ក្រចេះ ÷ នៅថ្ងៃទី៣១ ខែសីហា ឆ្នាំ២០២០ នៅភូមិដីដុះ ឃុំព្រែកប្រសព្វ ខេត្តក្រចេះ បានរៀបចំវេទិការសាធារណៈរបស់ក្រុមការងាររាជរដ្ឋាភិបាលចុះមូលដ្ឋានស្រុកព្រែកប្រសព្វ ដើម្បីត្រួតពិនិត្យ និងគាំទ្រការអនុវត្តកម្មវិធីនយោបាយ និងយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាលកម្ពុជា ដឹកនាំដោយលោក ចៅ ផល្លី រដ្ឋលេខាធិការក្រសួងការពារជាតិ និងលោក ប៉ែន លីណាត អភិបាលរងខេត្តក្រចេះ។
ក្នុងនោះ លោក ចៅ ផល្លី ប្រធានអង្គវេទិការ បានមានប្រសាសន៍បកស្រាយ និងជម្រុញបន្ថែមដល់អាជ្ញាធរដែនដី សមត្ថកិច្ចគ្រប់លំដាប់ថ្នាក់ រួមនិងប្រជាពលរដ្ឋរស់នៅក្នុងមូលដ្ឋាន ត្រូវខិតខំប្រឹងប្រែងបន្ថែមទៀតដើម្បីលុបបំបាត់អោយអស់នូវចំណុចអវិជ្ជមានទាំងឡាយដែលប្រជាពលរដ្ឋបានលើកឡើង -ត្រូវតែធ្វើយ៉ាងណាឲ្យមូលដ្ឋាន ភូមិ.ឃុំ ទទួលបានសុខសុវត្ថិភាព និងមានការអភិវឌ្ឍន៍ឲ្យកាន់តែរីកចំរើនឡើងបន្ថែមទៀត -ខិតខំជួយដោះស្រាយរាល់ទុក្ខកង្វល់ បញ្ហាសុខភាព សន្តិសុខសណ្ដាប់ធ្នាប់ និងការផ្តល់សេវាសាធារណៈ (ការធ្វើលិខិតស្នាមនានា) ជូនប្រជាពលរដ្ឋបានទាន់ពេលវេលាដោយគ្មានយកកំរ៉ៃសេវាឡើយ ជាពិសេសសមត្ថកិច្ចទាំងអស់ត្រូវធ្វើការបង្ក្រាបបទល្មើស លួច ឆក់ ប្លន់ បទល្មើសគ្រឿងញៀនស្របតាមគោលនយោបាយភូមិ ឃុំ មានសុវត្ថិភាព ។
លោកបានបន្តទៀតថា បញ្ហាប្រឈមមុខនាពេលនេះ គឺសុវត្ថិភាពសហគមន៍ និងសុវត្ថិភាពសង្គមទាំងមូល ដោយគ្មានកូវីដ១៩ គឺអាស្រ័យលើបងប្អូនប្រជាពលរដ្ឋនេះតែម្តង ព្រោះប្រសិនបើបងប្អូនចូលរួមអនុវត្តយ៉ាងម៉ឺងម៉ាត់ និងអនុវត្តតាមការណែនាំរបស់ក្រសួងសុខាភិបាល និងរាជរដ្ឋាភិបាល នោះយើងប្រាកដជាយកឈ្នះកូវីដ១៩ ហើយយើងក៏ក្លាយជាប្រទេសគំរូលើពិភពលោកដែរ ក្នុងការប្រយុទ្ធប្រឆាំងនឹងកូវីដ១៩នេះឲ្យរលាយបាត់។
ជាមួយគ្នានេះដែរ លោកក៏បានជម្រុញណែនាំដល់បងប្អូនទាំងអស់ត្រូវបន្តយកចិត្តទុកដាក់ថែទាំសុខភាពរបស់ខ្លួននិងគ្រួសារដោយរស់នៅស្អាត ហូបស្អាត ពិសារទឹកឆ្អិន ត្រូវខិតខំប្របករបររកប្រាក់ចំណូលបន្ថែម ដូចជាការចិញ្ចឹមសត្វ ដាំដំណាំរួមផ្សំ និងការងារផ្សេងៗទៀត ដើម្បីទំនុកបំរុងជីវភាពគ្រួសារឲ្យបានល្អប្រសើរឡើង និងកុំភ្លេចការពារខ្លួឯង កុំអោយឆ្លងជំងឺផ្សេងៗ ពិសេសជំងឺកូវីដ១៩ តាមរយៈការអនុវត្តអោយបានជាប់ជាប្រចាំ នូវវិធានការរក្សាអនាម័យ តាមការណែនាំរបស់ក្រសួងសុខាភិបាល។
លើសពីនេះ រដូវនេះជារដូវវស្សាដូច្នេះត្រូវធ្វើអនាម័យសម្អាតបរិស្ថានជុំវិញផ្ទះឲ្យបានស្អាតល្អ កុំឲ្យមានទឹកដក់ ដែលជាជម្រកកកើតមូសខ្លា បង្កឲ្យកើតជម្ងឺគ្រុនឈាម ឬជម្ងឺផ្សេងៗទៀត ៕
No comments:
Post a Comment