ក្រសួងយុត្តិធម៌ តាមរយៈញ្ញតិចេញផ្សាយថ្ងៃទី២០
ខែសីហា ឆ្នាំ២០១៥ បានគាំទ្រប្រមុខរាជរដ្ឋាភិបាល សម្តេច ហ៊ុន សែន ក្នុងការការពារបូរណភាពទឹកដី
និងអធិបតេយ្យជាតិ និងបានធ្វើការថ្កោលទោសយ៉ាងដាច់អហង្ការ ចំពោះទង្វើរបស់ជនអគតិមួយចំនួនដែលតែងតែបានធ្វើការប្រឌិត
និងចោទប្រកាន់មូលបង្កាច់ទាំងងងឹតងងល់នាពេលកន្លងមកដើម្បីអោយសាធារណៈមតិជាតិ និងអន្តរជាតិបានយល់ច្បាស់អំពីបញ្ហាអធិបតេយ្យជាតិ
បូរណភាពទឹកដី និងជាពិសេសបញ្ហាផែនទីដែលរាជរដ្ឋាភិបាលក៏ដូចជាគណៈកម្មការចម្រុះកិច្ចការព្រំដែនបាន
និងកំពុងយកមកប្រើប្រាស់។
ក្រសួងយុត្តិធម៌ បានកត់សម្គាល់ថា ដើម្បីជាការបញ្ជាក់ពីគោលជំហរជាផ្លូវការរបស់រាជរដ្ឋាភិបាលដើម្បីធ្វើការចរចារ
និងដោះស្រាយបញ្ហាព្រំដែនរវាងព្រះរាជាណាចក្រកម្ពុជា និងសាធារណៈរដ្ឋសង្គមនិយមវៀតណាមនាព្រឹក
ថ្ងៃទី២០ ខែសីហា ឆ្នាំ២០១៥ នៅវិមានសន្តិភាព លោកជំទាវ Mereani Keleti Vakasisikakala តំណាងអង្គការសហប្រជាជាតិ
បាននាំយកផែនទី UTM ខ្នាតរាជរដ្ឋាភិបាលកម្ពុជា
តាមសំណើសុំខ្ចីរបស់សម្តេចអគ្គមហាសេនាបតិតេជោ ហ៊ុន សែន ដើម្បីធ្វើការផ្ទៀងផ្ទាត់ជាមួយផែនទីខ្នាត
១/១០០.០០០ ផលិតដោយក្រុមភូមិសាស្រ្តឥណ្ឌូចិន ដែលរាជរដ្ឋាភិបាលកម្ពុជាបាននឹងកំពុងប្រើប្រាស់ក្នុងការកំណត់ព្រំដែនរវាងកម្ពុជា
និងវៀតណាម។
ថ្នាក់ដឹកនាំ និងមន្រ្តីរាជការទាំងអស់នៃក្រសួងយុត្តិធម៌
បានធ្វើការតាមដានយ៉ាងយកចិត្តទុកដាក់នូវព្រឹត្តិការណ៍ជាប្រវត្តិសាស្រ្តដ៏មានសារៈសំខាន់នេះ
ហើយបានពិនិត្យឃើញថា ដំណើរការនៃការផ្ទៀងផ្ទាត់ផែនទីនេះប្រព្រឹត្តទៅប្រកបដោយតម្លាភាព
ដោយមានការចូលរួមពីគ្រប់ភាគីដែលពាក់ព័ន្ធរួមមានជាអាទិ៍ តំណាងរាជរដ្ឋាភិបាលកម្ពុជាតំណាងគណបក្សប្រជាជនកម្ពុជា
តំណាងគណបក្សសង្រ្គោះជាតិ តំណាងគណបក្សហ៊្វុនស៊ិនប៉ិច តំណាងឧត្តមក្រុមប្រឹក្សានៃអង្គចៅក្រម
និងតំណាងរាជបណ្ឌិតសភាកម្ពុជា ហើយលទ្ធផលនៃការផ្ទៀងផ្ទាត់បានបង្ហាញឱ្យឃើញយ៉ាងជាក់ច្បាស់ដោយឥតប្រកែកបានថា
ផែនទីដែលអង្គការសហប្រជាជាតិនាំមក និងផែនទីដែលរាជរដ្ឋាភិបាលកម្ពុជាកំពុងប្រើប្រាស់
គឺមានភាពដូចគ្នា។
ក្រសួងយុត្តិធម៌ បានបញ្ជាក់នៅក្នុងញ្ញត្តិរបស់ខ្លួនថា
លទ្ធផលនៃការផ្ទៀងផ្ទាត់នេះ គឺបានបង្ហាញឱ្យឃើញកាន់តែច្បាស់លាស់ថែមទៀតអំពីភាពត្រឹមត្រូវពិតប្រាកដនៃផែនទីដែលរាជរដ្ឋាភិបាលកម្ពុជាប្រើប្រាស់បច្ចុប្បន្ន
និងបង្ហាញឱ្យឃើងកាន់តែច្បាស់អំពីនយោបាយបោកប្រាស់ក្រុមជនអគតិមួយចំនួន ដែលតែងតែភូតកុហក់
បោកប្រាស់ មួលបង្កាច់ខុសពីការពិតមកលើរាជរដ្ឋាភិបាលនាពេលកន្លងមកក្នុងគោលបំណងបម្រើអាជីវកម្មនយោបាយដ៏ងុបងល់របស់ខ្លួន
ដោយមិនគិតអំពីផលប្រយោជន៍ដ៏ឧត្តុងឧត្តមរបស់ជាតិ និងមាតុភូមិ។
ថ្នាក់ដឹកនាំ និងមន្រ្តីរាជការនៃក្រសួងយុត្តិធម៌ទាំងអស់
សូមប្រកាសគាំទ្រយ៉ាងឧឡារិក ចំពោះរាជរដ្ឋាភិបាលក្រោមការដឹកនាំប្រកបដោយគតិបណ្ឌិត
ដ៏ខ្ពង់ខ្ពស់របស់ សម្តេចអគ្គមហាសេនាបតិតេជោ ហ៊ុន សែន ដែលតែងតែបានបូជាកម្លាំងកាយ
កម្លាំងចិត្ត និងប្រកាន់ភ្ជាប់នូវឧត្តមគតិស្នេហាជាតិដ៏ឧត្តុងឧត្តម ក្នុងការការពារបូរណភាពទឹកដី
និងអធិបតេយ្យជាតិ ជាពិសេសក្នុងការដោះស្រាយបញ្ហាព្រំដែនជាមួយប្រទេសជិតខាង ប្រកបដោយការទទួលខុសត្រូវខ្ពស់ចំពោះជោគវាសនារបស់ជាតិ
និងមាតុភូមិទាំងមូល។
No comments:
Post a Comment