អភិបាលខេត្តកំពង់ចាម ទុករយៈពេលមួយអាទិត្យ សម្រាប់មេឃុំជើងព្រៃ ជួសជុលសងការខូតខាតផ្លូវឡើងវិញ

ទាក់ទងនឹងបញ្ហាលោក វ៉ែន សំអុល​ មេឃុំជើងព្រៃ ដែលជាមេឃុំជាប់ឆ្នោតថ្មី បានបញ្ជាឱ្យអេស្កាវ៉ាទ័រកាប់ប្រឡាយទឹក លើចិញ្ចើមផ្លូវលំរបស់គម្រោងបឹងទនេ្លសាបឆ្នាំ ២០១៥​ ស្ថិតនៅភូមិត្រយ៉ងពង​ ឃុំជើងព្រៃ​ ស្រុកបាធាយ អស់ប្រវែង​ ៤០០ម៉ែត្រ ខូចខាតទាំងស្រុង​ ដែលជាគ​ម្រោង​របស់ ADB នោះ ថ្លែងកាលពីព្រឹកថ្ងៃទី០៨ ខែសីហា ឆ្នាំ២០១៧ ក្នុងកិច្ចប្រជុំសាមញ្ញក្រុម​ប្រឹក្សាខេត្តកំពង់ចាមលើកទី៣៩ អាណត្តិទី ២ លោក គួច ចំរើន អភិបាលនៃគណៈអភិបា​លខេត្ត កំពង់ចាម បានលើកឡើងថា ទុករយៈពេលមួយអាទិត្យ សម្រាប់លោកមេឃុំ វ៉ែន សំអុល ជួសជុលផ្លូវនេះឱ្យដូច ដើមឡើងវិញ បើពុំដូច្នោះទេ នឹងធ្វើទៅតាមផ្លូវច្បាប់ ហើយកុំនិ​យាយថាព្រោះជារឿងនយោបាយ ព្រោះនេះគឺការបំផ្លាញ ជាក់ស្តែងលើទ្រព្យសម្បត្តិសាធារណៈ និងផលប្រយោជន៍សាធារណៈ។

គួរបញ្ជាក់ថា ផ្លូវដីស មាត់ប្រឡាយនៃគម្រោងរបស់ដៃគូអភិវឌ្ឍដែលមានឈ្មោះថា គម្រោងកាត់បន្ថយភាពក្រីក្រ និងអភិវឌ្ឍន៍កសិកម្មខ្នាតតូចតំបន់ទន្លេសាប ក្រោមជំនួយថវិការបស់ធនាគារអភិវឌ្ឍអា​ស៊ី ADB ស្ថិតក្នុងឃុំជើងព្រៃ ស្រុកបាធាយ ដែលចំណាយថវិកាអស់ជាង ២ម៉ឺនដុល្លារអាមេរិក ត្រូវបានលោក វ៉ែន សំអុល មេឃុំជើងព្រៃ ស្រុកបាធាយ ខេត្តកំពង់ចាម មកពីគណបក្សសង្គ្រោះ​​ជាតិ យកគ្រឿងចក្រជីកកាប់បំផ្លាញក្នុងមួយពព្រិចភ្នែក៕

កម្ពុជា សម្រេចបានលទ្ធផលយ៉ាងត្រចះត្រចង់ ក្នុងដំណើរទស្សនកិច្ចផ្លូវការនៅជប៉ុន

នៅក្នុងដំណើរនៃការបំពេញទស្សនកិច្ចការងារនៅប្រទេសជប៉ុនពីថ្ងៃទី០៦-០៩ ខែសីហា ឆ្នាំ២០១៧ របស់លោកនាយករដ្ឋមន្រ្តី ហ៊ុន សែន ដើម្បីពង្រឹង និងពង្រីកបន្ថែមទៀតនូវទំនាក់ទំនងមិត្តភាពប្រពៃណីដ៏ជិតស្និទ្ធ និងកិច្ចសហប្រតិបត្តិការជាដៃគូយុទ្ធសាស្រ្តរវាងប្រទេសទាំងពីរ កម្ពុជា សម្រេចបានលទ្ធផលជាផ្លែផ្កាក្នុងវិស័យនយោបាយ សេដ្ឋកិច្ច វប្បធម៌ និងអន្តរជាតិដែលមានភាពកាន់តែប្រសើរឡើង និងរីកចម្រើនពីមួយថ្ងៃទៅមួយថ្ងៃ។

សូមអានលទ្ធផលនៃទស្សនកិច្ចការងារផ្លូវការរបស់លោកនាយករដ្ឋមន្រ្តី ហ៊ុន សែន ដូចខាងក្រោម៖

ក្រសួងទេ​សចរណ៍ រៀបចំសិក្ខាសាលា​ភាពជាដៃគូរដ្ឋឯកជ​នក្នុងការអនុវត្ត​គម្រោងសាលា​បណ្តុះបណ្តាលវិជ្ជាជីវៈម្ហូបអាហារ (ACAC)

នៅថ្ងៃទី០៩ ខែសីហា ឆ្នាំ២០១៧ ក្រសួងទេសចរណ៍ បានរៀបចំសិក្ខាសាលា «ភាពជាដៃគូរដ្ឋឯកជនក្នុងការអនុវត្តគម្រោងសាលាបណ្តុះបណ្តាលវិជ្ជាជីវៈម្ហូបអាហារ (ACAC)» ក្រោមអធិបតីភាពលោក ប៉ាក់ សុខុម រដ្ឋលេខាធិការក្រសួងទេសចរណ៍ និងជាប្រធានក្រុមប្រឹក្សាភិបាលសាលាបណ្តុះបណ្តាលវិជ្ជាជីវៈម្ហូបអាហារ ACAC ដោយមានការចូលរួមពីសំណាក់ លោក អ៊ឹម កុច រដ្ឋលេខាធិការក្រសួងអប់រំ យុវជន និងកីឡា លោកស្រី តឹក រ៉េតកំរង រដ្ឋលេខាធិការក្រសួងពាណិជ្ជកម្ម លោក Pierre Tami នាយកអង្គការ Shift 360 និងមានការចូលរួមពីតំណាងក្រសួងការងារ និងបណ្តុះបណ្តាលវិជ្ជាជីវៈ ក្រសួងសេដ្ឋកិច្ច និងហិរញ្ញវត្ថុ អង្គការជាតិ អន្តរជាតិ សាលាបណ្តុះបណ្តាល សមាគមចុងភៅ និងភាគីឯកជនប្រមាណ ៣៥រូប នៅទីតាំងសលាបណ្តុះបណ្តាលវិជ្ជាជីវៈម្ហូបអាហារ (ACAC)។

សាលាបណ្តុះបណ្តាលវិជ្ជាជីវៈម្ហូបអាហារ (ACAC) ជាសាលាបណ្តុះបណ្តាលយុវជនកម្ពុជាលើជំនាញធ្វើម្ហូបស្របតាមកម្មវិធីសិក្សាអាស៊ាន ដែលក្រសួងទេសចរណ៍បានដាក់ចុះ និងកម្មវិធីសិក្សារបស់សាលា Lusan ប្រទេសស្វីស។ សាលាបណ្តុះបណ្តាលវិជ្ជាជីវៈម្ហូបអាហារ (ACAC) នឹងជួយបណ្តុះបណ្តាលយុវជនកម្ពុជាឆ្លើយតបទៅនឹងផែនការយុទ្ធសាស្ត្រអភិវឌ្ឍន៍ធនធានមនុស្សក្នុងវិស័យទេសចរណ៍ ២០១៧-២០២៥ របស់ក្រសួងទេសចរណ៍ ដើម្បីផ្គត់ផ្គង់កម្លាំងពលកម្មជំនាញក្នុងវិស័យទេសចរណ៍ដែលមានតម្រូវការខ្ពស់។ វគ្គសិក្សានៅសាលាបណ្តុះបណ្តាលវិជ្ជាជីវៈម្ហូបអាហារ (ACAC) មានរយៈពេល ២ឆ្នាំ ដែលសិស្សានុសិស្សនឹងមានការទទួលស្គាល់គុណវុឌ្ឍិពីលេខាធិការដ្ឋានអាស៊ានផងដែរ។ ជាទូទៅយុវជនរៀនរយៈពេល ២ឆ្នាំ ចេញធ្វើការទទួលបានប្រាក់បៀវត្សចាប់ពី ៤០០-៥០០ ដុល្លារអាមេរិក ឬពួកគាត់អាចបង្កើតអាជីវកម្មក្នុងសេវាកម្មភោជនីយដ្ឋានដោយខ្លួនឯង។

សូមរំលឹកផងដែរថា រយៈពេល ០៦ខែដើមឆ្នាំ២០១៧ នេះកម្ពុជា ទទួលបានទេសចរអន្តរជាតិប្រមាណ ២.៦លាននាក់ កើនឡើងប្រមាណ ១២,៨% ធៀបនឹងរយៈពេលដូចគ្នាក្នុងឆ្នាំ២០១៦។ ជាចក្ខុវិស័យនៅឆ្នាំ២០២០ កម្ពុជា រំពឹងទទួលបានទេសចរអន្តរជាតិប្រមាណ ៧លាននាក់ បង្កើតការងារជិត ១លាននាក់ និងនាំចំណូលចូលសេដ្ឋកិច្ចជាតិ ប្រមាណ៥ពាន់លានដុល្លារ។ ដើម្បីសម្រេចបានចក្ខុវិស័យអភិវឌ្ឍទេសចរណ៍នឆ្នាំ២០២០ ក្រសួងទេសចរណ៍បានដាក់ចុះនូវផែនការសកម្មភាព និងយុទ្ធនាការរយៈពេលខ្លី និងមធ្យមដោយផ្តោតលើ មុំយុទ្ធសាស្ត្រចំនួន ៤ រួមមាន៖គឺ ១-ការបង្កើតនិងផ្សព្វផ្សាយផលិតផលទេសចរណ៍ថ្មី ២-ពង្រឹងគុណភាពសេវាកម្មទេសចរណ៍ ៣-ការអនុវត្តបច្ចេកវិទ្យាព័ត៌មានវិទ្យាក្នុងវិស័យទេសចរណ៍(E-Tourism) ៤-ពង្រឹងការអភិវឌ្ឍធនធានមនុស្ស។

សូមជម្រាបផងដែរថា រហូតមកដល់បច្ចុប្បន្ន ក្រសួងទេសចរណ៍ បានធ្វើការបណ្តុះបណ្តាលគ្រូបង្គោល និងអ្នកវាយតម្លៃបង្គោលអាស៊ានចំនួន ៣០រូប គ្រូបង្គោល និងអ្នកវាយតម្លៃបង្គោលជាតិចំនួន៥៤២ រូប ឯកសារបណ្តុះបណ្តាល ៩៧៦ក្បាល អ្នកជំនាញទេសចរណ៍ប្រមាណ ២០០០នាក់ ទទួលស្គាល់សាលបណ្តុះបណ្តាលវិជ្ជាជីវៈចំនួន ១២ និងលើក ទឹកចិត្តការបង្កើត សាលាថ្មីៗ រួមមានសាលាជាតិបណ្តុះបណ្តាលវិជ្ជាជីវៈទេសចរណ៍ចំនួន២ នៅរាជធានីភ្នំពេញ និងខេត្តព្រះសីហនុ ក្រោមឥណទានរបស់ទីភ្នាក់ងារបារាំងសម្រាប់ការអភិវឌ្ឍន៍ (AFD)៕

នាយឧត្តមសេនីយ៍ ជួន សុវណ្ណ បញ្ជាឱ្យកម្លាំងនគរបាលទាំង១២ខណ្ឌ បង្កើនការបង្ក្រាបបទល្មើសតាមមូលដ្ឋានជាពិសេសប្លន់ ឆក់ និងគ្រឿងញៀន

(ភ្នំពេញ)៖​ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ នាយឧត្តមសេនីយ៍ ជួន សុវណ្ណ បានដាក់បទបញ្ជាទៅកងកម្លាំងនគរបាលទាំង១២ខណ្ឌ និងនគរបាលជំនាញរបស់ស្នងការ បន្ដបើកប្រតិបត្តិការបង្ក្រាបបទល្មើស កាន់តែខ្លាំងឡើងតាមមូលដ្ឋាន ទិសដៅរក្សាសន្ដិសុខ សុវត្ថិភាព និងសណ្ដាប់ធ្នាប់ជូនប្រជាពលរដ្ឋ ជាពិសេសនោះបទល្មើសប្លន់ បទល្មើសឆក់ និងគ្រឿងញៀនដែលថ្នាក់ដឹកនាំព្រួយបារម្ភ និងយកចិត្តទុកដាក់យ៉ាងខ្លាំង។

ការដាក់បទបញ្ជាសារជាថ្មី របស់នាយឧត្តមសេនីយ៍ខាងលើនេះ បានធ្វើឡើងនៅក្នុងពិធីប្រកាសផ្ទេរភារកិច្ច តែងតាំងមុខតំណែង និងបំពាក់ឋានន្ដរស័ក្ដិជូននគរបាល រាជធានីភ្នំពេញ ចំនួន១១១នាក់ ក្នុងនោះផ្ទេរភារកិច្ច និងតែងតាំងមុខតំណែងចំនួន៦១នាក់ ចាប់ពីនាយរងប៉ុស្ដិ៍នគរបាលរដ្ឋបាល រហូតដល់នាយរងការិយាល័យ និងបំពាក់ឋានន្ដរស័ក្ដិ វរសេនីយ៍ត្រី វរសេនីយ៍ទោ ចំនួន៥០នាក់ នៅព្រឹកថ្ងៃទី០៩ ខែសីហា ឆ្នាំ២០១៧នេះ។ នៅចំពោះមុខកងកម្លាំងនគរបាលទាំងអស់ នាយឧត្តមសេនីយ៍ ជួន សុវណ្ណ បានបញ្ជាក់ថា បទល្មើសនានាជាពិសេសឆក់ និងគ្រឿងញៀន បានកើតឡើងគួរឱ្យព្រួយបារម្ភ ដូច្នេះអធិការខណ្ឌទាំង១២ និងនាយការិយាល័យជំនាញរបស់ស្នងការដ្ឋាន ត្រូវបង្កើនប្រតិបត្តិការចុះស្រាវ​ជ្រាវ និងបង្ក្រាបខ្លាំងណាស់ឡើង ដើម្បីរក្សាសុវត្ថិភាព សន្ដិសុខ និងសណ្ដាប់ធា្នប់ជូនប្រជាពលរដ្ឋ។

នាយឧត្តមសេនីយ៍ បានបន្ដទៀតថា យុទ្ធនាការបង្ក្រាបគ្រឿងញៀនខុសច្បាប់រយៈពេល៦ខែ ត្រូវបានបញ្ចប់ហើយយុទ្ធនាការថ្មី បានចាប់ផ្ដើមបន្ដតាំងពីថ្ងៃទី០១ ខែកក្កដា ដូច្នេះកងកម្លាំងនគរបាលទាំងអស់ត្រូវបង្កើនការងារនេះ ប្រកបដោយការទទួលខុសត្រូវ និងមានឆន្ទៈពិតប្រាកដ។ ជាមួយគ្នានេះ នាយឧត្តមសេនីយ៍ស្នងការ ក៏បានណែនាំឱ្យ និងជំរុញដល់នគរបាលទាំង១១១នាក់ ទើបទទួលការផ្ទេរភារកិច្ចតែងតាំងមុខតំណែងថ្មី និងបំពាក់ឋានន្ដរស័ក្ដិ នៅពេលនេះ ត្រូវខិតខំបន្ដការងារឱ្យកាន់តែមានប្រសិទ្ធភាព ជាពិសេសនគរបាលទាំងអស់ ត្រូវរួមគ្នាបម្រើសេវាជូនប្រជាពលរដ្ឋតាមមូលដ្ឋានឱ្យមានប្រសិទ្ធិភាពជាទីបំផុត៕

(ប្រភព៖ Fresh News)

កម្ពុជា នឹងធ្វើជាម្ចាស់ផ្ទះនៃជំនួបសិទ្ធិមនុស្ស (Human Rights Dialogue) ជាមួយស៊ុយអ៊ែតនៅខែតុលា

នៅថ្ងៃទី០៩ ខែសីហា ឆ្នាំ២០១៧ លោក កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា និងលោកស្រី Maria Sargen ឯកអគ្គរាជទូតស៊ុយអ៊ែតប្រចាំកម្ពុជា បានជួបពិភាក្សាការងារអំពីការរៀបចំកិច្ចពិគ្រោះយោបល់ស្តីពីសិទ្ធិមនុស្សរវាងកម្ពុជា និងស៊ុយអ៊ែតនៅទីស្នាក់ការគណៈកម្មាធិការសិទ្ធិមនុស្សកម្ពុជា។

បន្ទាប់ពីកិច្ចប្រជុំរួច លោក ជេត ជាលី អនុប្រធានគណៈកម្មាធិការសិទ្ធិមនុស្សកម្ពុជា បានផ្តល់បទសម្ភាសន៍នៅក្នុងសន្និសីទសារព័ត៌មាន ថា កិច្ចប្រជុំនេះ គឺជាការប្រជុំត្រៀមលក្ខណៈដើម្បីមានជំនួបសិទ្ធិមនុស្សមួយនៅថ្ងៃទី១៦-១៨ ខែតុលា ឆ្នាំ២០១៧ខាងមុខ រវាងកម្ពុជា និងស៊ុយអ៊ែត។

អនុប្រធានគណៈកម្មាធិការសិទ្ធិមនុស្សកម្ពុជា បានបញ្ជាក់ថា ជំនួបសិទ្ធិមនុស្សនាពេលខាងមុខផ្តោតលើប្រធានបទមួយចំនួនដូចជា៖ ១-ភាពស្មើគ្នានៃសិទ្ធិរបស់ស្រ្តី និងភេទទីបី ២- សិទ្ធិទទួលបានព័ត៌មាន ៣- ការសរសេររបាយការណ៍តាមកាលកំណត់របស់អង្គការសហប្រជាជាតិ ៤-ស្ថាប័នសិទ្ធិមនុស្សជាតិ បទពិសោធន៍របស់ប្រទេសស៊ុយអ៊ែត និង៥- សិទ្ធិកម្មករ ពលករ។ លោក ជេត ជាលី ក៏បានបញ្ជាក់ថា ភាគីស៊ុយអ៊ែត បានថ្លែង​កោតសរសើរពីការសម្រេចចិត្តច្បាស់លាស់របស់កម្ពុជា ដែលស្មោះត្រង់ ក្លាហាន គ្រប់សាច់រឿងដោយគ្មានការលាក់បាំងនោះឡើយ៕

កម្ពុជា នឹងបញ្ជូនពលការិនីជំនួយការមេផ្ទះជាលើកដំបូងទៅធ្វើការនៅតំបន់រដ្ឋបាលពិសេសហុងកុង

រាជរដ្ឋាភិបាលកម្ពុជា តាមរយ:ក្រសួងការងារ និងបណ្តុះបណ្តាលវិជ្ជាជីវ: កំពុងរៀបចំធ្វើការ ជ្រើសរើស និងបណ្តុះបណ្តាលគ្រប់គ្រង និងបញ្ជូនពលការិនីជាជំនួយការមេផ្ទះ ទៅធ្វើការនៅ តំបន់រដ្ឋបាលពិសេសហុងកុងនៅចុងឆ្នាំ២០១៧ខាងមុខ។ នៅក្នុងសិក្ខាសាលាស្តីពីការផ្សព្វផ្សាយ និងបញ្ជូនពលការិនីជំនួយការមេផ្ទះនេះ នៅថ្ងៃទី០៩ ខែសីហា ឆ្នាំ២០១៧ លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវ: បានប្រសាសន៍ថា ការងារជំនួយការមេផ្ទះនៅហុងកុងនេះមានលក្ខខណ្ឌការងារល្អ ប្រាក់ឈ្នូលចាប់ពី៥០០ដុល្លារឡើងទៅ រូមនឹងទទួលបានអត្ថប្រយោជន៍ផ្សេងៗទៀត។

លោក ក៏បានបញ្ជាក់ថា គម្រោងដែលកម្ពុជាធ្វើការបញ្ជូនពលការិនីជំនួយការមេផ្ទះទៅតំបន់រដ្ឋបាលពិសេសហុងកុងនេះ មិនមានការកំណត់នោះទេ ប៉ុន្តែជាជំហានដំបូងនោះនឹងធ្វើការបញ្ជូនប្រមាណជា១ពាន់នាក់ ប្រសិនបើមានប្រជាពលរដ្ឋមានការចាប់អាម្មណ៍ចំពោះការងារនេះ។ ការជ្រើសរើសឱ្យចូលទៅបម្រើការងារនេះ ក្រសួង បានប្រគល់សិទ្ធិទៅឱ្យក្រុមហ៊ុនជ្រើសរើសពលករមានអាជ្ញាប័ណ្ណពីក្រសួង ចំនួន៥ជាអ្នកធ្វើការជ្រើសរើសចៀសវាងមានក្រុមហ៊ុនបន្លំបោកប្រាស់។

សូមបញ្ជាក់ថា បច្ចុប្បន្នកម្ពុជា បានបញ្ជូនពលករទៅបម្រើការងារនៅប្រទេសចំនួន៥ប្រទេសមាន ថៃ សាធារណរដ្ឋកូរ៉េ ម៉ាឡេស៊ី ជប៉ុន និងសិង្ហបុរី។ ការបញ្ជូនពលការិនីទៅធ្វើការនៅតំបន់សេដ្ឋកិច្ចពិសេសហុងកុងនេះ គឺស្របទៅនឹងគោលនយោបាយរបស់រាជរដ្ឋាភិបាលកម្ពុជា ហើយរាជរដ្ឋាភិបាលកម្ពុជា មានទំនាក់ទំនងល្អជាមួយនឹងប្រទេសចិនផងដែរ៕

កាកបាទក្រហមកម្ពុជា​ រៀបចំកម្មវិធី​វះកាត់​ឆែបមាត់​ ឆែបក្រអូម​ដោយ​មិនគិតប្រាក់​

កាកបាទក្រហមកម្ពុជា កាលពីថ្ងៃទី០៨ ខែសីហា ឆ្នាំ២០១៧ បានចេញសេចក្តីជូនដំណឹងស្តីពី កម្មវិធីវះកាត់ឆែបមាត់ ឆែបក្រអូម ដោយមិនគិតប្រាក់ នៅមន្ទីរពេទ្យខេត្តសៀមរាប ចាប់ពីថ្ងៃ១២ ដល់១៦ ខែសីហា ឆ្នាំ២០១៧ និងថ្ងៃទី១៦ ដល់២០ ខែតុលា ឆ្នាំ២០១៧ នៅមន្ទីរពេទ្យមិត្តភាពខ្មែរសូវៀត។

ព័ត៌មានលម្អិតសូមអានសេចក្តីជូនដំណឹងខាងក្រោម៖