ខេត្តសៀមរាប ធ្វើពិធីបិទសន្និសីទលើកទី១១ ស្តីពីមិត្តភាពប្រជាជន នឹងប្រជាជន អាស៊ាន-ចិន

លោក ឃឹម ប៊ុនសុង អភិបាលនៃគណៈអភិបាលខេត្តសៀមរាប នៅថ្ងៃទី០៨ ខែសីហា ឆ្នាំ២០១៧ បានអញ្ជើញចូលរួមពិធីបិទសន្និសីទលើកទី១១ ស្ដីពីមិត្តភាពប្រជាជន នឹងប្រជាជនអាស៊ានចិន ក្រោមប្រធានបទ “ពង្រឹងចំណងមិត្តភាពប្រជាជននឹងប្រជាជន អាស៊ានចិន ដើម្បីការពារសន្តិភាព និងសហប្រតិបត្តិការ”  ក្រោមអធិបតីភាព លោក ទេព ងន អនុប្រធានទី២ព្រឹទ្ធសភា។

សន្និសីទដែលបានប្រព្រឹត្តទៅ អស់រយៈពេលពីរថ្ងៃកន្លងនេះ បានធ្វើឡើងប្រកបដោយស្មារតីមិត្តភាព និងសហប្រតិបត្តិការខ្ពស់ រួមផ្លាស់ប្តូរយោបល់ ចែករំលែកទស្សនៈគ្នាទៅវិញទៅមកយ៉ាងទូលំទូលាយ កំណត់នូវកាលានុវត្តភាព និងរួមគ្នាបន្តដោះស្រាយបញ្ហាប្រឈមនានា ក្នុងផលប្រយោជន៍ទៅវិញទៅមក រវាងប្រជាជន និងប្រជាជន អាស៊ាន-ចិន ទាំងបច្ចុប្បន្ន និងអនាគត ដែលក្នុងនោះកិច្ចប្រជុំ បានយកចិត្តទុក្ខដាក់ ពិភាក្សាគ្នាលើចំណុចជាអាទិភាពចំនួន៥៖ ១-រួមគ្នាឆ្លើយតបជាយុទ្ធសាស្រ្ត ខ្សែក្រវ៉ាត់មួយផ្លូវមួយ, ២-កសាងហេដ្ឋារចនាសម្ព័ន្ធ អាស៊ាន-ចិន ដើម្បីសន្តិភាព និងសហប្រតិបត្តិការ, ៣-ចំណងមិត្តភាពយុវជន អាស៊ាន-ចិន ដើម្បីសន្តិភាព និងសហប្រតិបត្តិការ, ៤-ជម្រុញទេសចរណ៍ អាស៊ាន-ចិន អោយកាន់តែរីកចម្រើន និង ៥-រៀបចំដែនដី និងនគររូបនីយកម្ម៕