានាទៀតនោះទេ។ ប៉ុន្តែរាជរដ្ឋាភិបាលនៅតែធ្វើដើម្បីបញ្ចៀសគ្រោះថ្នាក់ជាតិ ដែលបានមកពីការញុះញង់បំភ្លៃខុសពីការពិត។ ទោះយ៉ាងនេះក្តី អ្នកនយោបាយមួយចំនួន នៅតែបន្តធ្វើមិនយល់ពីផែនទី និងឯកសារគតិយុត្តិ ហើយមើលងាយស្ថាប័នផ្សេងៗរួមទាំងព្រះមហាក្សត្រទៀតផង ថាជាចោរ។ សម្តេចតេជោ ចោទសួរថា «តើតួអង្គទាំងបួន ដែលចុះហត្ថលេខាហ្នឹងជាចោររឺយ៉ាងណា? ដូច្នេះដំណោះស្រាយរបស់យើង គឺស្នើឲ្យស្ថាប័នច្បាប់ចាត់វិធានការឲ្យច្បាស់លាស់ ចំពោះអ្នកប្រព្រឹត្តទង្វើរចោទប្រកាន់នេះ។ សម្តេចលើកឡើងថា «មានអ្នកខ្លះថាដីខ្មែរបាត់តាំងពី៤០០ឆ្នាំមុន កុំបន្តោសខ្មែរគ្នាឯងអី! ចុះបើចឹងដដែលម៉េចបានដើររិះគន់ជេរខ្ញុំ ប៉ុន្មានឆ្នាំមកហើយហ្នឹងវាយ៉ាងម៉េច? ត្រូវតែចាប់ខ្លួនព្រោះវាជាបទល្មើសជាក់ស្តែង។ សិទ្ធិនយោបាយត្រូវធ្វើ តែកុំឲ្យចោទប្រកាន់គេ ខ្ញុំគោរពទាំងស្រុងនូវសិទ្ធិបញ្ចេញមតិ និងសិទ្ធិនយោបាយស្របច្បាប់ តែមិនលើកលែងអ្នកបន្តប្រព្រឹត្តបទល្មើសដដែលៗនោះទេ» ហើយនេះមិនមែនជារឿងថ្មីទេ យុទ្ធសាស្រ្តនេះគេប្រើរួចហើយសម័យសម្តេចឪ ក្នុងប្រវត្តិសាស្ត្រថាព្រះអង្គលក់ដីឲ្យវៀតណាម៕
No comments:
Post a Comment