សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី
នៃព្រះរាជាណាចក្រកម្ពុជា និងគណៈប្រតិភូជាន់ខ្ពស់
រាជរដ្ឋាភិបាលកម្ពុជា បានអញ្ជើញទៅដល់អាកាសយានដ្ឋានទ័ពអាកាស
នៃកងទ័ពភូមិន្ទថៃ ទីក្រុងបាងកក ព្រះរាជាណាចក្រថៃ
ដើម្បីចូលរួមកិច្ចប្រជុំកំពូលស្តីពីកិច្ចសន្ទនា
នៃកិច្ចសហប្រតិបត្តិការអាស៊ី ACD លើកទី២
ដែលនឹងប្រារព្វធ្វើឡើងនៅថ្ងៃទី១០តុលា។
យន្តហោះពិសេសរបស់ព្រះរាជាណាចក្រកម្ពុជា
បានធ្វើការចុះចតប្រកបដោយសុវត្តិភាព កាលពីវេលាម៉ោង៩និង១៥នាទី។
វត្តមាននៃការអញ្ជើញដល់របស់សម្តេចតេជោនាយករដ្ឋមន្រ្តី និងគណៈ
ប្រតិភូត្រូវបានការធ្វើគារវកិច្ចស្វាគមន៍
យ៉ាងស្និតស្នាលរ៉ាក់ទាក់ពីសំណាក់ ឯកឧត្តម ស៊ូរ៉ាផាន់ តានីយូរ៉ាដហាណា រដ្ឋ មន្រ្តីនៃខុទ្ទកាល័យនាយករដ្ឋមន្រ្តីថៃ លោកជំទាវ អ៊ាត សោភា
ឯកអគ្គរាជទូត ព្រះរាជាណាចក្រកម្ពុជា ប្រចាំព្រះរាជាណាចក្រថៃ
ព្រមទាំងឯកឧត្តម លោកជំទាវ ជាឥស្សរជនជាន់ខ្ពស់ រាជរដ្ឋាភិបាលថៃ
និងឥស្សរជនការទូតរបស់ព្រះរាជាណាចក្រកម្ពុជា
ប្រចាំព្រះរាជាណាចក្រថៃជាច្រើនរូប។
តាមកម្មវិធីដែលបានគ្រោងទុក នៅរសៀលថ្ងៃទី៩តុលានេះ
សម្តេចតេជោនាយករដ្ឋមន្រ្តី និងជួបពិភាក្សាទ្វេ ភាគីជាមួយសមភាគីថៃ
ឯកឧត្តមឧត្តមសេនីយ៍ ប្រាយុទ្ធ ច័ន្ទអូចា
នាយករដ្ឋមន្រ្តីថៃ ក្នុងគោលបំណងដើម្បីពង្រឹងនិង
ពង្រីកកិច្ចសហប្រតិបត្តិការ នៃព្រះរាជាណាចក្រទាំងពីរ ឲ្យកាន់តែរឹងមាំ
និងរីកចម្រើនទ្វេឡើងថែមទៀត។ ជាមួយគ្នានេះសម្តេចតេជោ នាយករដ្ឋមន្រ្តី
នឹងជួបពិភាក្សាគ្នាផងដែរជាមួយ ឯកឧត្តម វ៉ាង ក្យូអា (Hwang Kyo-ahn)
នាយករដ្ឋមន្រ្តី នៃសាធារណរដ្ឋកូរ៉េ។
ដូចគ្នានិងបណ្តាមេដឹកនាំអាស៊ីដទៃទៀតដែរនោះ
សម្តេចតេជោនាយករដ្ឋមន្រ្តី នឹងថ្លែងសុន្ទរកថាគន្លឹៈ
ក្នុងពិធីបើកកិច្ចប្រជុំកំពូលស្តីពីកិច្ចសន្ទនា
នៃកិច្ចសហប្រតិបត្តិការអាស៊ី ACD លើកទី២ ក្រោមប្រធានបទ អាស៊ីតែមួយ
ថាមពលចម្រុះ ដែលនឹងប្រារព្វធ្វើឡើងនៅថ្ងៃទី១០តុលា៕
No comments:
Post a Comment