លោក ហ៊ុន ម៉ានី ចុះសួរសុខទុក្ខពលករខ្មែរបម្រើការនៅប្រទេសថៃ និងប្រាប់ពីការខិតខំរបស់រាជរដ្ឋាភិបាលកម្ពុជា

តំណាងរាស្ដ្រមណ្ឌលកំពង់ស្ពឺ លោក ហ៊ុន ម៉ានី នៅថ្ងៃទី០៨ ខែតុលា ឆ្នាំ២០១៧ អមដំណើរដោយ ថ្នាក់ដឹកនាំ និងក្រុមការងារជាច្រើនរូប បានទៅបំពេញទស្សនៈកិច្ច និងសាកសួរសុខទុក្ខសំណេះសំណាល ជាមួយបងប្អូន ពលករខ្មែរប្រមាណជាង៤០០នាក់ ដែលកំពុងបម្រើការងារនៅក្រុមហ៊ុន CPF Co.,Ltd ស្ថិតនៅ ខេត្តឆាក់ឈើងសៅ ប្រទេសថៃ។

លោក ហ៊ុន ម៉ានី បានលើកឡើងអំពីកិច្ចគាំពារ និងការយកចិត្តទុក្ខដាក់យ៉ាងខ្លាំងក្លារបស់ រាជរដ្ឋាភិបាលកម្ពុជា ដែលដឹកនាំដោយលោកនាយករដ្ឋមន្ត្រី ហ៊ុន សែន ចំពោះបងប្អូនពលករខ្មែរ ដែលនៅធ្វើការងារនៅក្រៅ ប្រទេស ជាពិសេសស្ថានទូតកម្ពុជាប្រចាំប្រទេសថៃ និងក្រសួងការងារ និងបណ្តុះបណ្តាលវិជ្ជាជីវៈកម្ពុជា ដែលបានខិតខំសម្របសម្រួលបំពេញឯកសារស្របច្បាប់ ជូនដល់ពលករខ្មែរ ដែលមិនទាន់មានភាព ស្របច្បាប់ក្នុងការធ្វើការងារ។

លោក ហ៊ុន ម៉ានី បន្តថា រាជរដ្ឋាភិបាល នឹងបន្តសម្របសម្រួលជូនដល់ពលករខ្មែរ រហូតដល់ទទួលបានភាព ស្របច្បាប់គ្រប់ៗគ្នា។

បន្ទាប់ពីបញ្ចប់កម្មវិធីសំណេះសំណាល លោក ហ៊ុន ម៉ានី បានបន្ដដឹកនាំគណៈប្រតិភូ អញ្ជើញជួបសួរសុខទុក្ខ ដោយផ្ទាល់ ជាមួយបងប្អូនពលករខ្មែរ ដោយទទួលបាននូវការស្វាគមន៍ ប្រកបដោយភាពរីករាយ រាក់ទាក់ ចំពោះប្រតិភូកម្ពុជា ព្រមទាំងបាននាំគ្នាថតរូបជុំគ្នា យ៉ាងសប្បាយរីករាយ និងគាំទ្រចំពោះដំណើរទស្សនៈកិច្ច នាពេលនេះយ៉ាងក្រៃលែង៕