កម្ពុជាកំពុងយកចិត្តទុកដាក់បំផុសស្មារតីមហាជនឱ្យកាន់តែស្រលាញ់ និងគាំទ្រកីឡាប្រដាល់ក្បាច់គុនបុរាណខ្មែរ តាមរយៈការខិតខំរៀបចំការប្រកួតកីឡាក្បាច់គុនបុរាណខ្មែរជាលក្ខណៈមិត្តភាពអន្តរជាតិ ដើម្បីលើកកម្ពស់កិត្តិសព្ទកីឡាប្រដាល់ក្បាច់គុនបុរាណខ្មែរ ឱ្យកាន់តែល្បីល្បាញថែមទៀតនៅលើឆាកអន្តរជាតិ។
ថ្លែងបើកការប្រកួតកីឡាប្រដាល់ក្បាច់គុនបុរាណខ្មែរជាលក្ខណៈមិត្តភាពអន្តរជាតិ និងដណ្តើមខែ្សក្រវ៉ាត់ CBF លក្ខណៈអន្តរជាតិ នៅទីរួមខេត្តស្វាយរៀង នាល្ងាចថ្ងៃទី០១ វិច្ឆិកា ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្រ្តី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី បានមានប្រសាសន៏ថា ព្រឹត្តិការណ៍ប្រកួតកីឡាប្រដាល់ថ្ងៃនេះ មិនត្រឹមនាំមកនូវភាពសប្បាយរីករាយ និងជួយលើកកម្ពស់ស្មារតីសន្តិភាព សាមគ្គីភាព មិត្តភាព ភាតរភាព និងសហប្រតិបត្តិការរវាងគ្នានិងគ្នាក្នុងក្របខ័ណ្ឌជាតិ និងអន្តរជាតិប៉ុណ្ណោះទេ ប៉ុន្តែវាបានឆ្លុះបញ្ចាំងឱ្យឃើញអំពីកិច្ចសហប្រតិបត្តិការអន្តរជាតិលើវិស័យកីឡា ដែលជាឱកាសសម្រាប់ការផ្លាស់ប្តូរទាំងបច្ចេកទេស និងបទពិសោធន៍ក្នុងការប្រកួតក្បាច់គុនបុរាណ ដែលជាមរតកនៃសិល្បៈការពារខ្លួនរបស់ប្រជាជាតិខ្មែរយើង។ ហើយអ្វី ដែលសំខាន់ជាងនេះទៀតនោះ គឺជាចំណែកមួយក្នុងការផ្សព្វផ្សាយមុខមាត់កេរ្តិ៍ឈ្មោះ និងកិត្តិយសកម្ពុជានៅលើឆាកអន្តរជាតិ ឲ្យកាន់តែមានភាពល្បីរន្ទឺថែមទៀតអំពីក្បាច់គុនល្បុក្កតោរបស់ខ្មែរ។
ឯកឧត្តមឧបនាយករដ្ឋមន្ត្រីបានលើកឡើងថា កីឡាប្រដាល់ក្បាច់គុនបុរាណខ្មែរ គឺជាប្រភេទកីឡាដ៏មានប្រជាប្រិយភាពដែលទទួលបានការគាំទ្រទាំងក្នុងក្របខ័ណ្ឌជាតិ និងអន្តរជាតិ។ កីឡាប្រដាល់ក្បាច់គុនបុរាណខ្មែរនេះជានិមិត្តរូបនៃអារ្យធម៌ខ្មែរ មានឫសគល់យ៉ាងជ្រៅក្នុងទំនៀមទម្លាប់ ប្រពៃណីរបស់ជាតិយើង។ តាមការសិក្សាស្រាវជ្រាវរបស់ប្រវត្តិវិទូ បានឱ្យដឹងថា នាសម័យអាណាចក្រខ្មែរ ក្បាច់គុនខ្មែរមានច្រើនប្រភេទណាស់ មិនត្រឹមតែជាកីឡាសម្រាប់ប្រកួតតាមលក្ខណៈបច្ចេកទេស និងច្បាប់ ដើម្បីឈ្នះចាញ់ប៉ុណ្ណោះទេ ប៉ុន្តែថែមទាំងជាសិល្បៈនៃការបញេ្ចញនូវកាយវិការដ៏រហ័សរហួនយ៉ាងស្វាហាប់ ដែលត្រូវបានប្រើប្រាស់យ៉ាងទូលំទូលាយ ក្នុងវិស័យការពារជាតិ និងសង្គមវប្បធម៌ ជាសិល្បៈការពារខ្លួន ជាល្បែងប្រដាល់កំសាន្ត ហើយក៏ជាជាយុទ្ធគុនដ៏មានសារៈសំខាន់សម្រាប់ពលទាហាន។ ក្នុងសម័យបុរាណ ទាំងព្រះរាជា មន្រ្តីគ្រប់ជាន់ថ្នាក់ ពលទាហាន និងរាស្រ្តសាមញ្ញគឺភាគច្រើន សុទ្ធតែទទួលបានការហ្វឹកហាត់និងរៀនក្បាច់គុនខ្មែរ មាន គុនប្រដាល់ គុនដាវ គុនដំបង និងគុនល្បុក្កតោ។ យើង រកឃើញភស្តុតាងជាច្រើន លើផ្ទាំងចម្លាក់នៅតាមប្រាសាទបុរាណនានា ដូចជានៅ ប្រាសាទបាយ័ន បា្រសាទសម្បូរណ៍ព្រៃគុហ៍ ប្រាសាទអង្គរបូរី ប្រាសាទកោះកេរ ប្រាសាទបន្ទាយស្រី ប្រាសាទបាពួន ដែលអាចបញ្ជាក់បានយ៉ាងច្បាស់អំពីប្រភពមរតកវប្បធម៌នៃក្បាច់គុនបុរាណខ្មែរ។
ឯកឧត្តមបណ្ឌិតសភាចារ្យបានគូសបញ្ចាក់ថា ដោយមើលឃើញពីតម្លៃមិនអាចកាត់ថ្លៃបាននៃក្បាច់គុនបុរាណខ្មែរ ដែលជាសម្បតិ្តវប្បធម៌ជាតិនិងដើម្បីលើកកម្ពស់អត្តសញ្ញាណជាតិ រាជរដ្ឋាភិបាលកម្ពុជា បាននិងកំពុងយកចិត្តទុកដាក់យ៉ាងខ្លាំងក្នុងការអភិរក្សនិងអភិវឌ្ឍក្បាច់គុនបុរាណខែ្មរ តាមរយៈការជំរុញឱ្យមានការសិក្សាស្រាវជ្រាវ ប្រមូលចងក្រង និងរៀបចំឯកសារនានាពាក់ព័ន្ធនឹងប្រវត្តិសិល្បៈក្បាច់គុនខ្មែរ ក៏ដូចជា ស្ថានភាពក្បាច់គុនខ្មែរក្នុងសម័យទំនើបព្រមទាំងធ្វើការផ្សព្វផ្សាយឱ្យបានកាន់តែទូលំទូលាយថែមទៀតដល់គ្រប់មជ្ឈដ្ឋានជាតិ និងអន្តរជាតិ។ រាជរដ្ឋាភិបាលក៏បានជំរុញលើកទឹកចិត្តផងដែរឱ្យមានការបង្កើតជាក្លឹបហ្វឹកហាត់ក្បាច់គុនបុរាណខ្មែរ និងរៀបចំឱ្យមានការប្រកួតកីឡាប្រដាល់ប្រភេទនេះឲ្យបានកាន់តែច្រើនឡើងថែមទៀតក្នុងក្របខ័ណ្ឌជាតិនិងតំបន់។
ជាលទ្ធផលក្នុងការក្រកួតក្បាច់គុនបុរាណខ្មែរជាលក្ខណៈមិត្តភាពអន្តរជាតិ កីឡាករកម្ពុជាចំនួន៥នាក់ ឈ្នះកីឡាករ ថៃ ជប៉ុន ឡាវ ដោយពិន្ទុ ចំណែក កីឡាករ សារឿន ច័ន្ទ ឈ្នះកីឡាករឡាវ Lam Tak kong ដោយកីឡាករឡាវ បោះបង់ការប្រកួត នៅទឹកទី៣ ហើយគូចុងក្រោយគឺកីឡាករ ពេជ្រ សីហា ចាញ់កីឡាករបារាំង ដោយពិន្ទុ ។ដោយឡែកគូរប្រកួត ដណ្តើមខែ្សក្រវ៉ាត់ CBF លក្ខណៈអន្តរជាតិ រវាងកីឡាករកម្ពុជាសែន រ៉ាឌី ជាមួយកីឡាករឡាវ THORNG BARNG កីឡាករកម្ពុជា នៅតែគ្រប់គ្រជាម្ចាស់ខ្សែក្រវ៉ាត់ CBF ដដែល៕
No comments:
Post a Comment