ប្រមុខរាជរដ្ឋាភិបាលកម្ពុជា ប្រកាសដាក់ «កាតព្វកិច្ចវ៉ាក់សាំង» លើកងកម្លាំងប្រដាប់អាវុធ និងមន្ត្រីរាជការ

 (ភ្នំពេញ)៖ លោកនាយករដ្ឋមន្រ្តី ហ៊ុន សែន បានប្រកាសដាក់ចេញ «កាតព្វកិច្ចវ៉ាក់សាំង» លើកងកម្លាំងប្រដាប់អាវុធ និងមន្ត្រីរាជការស៊ីវិល លើកលែងតែប្រជាពលរដ្ឋ ដែលត្រូវស្ថិតនៅក្នុងគោលការណ៍ស្ម័គ្រចិត្ត ដើម្បីទទួលបានវ៉ាក់សាំងប្រឆាំងកូវីដ១៩។

ក្នុងសន្និសីទសារព័ត៌មានមួយ ដែលបានធ្វើឡើងនៅថ្ងៃទី១០ ខែមេសា ឆ្នាំ២០២១នេះ លោកនាយករដ្ឋមន្ត្រី បានថ្លែងថា ក្នុងនាមជាប្រមុខរាជរដ្ឋាភិបាលកម្ពុជា លោកមានសិទ្ធិដាក់ «កាតព្វកិច្ចវ៉ាក់សាំង» សម្រាប់កងកម្លាំងប្រដាប់អាវុធ និងមន្ត្រីរាជការស៊ីវិល។

លោកនាយករដ្ឋមន្រ្តី ហ៊ុន សែន មានប្រសាសន៍បញ្ជាក់យ៉ាងដូច្នេះថា៖ «ក្នុងប៉ុន្មានថ្ងៃនេះ គេបានស្តីបន្ទោសខ្ញុំថា រំលោភលើគោលការណ៍ស្ម័គ្រចិត្ត (រឿងចាក់វ៉ាក់សាំងកូវីដ-១៩) តែខ្ញុំសូមបញ្ជាក់ឲ្យច្បាស់ ក្នុងឋានៈជាប្រមុខនៃរាជរដ្ឋាភិបាលរបស់ប្រទេស។ ខ្ញុំត្រូវមានភារកិច្ច ដាក់ជាកាតព្វកិច្ច «វ៉ាក់សាំងកាត្វកិច្ច» ឲ្យកងកម្លាំងប្រដាប់អាវុធ និងមន្ត្រីរាជការស៉ីវិលទាំងអស់ តែសម្រាប់ប្រជាពលរដ្ឋ គឺគោលការណ៍ស្ម័គ្រចិត្ត»។

បើតាមប្រសាសន៍លោកនាយករដ្ឋមន្ត្រី, «វ៉ាក់សាំងកាតព្វកិច្ច» គឺជាយុទ្ធសាស្ត្រដើរមុនសភាពការណ៍ ដោយលោកព្យាករថា ទៅថ្ងៃមុខពិភពលោកទាំងអស់ នឹងដាក់ចេញគោលការណ៍កាតព្វកិច្ចវ៉ាក់សាំងនេះផងដែរ។ លោកបានថ្លែងថា ទៅថ្ងៃក្រោយអ្នកមិនចាក់វ៉ាក់សាំង នឹងមិនត្រូវគេអនុញ្ញាតឲ្យចូលប្រទេសគេនោះទេ ហើយសូម្បីតែនៅអឺរ៉ុប ក៏រៀបចំឲ្យមានលិខិតឆ្លងដែនសម្រាប់អ្នកចាក់វ៉ាក់សាំងកូវីដ១៩ដែរ។

លោកនាយករដ្ឋមន្រ្តីប្រមុខដឹកនាំកំពូលរាជរដ្ឋាភិបាលកម្ពុជា បានថ្លែងថា ធ្វើមេដឹកនាំគ្រប់គ្រងប្រទេសត្រូវតែហ្មត់ចត់ បើមិនហ្មត់ចត់មិនអាចដឹកនាំបានទេ ហើយសូម្បីព្រះចៅអធិការវត្ត ក៏ត្រូវមានវិន័យដែរ។ លោកនាយករដ្ឋមន្រ្តី ហ៊ុន សែន បានឲ្យក្រុមអ្នកសិទ្ធិមនុស្សពិចារណា រវាងការដាក់ចេញវិធានការការពារជីវិតមនុស្ស និងទុកឲ្យមនុស្សស្លាប់ដោយជំងឺកូវីដ១៩ តើយកមួយណា? លោកបន្តថា គេចង់ថាលោកផ្តាច់ការ ឬរំលោភសិទ្ធិមនុស្សក៏ថាទៅ តែសំខាន់លោកការពារអាយុជីវិតពលរដ្ឋមួយប្រទេស។

ក្នុងសន្និសីទនេះ លោកនាយករដ្ឋមន្រ្តី ហ៊ុន សែន ថែមទាំងបានច្រានចោលចំពោះមតិអកុសលពីក្រុមប្រឆាំងរាជរដ្ឋាភិបាល រឿងលោករៀបចំឲ្យមានប៉ាឆា (ឈានបដ្ឋាន) គឺជាការប្រមាថជីវិតប្រជាជន ប៉ុន្តែលោកថានោះជាការដើរមុនសភាពការណ៍ផងដែរ ព្រោះបើមិនរៀបចំបែបនេះទេ តើនឹងមានអ្វីកើតឡើង ខណៈកម្ពុជាកំពុងជួបករណីឆ្លងកូវីដ-១៩ ព្រឹត្តិការណ៍សហគមន៍ ២០កុម្ភៈ យ៉ាងធ្ងន់ធ្ងរ។ លោកលើកឡើងទៀតថា ការដើរមុនភាពការណ៍បែបនេះ ធ្វើឲ្យលោកឈ្នះក្រុមប្រឆាំងរហូតមក ហើយនឹងបន្តឈ្នះជារៀងដរាប។

លោកនាយករដ្ឋមន្រ្តីបញ្ជាក់ថា «ត្រូវចាំ! ដោយសារ ហ៊ុន សែន ដើរមុនសភាពការណ៍ដូច្នេះ បានជា ហ៊ុន សែន ឈ្នះមុនលោកឯង ជារៀងរហូត ហើយក៏នៅតែឈ្នះលោកឯងជារឿងរហូត ទៅដែរ។ បើលោកឯង គិតតែពីដើរព្យាបាទ ឯខ្ញុំគ្រប់គ្រងសភាពការណ៍មុនមួយជំហាន បើទោះបីជាវាមិនបានល្អឥតខ្ញុំ តែខ្ញុំក៏បានកាត់បន្ថយនូវហានីភ័យ»។

ពាក់ព័ន្ធនឹងរឿងវ៉ាក់សាំងប្រឆាំងកូវីដ-១៩ លោកនាយករដ្ឋមន្រ្តី ហ៊ុន សែន បានថ្លែងថា នៅឆ្នាំ២០២១នេះ វ៉ាក់សាំងជាង ១១លានដូស នឹងមកដល់ប្រទេសកម្ពុជា បើមិនមានអ្វីប្រែប្រួលទេនោះ។ លោកនាយករដ្ឋមន្រ្តី ហ៊ុន សែន បានថ្លែងថា វ៉ាក់សាំង ៥០ម៉ឺនដូស មកដល់ខែមេសា ១លាន ៥សែនដូស មកដល់ខែឧសភា ៣លានដូស មកដល់ខែមិថុនា ២លានដូស មកដល់ខែកក្កដា និង ១លានដូស មកដល់ខែសីហា។

លោកនាយករដ្ឋមន្ត្រី ហ៊ុន សែន ធ្លាប់ប្រកាសថា កម្ពុជាត្រៀមវ៉ាក់សាំងកូវីដ-១៩ រហូតដល់ ២០លានដូស ដើម្បីចាក់ជូនកងកម្លាំងប្រដាប់អាវុធ មន្ត្រីរាជការស៊ីវិល និងប្រជាពលរដ្ឋដោយឥតគិតថ្លៃ ហើយសូម្បីតែជនបរទេស ដែលរស់នៅកម្ពុជាស្របច្បាប់ ក៏ទទួលបានវ៉ាក់សាំងដោយឥតគិតថ្លៃផងដែរ។ គិតត្រឹមយប់ថ្ងៃទី៩ ខែមេសា ឆ្នាំ២០២១ ក្រសួងការពារជាតិ បានចាក់វ៉ាក់សាំងកូវីដ១៩ ជូនកងកម្លាំង ២១៦,៩០៣នាក់ ខណៈក្រសួងសុខាភិបាល បានចាក់ជូនជនស៊ីវិលទូទាំងប្រទេស ៦៧៨,៤០៦នាក់៕