ការថ្លែងបែបនេះ របស់ឯកឧត្តមបណ្ឌិត នៅក្នុងពិធីបើកវគ្គបណ្តុះបណ្តាលស្តីពី «ការពង្រឹងសមត្ថកិច្ចភាព ក្នុងការដោះស្រាយវិវាទការងារ ការទប់ស្កាត់ និងដោះស្រាយបញ្ហាកូដកម្ម បាតុកម្ម»។
ឯកឧត្តមបណ្ឌិត ពេជ សោភ័ណ បានបញ្ជាក់ថា ការធ្វើកូដកម្ម បាតុកម្ម នៅប្រទេសណា ទីណាកន្លែងក៏ដោយ ជាពិសេសនៅកម្ពុជា ច្រើនតែចេញពីស្រទាប់យុវជនភាគច្រើនដូចគ្នា ដូច្នេះការធ្វើបាតុកម្មទាំងនោះ មិនមែនជាការល្អសម្រាប់ប្រទេសជាតិនោះទេ គឺច្រើនតែអ្នកនយោបាយ ពិសេសបក្សប្រឆាំងជាអ្នកញុះញង់នៅពីក្រោយខ្នងរហូតមក។ សូមកុំធ្វើដូចប្រទេសនានា ដែលចង់ផ្លាស់ប្តូរមេដឹកនាំ ទីបំផុតរលាយ វេទនាប្រជាពលរដ្ឋ គ្មានអ្នកណាទទួលខុសត្រូវឡើយ នេះជាបទពិសោធន៍អាក្រក់នៅលើកពិភពលោក ដែលកូនខ្មែរគួរចងចាំ និងជៀសវាងឲ្យបាន។
ឯកឧត្តមបណ្ឌិត ពេជ សោភ័ណ បន្តថា ក្នុងរាជរដ្ឋាភិបាលអាណត្តិទី៥នេះ ប្រមុខរាជរដ្ឋាភិបាលសម្តេចតេជោនាយករដ្ឋមន្រ្តី ហ៊ុន សែន ធ្លាប់បានបញ្ជាក់ដល់ជួរថ្នាក់ដឹកនាំទាំងអស់ថា អាណត្តិថ្មីនេះ គឺជាការកែទម្រង់ស៊ីជម្រៅ ឲ្យថ្នាក់ដឹកនាំទាំងអស់ មុជទឹក ដុះក្អែល ឆ្លុះកញ្ចក់ ហើយពេលនេះ ដល់ដំណាក់កាលព្យាបាលហើយ ដូច្នេះក្នុងនាមថ្នាក់ដឹកនាំ រហូតមន្រ្តីរាជការក្រោមឱវាទទាំងអស់ ត្រូវធ្វើការងារបម្រើសេវាសាធារណៈ ជូនប្រជាពលរដ្ឋឲ្យបានល្អប្រសើរ៕
No comments:
Post a Comment