ខេត្តស្វាយរៀង ត្រៀមរៀបចំពិធីសម្ពោធ​ដាក់ឲ្យប្រើប្រាស់​ជាផ្លូវការ​អគារសាល​ប្រជុំធំ​សាលាខេត្ត​ នាខែធ្នូ​ ឆ្នាំ២០១៧​ខាងមុខនេះ​

ស្វាយរៀង៖ នៅថ្ងៃទី០៩ ខែតុលា ឆ្នាំ២០១៧នេះ លោក ម៉ែន វិបុល អភិបាល នៃគណៈអភិបាលខេត្តស្វាយរៀង រួមនិងអភិបាលរងខេត្ត លោកនាយកទីចាត់ការហិរញ្ញវត្ថុសាលាខេត្ត បានអញ្ជើញចុះត្រួតពិនិត្យការតុបតែងអគារសាលប្រជុំធំសាលាខេត្ត ដើម្បីត្រៀមរៀបចំពិធីសម្ពោធដាក់ឲ្យប្រើប្រាស់ជាផ្លូវការនាខែធ្នូ ឆ្នាំ២០១៧ខាងមុខនេះ។

សូមបញ្ជាក់ថា អគារសាលប្រជុំធំសាលាខេត្តនេះ បានចាប់ផ្ដើមដំណើរការសាងសង់ នៅថ្ងៃទី១៥ ខែកញ្ញា ឆ្នាំ២០១៦ និងបានបញ្ចប់ការសាងសង់កាលពីអំឡុងខែកក្កដា ឆ្នាំ២០១៧ កន្លងទៅថ្មីៗនេះ ដែលមានទំហំ ១.១០៤ម៉ែត្រការ៉េ បណ្ដោយ ៤០ម៉ែត្រ ទទឹង២៧ម៉ែត្រ កម្ពស់ ១៩,៦៥ម៉ែត្រ ស្ថិតនៅក្នុងបរិវេណសាលាខេត្តស្វាយរៀង។ អគារសាលប្រជុំនេះ គឺជាសមិទ្ធផលថ្មី និងជាហេដ្ឋារចនាសម្ព័ន្ធផ្នែករឹងសម្រាប់ជួយសម្រួលដល់ការរៀបចំកិច្ចប្រជុំ និងកម្មវិធីផ្លូវការនានារបស់រដ្ឋបាលខេត្តស្វាយរៀងផងដែរ៕