អគារ​​មជ្ឈ​មណ្ឌល​​ចក្ខុរោគ មិត្តភាព កម្ពុជា-កូរ៉េ ត្រូវ​សម្ពោធ​​ដាក់​ឲ្យ​​ប្រើប្រាស់​​ជាផ្លូវការ

អគារមជ្ឈមណ្ឌលចក្ខុរោគ មិត្តភាព កម្ពុជា- កូរ៉េ ដែលជាអំណោយដ៍ថ្លៃថ្លារបស់រដ្ឋាភិបាល នៃសាធារណៈរដ្ឋកូរ៉េ តាមរយៈអង្គការ(kioka)កូរ៉េ មានទីតាំងនៅក្នុងបរិវេនខាងក្រោយនៃមន្ទីរពេទ្យព្រះអង្គឌួង ក្នុងខណ្ឌដូនពេញ រាជធានីភ្នំពេញ ត្រូវបានធ្វើពិធីសម្ពោធដាក់ឲ្យប្រើប្រាស់ជាផ្លូវការ នាព្រឹកថ្ងៃទី១៣ ខៃឧសភា នេះ ក្រោមអធិបតីភាពសម្តេចអគ្គមហាសេបតី តេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា នឹងឯកឧត្តម Chung Ui-Wa ប្រធានរដ្ឋសភាជាតិ នៃសាធារណរដ្ឋកូរ៉េ។

ឯកឧត្តមវេជ្ជបណ្ឌិត ម៉ម ប៊ុនហេង រដ្ឋមន្ត្រីក្រសួងសុខាភិបាល បានថ្លែងឲ្យដឹងថា ដោយមើលឃើញនូវកង្វះខាតនៃហេដ្ឋារចនាសម្ពន្ធ័ សម្តេចតេជោ នាយករដ្ឋមន្ត្រី ហ៊ុនសែន បានផ្តួចផ្តើមឲ្យមានកិច្ចសហប្រតិបត្តិការ ជាមួយរដ្ឋាភិបាលកូរ៉េខាងត្បូង សាងសង់អាគារចក្ខុរោគមិត្តភាព កម្ពុជា កូរ៉េ ដ៍ស្កឹមស្កៃនេះឡើង។ អាគារនេះ បានចាប់ផ្តើមសាងសង់ ពីថ្ងៃទី២២  ខែតុលា ឆ្នាំ២០១៣ នឹងបញ្ចប់ នាថ្ងៃទី១២ខែធ្នូ ឆ្នាំ២០១៤ ។ អាគារនេះ មានកម្ពស់ ៤ជាន់ មាន៧៥បន្ទប់ ដែលក្នុងនោះ ជាន់ផ្ទាល់ដី សម្រាប់ចុះឈ្មោះ និងទទួលពិនិត្យជំងឺក្រៅ, ជាន់ទី១ សម្រាប់អ្នកជំងឺ សម្រាកព្យាបាល, ជាន់ទី២ សម្រាប់វះកាត់, ជាន់ទី៣ការិយាល័យនិងសាលប្រជុំ ព្រមទាំងបំពាក់ដោយសម្ភារៈទំនើប នឹងមានគ្រែសំរាកព្យាបាលចំនួន៥២គ្រែ ដោយចំណាយថវិកាសរុប ប្រមាណ ៥លាន៥សែន ដុល្លារអាមេរិច  ដែលសាងសង់ដោយក្រុមហ៊ុន Young Dong Construction Co.LTD នៅលើផ្ទៃដី សរុប ៣៨១៨ម៉ែត្រការ៉េ។ ក្រៅពីថវិកាសំរាប់ប្រើប្រាស់ក្នុងការសាងសង់ ក៍ដូចជាបំពាក់ឧបករណ៍បរិក្ខាពេទ្យទំនើប សាធារណរដ្ឋកូរ៉េ ក៍បានចំណាយថវិកា 2លាន 5សែន ដុល្លាអាមេរិចបន្ថែមទៀត សំរាប់ការបណ្តុះបណ្តាល ដល់បុគ្គលិក មន្ទីរពេទ្យព្រះអង្គឌួង ដោយមានមន្ទីរពេទ្យ kim's Eye នៃសាធរណះរដ្ឋកូរ៉េ ជាដៃគូបច្ចេកទេស។

ប្រធានររដ្ឋសភាជាតិ នៃសាធារណះរដ្ឋកូរ៉េ ឯកឧត្តម Chung Ui-Wa បានវាយតំលៃខ្ពស់ ចំពោះការសម្រេចយកថ្ងៃនេះ សំរាប់ធ្វើពិធីសម្ពោធដាក់ឲ្យប្រើប្រាស់ជាផ្លូវការ អគារមជ្ឈមណ្ឌលចក្ខុរោគ មិត្តភាព កម្ពុជា កូរ៉េ ដែលជាអំណោយដ៍ថ្លៃថ្លា របស់រដ្ឋាភិបាល នៃសាធារណៈរដ្ឋកូរ៉េ តាមរយះអង្ការ(kioka)គឺស្របពេល នៃព្រះរាជពិធីបុណ្យ ចម្រើនព្រះ ជន្មាយុ ព្រះមហាក្រត្រ នៃព្រះរាជាណាចក្រកម្ពុជា គម្រប់៦២ យាងចូល៦៣ ព្រះ វស្សា។

ឯកឧត្តមបញ្ជាក់ថា ការសម្រេចយកថ្ងៃនេះ ធ្វើពិធីសម្ពោធ គឺមានអត្ថន័យ២យ៉ាង គឺទី១ ជាការរំលឹកដល់ការខិតខំប្រឹងប្រែង ក្នុងការកសាងអគារអាគារ មជ្ឈមណ្ឌលចក្ខុរោគ មិត្ត ភាព កម្ពុជា-កូរ៉េ នេះ លេចចេញជារូបរាងឡើង ដោយប្រើរយៈពេល៤ឆ្នាំកន្លងទៅ និងការ យកចិត្តទុកដាក់ លើការបង្ការ និងព្យាបាលភ្នែក របស់ប្រជាជន កម្ពុជា នឹងម្យ៉ាងទៀត គឺជានិម្មិតរូប នៃចំណងមិត្តភាព និងកិច្ចសហប្រតិបត្តិការ នៃប្រជាជន រដ្ឋាភិបាល និងប្រទេសទាំង២។ 

ឯកឧត្តមបញ្ជាក់ថា អាគារមជ្ឈមណ្ឌលចក្ខុរោគ មិត្តភាព កម្ពុជា កូរ៉េ នឹងបំភ្លឺថ្ងៃអនាគត របស់ប្រជាជននៃប្រទេសទាំង២ ដោយកែវភ្នែកក្នុងចិត្ត ជាមួយនិងសុខភាពល្អ ដែលស្របនឹងទស្សនៈវិស័យរបស់សម្តេចតេជោហ៊ុនសែន ដែលកំពុងតែយកចិត្តទុកដាក់លើវិស័យសុខាភិបាល នឹងសេវាសុខភាពសាធារណះ សំរាប់ប្រជា ពលរដ្ឋកម្ពុជា។       

មានប្រសាសន៍សំណេះសំណាលជាមួយការថ្លែងស្វាគមន៍ នៃដំណើរទស្សនៈកិច្ចរបស់គណៈប្រតិភូសភា នៃសាធារណះរដ្ឋកូរ៉េ នៅកម្ពុជា ដែលដឹកនាំដោយ ឯកឧត្តម Chung Ui-Wa សម្តេចអគ្គមហាសេនាបតីតេជោហ៊ុនសែន បានយកឱកាសនេះ ថ្លែងអំណរគុណ ដល់រដ្ឋាភិបាល និងប្រជាជនកូរ៉េ ដែលបានផ្តល់ជំនួយឥតសំណង ក្នុងការសាងសង់នូវអគារមជ្ឈមណ្ឌលចក្ខុរោគមិត្តភាពកម្ពុជា កូរ៉េ ដ៍ទំនើបនេះឡើង នៅក្នុងបរិវេន នៃមន្ទីរពេទ្យព្រះអង្គឌួងនេះ។ 

បើតាមសម្តេច យើងមិនត្រូវភ្លេចទេ មន្ទីរពេទ្យនេះ មានអាយុកាល១០៥ឆ្នាំហើយ ដូច្នេះហើយបានជាជ្រើសរើសថ្ងៃនេះ ជាថ្ងៃសម្ពោធ ដោយផ្សារភ្ជាប់ជាមួយ និងព្រះរាជពិធីបុណ្យចម្រើនព្រះជន្មព្រះវស្សា របស់ព្រះករុណា ព្រះមហាក្សត្រកម្ពុជា ព្រះបាទសម្តេច ព្រះបរមនាថ នរោត្តម សីហមុនី ដែលចូលដល់ទៅជាចៅទួត ចៅលួត របស់ព្រះបាទព្រះអង្គឌួង។ 

សម្តេចបញ្ជាក់ថា ព្រះបាទអង្គឌួងនេះហើយ ដែលចែងក្នុងរដ្ឋធម្មនុញ គឺបញ្ជាក់អំពីលោហិត ដែលត្រូវឡើងសោយរាជ មានព្រះបាទអង្គឌួង ព្រះបាទនរោត្តម និងព្រះបាទស៊ីសុវត្ថិ ឬបច្ឆាញាតិរបស់ព្រះបាទអង្គឌួង ដែលត្រូវឡើងគ្រងរាជ។ដូច្នេះមន្ទីរពេទ្យព្រះអង្គឌួងនេះ បានកកើតឡើងតាំងពីឆ្នាំ ១៩១០ ដែលបច្ចុប្បន្ន មានអាយុកាល១០៥ឆ្នាំហើយ មកដល់ឆ្នាំ២០១៥នេះ។ សម្តេចសង្ឃឹមថា អគារមជ្ឈមណ្ឌលចក្ខុរោគមិត្តភាពកម្ពុជា-កូរ៉េ ដែលយើងបាននឹងកំពុងធ្វើពិធីសម្ពោធនាថ្ងៃនេះ និងមិនគ្រាន់តែទុកសំរាប់៤ ឬ៥ឆ្នាំនោះទេ គឺយើង ទុករាប់សិបរាប់រយឆ្នាំតទៅមុខទៀត៕