អត្តបទដោយ: ឧត្តម សក្តិ
ការប្រៀបធៀបដែលបង្ហាញពីភាពខ្វះមនសិការ គ្មានកត្តិវិនិច្ឆ័យឲ្យបានត្រឹមត្រូវក្នុងចេតនាទាញទម្លាក់កិត្យានុភាពជាតិឯង បានស្តែងទ្បើងតាមរយៈការធ្វើបទវិភាគប្រៀបធៀប ក្រោមចំណងជើងថា «លក្ខណៈកំណែទម្រង់របស់ លោក ចូកូ វីដូដូ និង លោក ហ៊ុន សែន» ដែលបទវិភាគនេះ បានធ្វើការផ្សព្វផ្សាយតាមប្រព័ន្ធផ្សាយសំឡេងមួយ ដែលគេបានដឹងយ៉ាងច្បាស់ថា បម្រើឲ្យនយោបាយបក្សប្រឆាំងនៅកម្ពុជា។
តើការដែលអ្នកវិភាគដែលមានមាយាទអន់ លើកយក លោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និង លោក ចូកូ វីដូដូ ប្រធានាធិបតីឥណ្ឌូនេស៊ី មកធ្វើការប្រៀបធៀបបែបនេះ ក្នុងចេតនាបែបណា? តើការវិគាគនេះត្រឹមត្រូវដែរ ឬទេ?
ជាការពិតណាស់ ភាពត្រឹមត្រូវ ឬមិនត្រឹមត្រូវ វាមិនស្ថិតនៅលើការពណ៌នា ឬបរិយាយបែបបំផ្លើសរបស់ស្មេរណាម្នាក់នោះទេ ពោលគឺវាស្ថិតនៅលើសកម្មភាពព្រឹត្តិការណ៍ជាក់ស្តែង និងលទ្ធផលជាក់ស្តែងតែប៉ុណ្ណោះ ដែលអាចបញ្ជាក់នូវការពិតទាំងអស់នេះបាន។
ជាក់ស្តែង នណាក៏បានដឹងដែរថា លោក វីដូដូ ទើបចូលកាន់តំណែងជាប្រធានាធិបតី តែប៉ុន្មានថ្ងៃប៉ុណ្ណោះ ហើយថែមទាំងមិនទាន់នឹងបានអនុវត្តនូវគោលនយោបាយរបស់ខ្លួនដែលបានសន្យាមុនការបោះឆ្នោតផង។ ប៉ុន្តែ អ្វីដែលចម្លែកបំផុតនោះ នៅកម្ពុជាមានលេចចេញអ្នកវិភាគស្ទើរភ្លើង មានចរិតជាអ្នកបរទេសនិយម តាំងខ្លួនជាពលរដ្ឋឥណ្ឌូនេស៊ី ជាជាងពលរដ្ឋឥណ្ឌូនេស៊ីខ្លួនឯង បានព្យាយាមលើកតម្កើងជាតិសាសន៍ដទៃជ្រុលហួល ក្នុងចេតនាបន្ទាបតម្លៃអ្នកដឹកនាំជាតិ ដើម្បីបំពេញមហិច្ឆតានយោបាយ ទាញទម្លាក់ប្រជាប្រិយភាពរបស់ លោកនាយករដ្ឋមន្ត្រី ហ៊ុន សែន ដែលលោកកំពុងតែទទួលការគាំទ្រពីស្រទាប់មហាជនកម្ពុជាទូទៅ ។
ក្នុងន័យនេះ ក្នុងនាមជាអ្នកវិភាគម្នាក់ គួរណាស់យល់ឲ្យបានច្បាស់ថា ការប្រៀបធៀបគួរតែលើកយកតម្លៃណាមួយដែលស័ក្តិសម ដែលអាចយកមកប្រៀបប្រដូចគ្នាបាន។ តួយ៉ាងនៅលើពិភពលោក ស្ទើរគ្រប់មេដឹកនាំទាំងអស់នៅក្នុងសង្គមប្រជាធិបតេយ្យ និងកុំម្មុយនិស្តមុនពេលឡើងកាន់តំណែង ឬពេលឡើងតំណែង សុទ្ធតែសន្យាធ្វើកំណែទម្រង់លើការដឹកនាំដើម្បីរកវិធីធ្វើឲ្យប្រជាពលរដ្ឋដែលរស់នៅក្រោមការដឹកនាំរបស់ពួកគេ អាចរស់នៅបានប្រសើរជាងបច្ចុប្បន្ន។ ត្រឹមតែគោលនយោបាយ និងការសន្យា វាមិនទាន់គ្រប់គ្រាន់សម្រាប់ជាការផ្តល់នូវតម្លៃឲ្យមេដឹកនាំណាម្នាក់ ហើយសម្រាប់យកទៅប្រៀបធៀបនឹងមេដឹកនាំម្នាក់ទៀត ដែលបាននឹងកំពុងក្លាយជាវីរជនរបស់ជាតិមួយទៀត ទៅហើយនោះទេ។ តែអ្វីដែលសំខាន់ ចំណុចដែលជាមេរៀនរបស់ប្រជាពលរដ្ឋធ្លាប់រស់នៅឆ្លងកាត់មេដឹកនាំច្រើន របបច្រើន គឺបង្រៀនពួកគាត់ឲ្យដឹងថា ការសន្យាជារឿងងាយ តែការធ្វើកិច្ចការបំពេញតាមសន្យា មិនមែនជារឿងងាយនោះទេ។ សមដូចពាក្យមួយបានពោលថា «ថាមិនពិបាក ដូចធ្វើ»។
លោក ចូកូ វីដូដូ គឺជាប្រធានាធិបតីរបស់ឥណ្ឌូនេស៊ី ដែលទើបទ្បើងកាន់អំណាច ហើយអ្វីដែលជាការចាប់អារម្មណ៍របស់ប្រជាពលរដ្ឋឥណ្ឌូនេស៊ី និងសហគមន៍អន្តរជាតិនោះគឺ វីដូដូ គ្រាន់តែកើតចេញពីអ្នកតស៊ូវណ្ណៈ ឈានចេញពីថ្នាក់ដឹកនាំឃុំ-សង្កាត់ ទៅជាអភិបាលក្រុងហ្សាកាតា ហើយឈានដល់ប្រធានាធិបតី។ លោក វីដូដូ បានប្រកាសដាក់គោលនយោបាយច្បាស់លាស់ ធ្វើកំណែទម្រង់ចម្បងនោះ គឺសេវាសាធារណៈដែលកំពុងជាប់ជំពាក់ជំពិនខ្លាំងដោយអំពើពុករលួយ បក្ខពួកនិយម និងការិយាធិបតេយ្យក្នុងការដឹកនាំតែប៉ុណ្ណោះ។
ដោយឡែក ចំពោះ លោក ហ៊ុន សែន ឆ្លងតាមព្រឹត្តិការណ៍នយោបាយនៅកម្ពុជាជិត៤ទសវត្សរ៍កន្លងមកនេះ ពិភពលោកអាចមើលឃើញយ៉ាងច្បាស់ថា លោក ហ៊ុន សែន ជាអ្នកចរចាដ៏ល្បីល្បាញ នឹងដើរតួនាទីដ៏សំខាន់ ជាអ្នកដោះស្រាយ ក៏ដូចជាអ្នកការទូតដ៏ប៉ិនប្រសព្វ ទន់ភ្លន់នៅគ្រប់របត់នយោបាយធំៗ ជាអាយុជីវិតរបស់ជាតិខ្មែរជាង ៣០ ឆ្នាំ ចុងក្រោយនេះ លោកតែងតែបើកបេះដូង ចិត្តទូលាយជាមួយអ្នកនយោបាយខ្មែរគ្នាឯង ព្រមទាំងជាមួយប្រទេសនានា ដើម្បីសន្តិភាព អភិវឌ្ឍប្រទេសកម្ពុជា និងផលប្រយោជន៍សហគមន៍ទៅវិញទៅមក។ សមិទ្ធផលរបស់កម្ពុជាបច្ចុប្បន្ន អាចសមល្មមបង្ហាញឲ្យពិភពលោកមើលឃើញថា កម្ពុជាជាគំរូនៃសន្តិភាព លោក ហ៊ុន សែន ជាអ្នកសាបព្រួស ជាអ្នកបំពាក់ ជាបិតាប្រជាធិបតេយ្យនៅកម្ពុជាយ៉ាងពិតប្រាកដ។
ដោយយោងលើសមត្តកម្មដូចដែលបានរៀបរាប់ត្រួសៗខាងលើ អាចសរបញ្ជក់ឲ្យឃើញថា ការប្រៀបធៀប លោក ចូកូ វីដូដូ ប្រធានាធិបតីរបស់ឥណ្ឌូនេស៊ី និង លោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ជាការវិភាគស្ទើរភ្លើង ខ្វះលក្ខណៈកត្តវិទ្យា ដែលប្រៀបបានទៅនឹងការប្រដូចនាវាមួយដែលកំពុងតែធ្វើដំណើរលើត្រើយនៃសុខសន្តិភាព និងការអភិវឌ្ឍ ឯនាវាមួយទៀតកំពុងតែនឹងចាប់ផ្តើមចេញដំណើរតែប៉ុណ្ណោះ៕
No comments:
Post a Comment