ប្រជាពលរដ្ឋស្រុកចន្ទ្រា សម្តែងការសប្បាយរីករាយនូវចំណាត់ការដោះស្រាយបញ្ហា ការបម្រើសេវារដ្ឋបាលសាធារណៈ និងបានស្នើសុំការអភិវឌ្ឈន៍ក្នុងមូលដ្ឋាន

ស្វាយរៀង៖ នៅថៃ្ងទី២៦ ខែសីហា ឆ្នាំ២០១៩ នៅវត្តសុវណ្ណសាមគ្គីរង្សី (ហៅវត្តកោះគោ) ស្ថិតក្នុងភូមិកោះគោ ឃុំព្រៃគគីរ ស្រុកចន្រ្ទា ខេត្តស្វាយរៀង រដ្ឋបាលស្រុកចន្ទ្រា បានរៀបចំវេទិកាសាធារណៈរបស់ក្រុមការងារថ្នាក់ជាតិចុះមូលដ្ឋានស្រុកចន្រ្ទា ក្រោមអធិបតីភាព លោក អ៊ុយ ថន សមាជិកក្រុមប្រឹក្សាខេត្តស្វាយរៀង និងជាអនុប្រធានក្រុមការងារចុះមូលដ្ឋានស្រុកចន្ទ្រា លោកឧត្តមសេនីយ៍ត្រី ពេជ វិរ: ស្នងការរងនគបាលខេត្តស្វាយរៀងនិងជាអនុប្រធានក្រុមការងារចុះមូលដ្ឋានស្រុកចន្ទ្រា។

ព្រមទាំងមានការអញ្ជើញចូលរួមក្នុងអង្គវេទិកានោះរួមមាន៖ លោក គង់ វស្សា ប្រធានក្រុមប្រឹក្សាស្រុក លោក ថន ថាវុទ្ធា អភិបាលនៃគណៈអភិបាលស្រុក លោក លោកស្រី ជាក្រុមការងារចុះមូលដ្ឋានស្រុកចន្ទ្រា លោក លោកស្រីអភិបាល អភិបាលរងស្រុក លោកនាយករដ្ឋបាលសាលាស្រុក លោក លោកស្រីប្រធាន អនុប្រធាន អង្គភាព ការិយាល័យនានាជុំវិញស្រុក ក្រុមប្រឹក្សាឃុំ ស្មៀនឃុំ មេភូមិ និងប្រជាពលរដ្ឋក្នុងភូមិកោះគោ និងភូមិត្រពាំងបុណ្យ សរុបវត្តមានចូលរួមមានចំនួន ១៣៦ នាក់ ។

នៅក្នុងឱកាសនោះ ប្រជាពលរដ្ឋក៏បានលើកឡើងនូវបញ្ហាប្រឈម និងសំណូមពរមួយចំនួនពាក់ព័ន្ធទៅនឹងដំណោះស្រាយបញ្ហាជីវភាពរស់នៅជាប្រចាំថ្ងៃក្នុងមូលដ្ឋានរបស់ខ្លួនមានដូចខាងក្រោម៖
១. ស្នើសុំតភ្ជាប់បណ្ដាញអគ្គិសនីប្រើប្រាស់នៅក្នុងភូមិកោះគោ និងភូមិត្រពាំងបុណ្យ។
២. ស្នើសុំធ្វើផ្លូវកៅស៊ូ ឬ ផ្លូវបេតុងនៅភូមិកោះគោ ។
៣. ស្នើសុំជួយជំរុញធ្វើអត្តសញ្ញាណប័ណ្ណឲ្យបានឆាប់រហ័ស
៤. ស្នើសុំជួយសាងសង់អាគារសាលាបឋមសិក្សាកោះគោ ។
៥. សុំឱ្យមេឃុំធ្វើសំបុត្រអាពាហ៍ពិពាហ៍ឲ្យបានឆាប់រហ័ស។

ចំពោះបញ្ហាប្រឈម និងសំណូមពរខាងលើត្រូវបាន លោកគណៈអធិបតី និងក្រុមការងារធ្វើការបំភ្លឺ និងដោះស្រាយបញ្ហាទាំងនោះជូនប្រជាពលរដ្ឋបានរួចរាល់។រីឯបញ្ហាប្រឈមពាក់ព័ន្ធនានាដែលនៅសេសសល់មួយចំនួនទៀត ក្រុមការងារនឹងធ្វើការរាយការណ៍ជូនថ្នាក់ដឹកនាំ ដើម្បីរិះរកវិធីដោះស្រាយបញ្ហាទាំងនោះនៅពេលក្រោយទៀត៕